Read Te Tusi Tapu I Te Gana Tuvalu Lomiga Lua MATAIO 1 Bible Online

MATAIO 1 - Te Tusi Tapu I Te Gana Tuvalu Lomiga Lua bible

MATAIO 1

¹Tenei te Tusi o te gafa o Iesu Keliso te Tama a Tavita, te Tama a Apelaamo.

²A Apelaamo ko te tamana o Isaako; a Isaako ko te tamana o Iakopo; a Iakopo ko te tamana o Iuta mo ona taina.

³A Iuta ko te tamana o Falesa mo Sela ia Tamala; a Falesa ko te tamana o Eselona; a Eselona ko te tamana o Alama;

⁴a Alama ko te tamana o Aminatapu; a Aminatapu ko te tamana o Nasona; a Nasona ko te tamana o Salemona;

⁵a Salemona ko te tamana o Poasa ia Lahapa; a Poasa ko te tamana o Opeta ia Luta; a Opeta ko te tamana o Iese;

⁶a Iese ko te tamana o te Tupu ko Tavita. A Tavita ko te tamana o Solomona i te avaga a Ulia;

⁷a Solomona ko te tamana o Leopoamo; a Leopoamo ko te tamana o Avia; a Avia ko te tamana o Asa;

⁸a Asa ko te tamana o Iosefatu; a Iosefatu ko te tamana o Iolama; a Iolama ko te tamana o Usia;

⁹a Usia ko te tamana o Iotama; a Iotama ko te tamana o Aasa; a Aasa ko te tamana o Esekia;

¹⁰a Esekia ko te tamana o Manase; a Manase ko te tamana o Amone; a Amone ko te tamana o Iosia;

¹¹a Iosia ko te tamana o Iekonia mo ona taina i aso o te 'kavega fakapagota o te fanauga a Isalaelu ki Papelonia.

¹²Mai tua ifo o te 'kavega fakapagota ki Papelonia: a Iekonia ko te tamana o Salatielu; a Salatielu ko te tamana o Selupapelu;

¹³a Selupapelu ko te tamana o Apiuta; a Apiuta ko te tamana o Eliakimo; a Eliakimo ko te tamana o Asola;

¹⁴a Asola ko te tamana o Satoka; a Satoka ko te tamana o Akeimo; a Akeimo ko te tamana o Eliuta;

¹⁵a Eliuta ko te tamana o Eleasalo; a Eleasalo ko te tamana o Matano; a Matano ko te tamana o Iakopo;

¹⁶a Iakopo ko te tamana o Iosefa te avaga a Malia, tela ne fanau mai ei a Iesu tela e taku ko te Keliso.

¹⁷Tela la, e sefulufa kautama mai ia Apelaamo ki a Tavita, kae mai ia Tavita ki te 'kavega fakapagota ki Papelonia e sefulufa foki kautama, kae mai te 'kavega fakapagota ki Papelonia ke oko ki a Keliso, e sefulufa foki kautama.

¹⁸ E penei te fanaumaiga o Iesu Keliso. A tena matua ko Malia, ne fai te la feagaiga mo Iosefa ke avaga; ka koi tuai o avaga, ne iloa ake i a ia ko faitama i te Agaga Tapu.

¹⁹Ka ko Iosefa se tino fai mea tonu, tela ne fai feagaiga mo Malia; kae e seki manako foki o fakamasiasi ne ia a Malia i mata o tino; tela ne manatu ei a ia o lepe malie te la feagaiga.

²⁰Kae i te taimi ne mafaufau ei a ia ki te mea nei, ne fakaasi mai te agelu a te Aliki ki a ia i te miti, kae fai mai: “Iosefa te mokopuna o Tavita, sa mataku o fai Malia mo fai tau avaga, i te mea ko faitama i te Agaga Tapu.

²¹ Ka fanau ne ia se tama tagata, kae ka fakaigoa ne koe a ia ko Iesu, me ka fakaola ne ia a tino mai i olotou agasala.”

²²Nei la, ne 'tupu katoa a mea konei, ko te mea ke fakataunu ei a muna a te Aliki kola ne faipatigina ne te pelofeta:

²³“Kiloke, ka faitama se tamafine e seki iloa ne ia se tagata, kae ka fanau ne ia se tama tagata, kae ka fakaigoa a ia ki a Emanuelu,” ko tena uiga, “Ko ia tatou te Atua.”

²⁴Tela la, i te alaakega a Iosefa, fai ei ne ia te mea tela ne fai atu ei a te agelu a te Aliki ki a ia, avaga ei laua;

²⁵kae ne seki fakatasi eiloa a ia mo tena avaga, ke oko eiloa ki te taimi ko oti ei ne fanau ne Malia tena tamaliki tagata, fakaigoa ei ne Iosefa a ia ko Iesu.