Read Te Tusi Tapu I Te Gana Tuvalu Lomiga Lua MATAIO 13 Bible Online

MATAIO 13 - Te Tusi Tapu I Te Gana Tuvalu Lomiga Lua bible

MATAIO 13

¹I te aso eiloa tena, ne fano a Iesu ki tua mai te fale o sagasaga i kaugutu o te namo o Kalilaia, o akoako atu.

²Ne mumu mai ki ona tafa a te vaitino, tena fano ei a ia ki luga o te poti o sagasaga i ei; ka ko te vaitino e 'tu i te tafatai.

³E uke a mea ne akoako ne ia ki a latou i tala fakatusa. “A te tino toki saito ne fano o toki a saito.

⁴Kae i tena 'tokiga, a nisi fuaga ne 'to i te auala, ne 'lele mai a manueva, kai ei ne latou.

⁵Ka ko nisi fuaga ne 'to i luga i te koga pa'papa, tela e manifi te one i ei. Ne vave ola ake a fuaga, i te mea e se matolu te kele i ei.

⁶Ne velasia a fuaga i te fanakega o te la, magemage ei, i te mea ko seai ne olotou aka.

⁷A nisi fuaga ne 'to ki va o lakau makai'kai, kae ne ola saitia i va o lakau makai'kai.

⁸Ko nisi fuaga foki ne 'to ki te laukele ola 'lei, ko ola ake kae fua mai ei a nisi fuaga ki te taki tolu sefulu, taki ono sefulu mo te taki selau.”

⁹Ne fai atu a Iesu, “Ko te tino e lagona ne ia aku muna, fai la!”

¹⁰Ne oko mai a soko o Iesu kae ne fesili mai a latou penei: “Ai a e faipati ei koe ki tino i tala fakatusa?”

¹¹Ne tali atu a Iesu ki a latou, “Ko oti ne tuku atu ke iloa ne koutou a mea 'funa o te Malo o te lagi, ka ko latou e seki tuku atu ki ei.

¹² Ko te tino tela ne fakalogo kae fai, ka fakaopoopo atu ke uke ana mea ke lava 'lei a ia kae toega foki, ka ko te tino tela ne fakalogo kae se fai, ka ave keatea a mea katoa mai i a ia, ke oko eiloa ki mea fo'liki e i a ia.

¹³Tena te mea ne faipati ei au ki a latou i tala fakatusa; i te mea e kilo'kilo fua latou kae e se matea ne latou, e faka'logo kae se lagona; e se maina foki a latou i ei.

¹⁴ E tonu ei a muna a te pelofeta ko Isaia ki a latou: ‘E faka'logo, faka'logo koutou kae se malamalama, E kilo'kilo, kilo'kilo koutou, kae se lavea,

¹⁵I te mea ko pu'pu a loto o te fenua nei, Ko faka'tuli foki olotou taliga Ko 'moe 'kini foki olotou mata, I te mea mana matea ne olotou mata, Io me lagona ne olotou taliga, Me mana malamalama foki i olotou loto, Kae 'fuli mai ei ki a au, Ko fakaola ei ne au a latou.’

¹⁶ Amutia otou mata mo otou taliga, me ko kilo kae faka'logo foki ki ei.

¹⁷E tonu au e fai atu ki a koutou, me e tokouke a pelofeta mo tino amiotonu ne ma'nako o 'kilo ki te mea ko matea ne koutou, kae ne seki 'kilo ki ei. Ne fia faka'logo foki ki te mea ko lagona ne koutou, kae ne seki faka'logo eiloa ki ei.”

¹⁸“Faka'logo mai la ki te uiga o te tala fakatusa ki te tino toki saito.

¹⁹Ko te tino tela e lagona ne ia a te tala e uiga ki te Malo kae se maina i ei, e pau a ia mo fuaga kola ne 'to i te auala. Kafai e vau te Tino Masei, ko ave ei keatea ne ia a te mea tela ne toki i tena loto.

²⁰A te fuaga tela ne to i te koga pa'papa, ko te tino tela e lagona ne ia te muna, kae talia foki eiloa ne ia mo te fiafia;

²¹ka ko te mea e seai ne ona aka, e toetoe fua te taimi ne ola ei i tena loto. Kafai la e oko fakavave mai a puapuaga mo fakasauaga ona ko te Muna a te Atua, se mea vave foki eiloa o tiakina atu ne ia te Muna a te Atua.

²²Ka ko te fuaga tela ne toki i va o lakau makai'kai, ko te tino tela e lagona ne ia te muna, ka ko te mea e fiafia malosi tena loto ki mea faka te olaga pela foki mo koloa; tela la, ko ola saitia te Muna a te Atua, ko seai ei ne ona fua e maua.

²³Ka ko te fuaga tela e toki i te laukele ola 'lei, ko te tino tela e lagona ne ia te muna kae maina foki i ei. Ko ia eiloa tena ka fua mai ne ia ne fuaga saito o taki tolu sefulu, taki ono sefulu, mo te taki selau.”

²⁴E penei te sua tala fakatusa ne fai atu ne Iesu ki a latou, “A te Malo o te lagi e fakatusa ki te tino ne toki ne ia a fuaga 'lei i tena manafa.

²⁵Kae i te sua po, i te taimi ko 'moe ei a tino, ne vau tena fili o toki a mouku i va o saito, oti fano ei keatea.

²⁶Ne ola ake lakau, ko 'fua mai kae 'sae ake foki mo mouku.

²⁷Ko olo atu a tino ga'lue ki te pule o te kaiga kae fai atu ki a ia, ‘Te aliki, ne toki ne koe a fuaga 'lei i tou manafa! Kae maifea foki la a mouku ma'sei kola ko ola ake i ei?’

²⁸Ne tali atu a ia ki a latou, ‘Ko te fili ne fai ne ia.’ Ne fai atu a tino ga'lue ki a ia, ‘E loto la koe ke olo matou o unu keatea a mouku?’

²⁹Ne tali mai te pule, ‘Ikai, kafai e unu ne koutou a mouku, ko tena uiga ka maunu ake foki a saito.

³⁰Tuku eiloa ke ola ake talua pena, ke oko ki te aso e kati ei te saito. I te aso tena, ko muna atu ei au ki tino kati saito, ‘Unu muamua a mouku kae 'sai ki saitaga ke 'sunu, kae kati a saito kae 'luku ki loto i toku fale saito.”’

³¹Tenei foki te sua tala fakatusa ne fai atu ne Iesu ki a latou, “A te Malo o te lagi, e fakatusa ki te fuaga o te sinapi tela ne puke ne te tino o 'toki i tena manafa.

³²Ko te fuaga pito foliki i fuaga katoa, kae i tena tupuakega, ko lasi atu i lakau katoa. Ko fai mo matua lakau, ko o'mai foki manu lele o fai olotou ofaga i luga i ona kaula.”

³³Tenei foki a te sua tala fakatusa ne fai atu ne Iesu ki a latou, “A te Malo o te lagi e pela mo te mea faka'fete. E puke ne te fafine o palu ki te tisi falaoa, ko 'fete ei te paluga katoa.”

³⁴Ne fakaaoga ne Iesu a tala fakatusa o akoako a mea konei ki tino. Me ko tala fakatusa faeloa e fakaaoga ne ia o akoako atu ki tino.

³⁵ Ne fai ne ia a mea konei ke fakamaonia ei a te muna a te pelofeta penei, “E fakaaoga ne au a tala fakatusa ma fai e faipati atu au ki a latou, E taku atu foki ne au ki a latou a mea 'funa mai te kamataga o te lalolagi.”

³⁶Ne tuku ne Iesu a te vaitino kae ulu ki loto i te fale. Ne o'mai ona soko ki a ia, kae fai mai, “Fakamatala mai ki a matou a te uiga o te tala fakatusa ki mouku kola e ola i te laukele.”

³⁷Ne tali atu a Iesu, “A te tino tela ne 'toki ne ia a fuaga 'lei, ko te Tama a te Tagata ko au tena.

³⁸A te laukele ko te lalolagi, ka ko fuaga 'lei ko tino o te Malo o te lagi, a mouku ko tino a te Tino Masei.

³⁹A te fili tela ne 'toki ne ia a mouku ko te Tiapolo; a te aso kati saito, ko te gataga o te lalolagi. A tino kati saito ko agelu.

⁴⁰E pela mo mouku e fakaputu o 'sunu ki te afi, ko te fakatusa tena o te gataga o te lalolagi.

⁴¹I te aso tena, e uga mai ne te Tama a te Tagata ana agelu, o 'vae keatea mai tena Malo a tino e fakaagasala ne latou a tino, mo tino amio masei,

⁴²kae pei ki te afi, tela e fakatau'tagi kae gaii olotou nifo i ei.

⁴³Ka ko tino amiotonu, e maina pela mo te la i te Malo o te lotou Tamana. Ko te tino e lagona ne ia aku muna, fai la!”

⁴⁴“A te Malo o te lagi, e pela mo te koloa taua ne 'funa i te laukele. Ne maua ne te sua tagata, kae ne toe 'funa ne ia. Ko oko eiloa i tena fiafia, fano ei o 'togi atu ana mea katoa, mo 'togi te laukele tena.”

⁴⁵“A te Malo o te lagi, e pela foki mo se tino fai koloa, e salasala ki penina taua.

⁴⁶I te mauaga ne ia a te penina e sili i te taua, fano ei o 'togi ana mea katoa, mo 'togi te penina tena.”

⁴⁷“A te Malo o te lagi, e pela mo te tili ne pei ki te tai, kae 'tu i ei a ika valevale.

⁴⁸Kafai ko fonu a te tili i ika, ko 'futi ake ei ki uta ne tino Fai-ika, ko 'nofo ki lalo, o fakavasega a ika 'lei o 'fao ki loto i olotou ola, kae tiaki a ika ma'sei.

⁴⁹E pena eiloa a te gataga o te lalolagi. E o'mai a agelu o 'vae keatea a tino ma'sei mai tino amiotonu.

⁵⁰Kae pei atu a tino ma'sei ki te afi tela e fakatau'tagi i ei a tino kae gaii olotou nifo.”

⁵¹Ne fesili atu a Iesu ki a latou penei, “E a, e maina koutou i mea katoa konei?” Ne tali mai a latou ki a ia, “Ao.”

⁵²Muna a Iesu ki a latou, “Ko tena uiga, ko faiakoga katoa o te Tulafono kola ko fai mo soko o te Malo o te lagi, e pela latou mo se pule o te fale, e tapale ne ia keatea a mea fou mo mea mua mai tena fale koloa.”

⁵³I te otiga ne tala atu ne Iesu a tala fakatusa konei, tuku ei ne ia te koga tena,

⁵⁴kae foki atu ki tena fenua tonu. Ne akoako atu ei a ia i te lotou fale tapuaki, ka ko tino kola ne fakalogo'logo ki a ia ne ofo. Ne fesili ifo ei latou i a latou eiloa, “Ne maua ne ia pefea te poto tenei, mo te fai vavega?

⁵⁵E se ko ia tena ko te tama a te kamuta? E se ko Malia tena matua? E se ko ia tena ko te taina o Iakopo, Iosefa, Simona, mo Iuta?

⁵⁶A ona tuagane konei katoa eiloa e 'nofo mo tatou i konei. Ne maua pefea ne ia a mea katoa konei?”

⁵⁷Tela, 'teke ei ne latou a Iesu, kae fai atu ei a ia ki a latou, “A te pelofeta e 'malu i so se koga, kae e se 'malu i tena fenua mo tena kaiga.”

⁵⁸E se uke a vavega ne fai ne ia i kona, i te mea e se fakatuanaki a latou.