Read Te Tusi Tapu I Te Gana Tuvalu Lomiga Lua MATAIO 14 Bible Online

MATAIO 14 - Te Tusi Tapu I Te Gana Tuvalu Lomiga Lua bible

MATAIO 14

¹I aso eiloa kona, a Helota te pule o Kalilaia ko logo i tala o Iesu.

²Ne fai atu ei ki ana ofisa, “Ko Ioane te Papatiso tenei ko toetu mai te mate. Tena te pogai e 'mana ei ana galuega.”

³Ne fai a te fakatonuga a Helota ke puke a Ioane o saisai o pei ki te fale puipui. Ne fai ne ia te mea tena o fakamalie a te loto o Helotia te avaga a tena taina ko Filipo.

⁴Me i a Ioane ne fai ana pati konei ki a Helota, “E tapu a koe ma avaga ki a Helotia!”

⁵Ne fia tamate a Helota ki a Ioane, kae ne mataku i tino, me ne manatu latou i a Ioane ko te pelofeta.

⁶I te aso fanau o Helota, ne saka te tama fafine a Helotia i mua o tino ami katoa. Ko oko eiloa i te fiafia o Helota ki ei,

⁷tela, tauto ei Helota ki a ia, “Au e tauto me e tuku atu ne au ki a koe so se mea e manako koe ki ei!”

⁸Ona ko te loto o tena matua ne fai atu ei a ia ki a Helota, “Aumai nei eiloa ki a au a te ulu o Ioane te Papatiso i se tisi!”

⁹Ne fanoanoa te tupu i te lagonaga ne ia a te mea nei, ka ko faigata i tena muna ko to ki mua o tino ami, tela fai atu ei tena muna me ko talia tena manakoga.

¹⁰Ne 'kati te ua o Ioane i te fale puipui,

¹¹aumai ei tena ulu i te tisi kae tuku atu ki te tamafine, ka ko te tamafine tena ne tuku atu ne ia ki tena matua.

¹²Ne o'mai a soko o Ioane o puke tena foitino ke ave o tanu, palele olo ei latou o taku atu ki a Iesu.

¹³I te logoga a Iesu i te tala i a Ioane, fano ei a Iesu i te poti ki te koga lavaki, o nofo i ei tokotasi. I te lagonaga ne tino i a Iesu ko fano i te poti, tiaki olotou fa'kai, kae 'tele i gauta o te kaugutu namo o fakafetaui ki a Iesu.

¹⁴I te fanatuga a Iesu mai te poti, ne lavea ne ia te vaitino ko itakitaki, tupu ake ei mo tena loto alofa ki tino, fai ei ne ia olotou masaki ke 'lei.

¹⁵Ne o'mai ona soko ki a ia i te afiafi, kae fai mai, “A te koga tenei se koga lavaki, ko pili nei o po; uga atu a tino ke olo ki fa'kai o 'togi ne meakai ma latou.”

¹⁶Ne tali atu a Iesu, “E se 'tau latou o olo keatea; tuku atu ne koutou ne meakai ma latou.”

¹⁷Ne tali mai latou ki a ia, “E lima faeloa omotou falaoa konei mo ika e luagamata.”

¹⁸Ne tali atu a Iesu, “Aumai ki a au a mea kona.”

¹⁹Ne fakatonu ne ia a te vaitino ke 'nofo ki lalo i mouku, puke ake ei a ia ki falaoa e lima mo ika e lua, ne kilo ake ki te lagi o fakafetai ki te Atua. Ne tofitofi ne ia falaoa, kae tuku atu ki ona soko ke tufatufa atu ki tino.

²⁰Ne 'kai katoa, ko ma'kona; 'fao ake ei ne latou a tapola e sefulu lua, ko fonu i toega meakai.

²¹A tino ne 'kai e lima afe tagata, kae e se faitau a fafine mo tamaliki.

²²Ne fai atu a Iesu ki ona soko ke 'sopo ki te poti, o 'mua atu i a ia ki te sua feitu o te namo, ke uga mua ne ia a tino ke olo.

²³I te otiga ne uga ne ia a tino ke olo, ne fanake ei a ia ki te mauga o 'talo. Kae ne nofo i kona ke oko eiloa ki te afiafi.

²⁴I te taimi tena, a te poti ko 'mao atu eiloa ki loto o te namo; ka ko logofiofio eiloa te poti ne tuki ne peau, i te matagi ko tutonu mai eiloa i te taumua.

²⁵Kae i te vaveao, ne sasale atu a Iesu ki a latou i luga o te vai.

²⁶I te laveaga ne ona soko a te tino e sasale i luga o te vai, ne pole'pole i te ma'taku, olotou muna, “A te mea nei se aitu.” Tela, paka'laga ei latou i te ma'taku.

²⁷I kona foki eiloa, faipati atu ei a Iesu ki a latou, “Ke loto ma'losi koutou, sa ma'taku, me ko au eiloa tenei.”

²⁸Kae ne tali mai a Petelu ki a ia, “Te Aliki, kafai ko koe eiloa tena, fai mai sau fakatonuga ke fanatu au ki a koe i luga o te vai.”

²⁹Ne tali atu a Iesu, “Vau”. Tena sopo ifo ei Petelu mai luga o te poti o sasale ki a Iesu i luga o te vai.

³⁰I te iloaga ne Petelu i te matagi ko agi malosi, tupu ake ei mo tena mataku, kamata eiloa o apulu ki lalo, kae kalaga atu penei, “Te Aliki, fakaola mai au.”

³¹Tela, 'kapa atu ei a te lima o Iesu o puke ki a ia, kae fai atu, “A tou fakatuanaki, ko oko eiloa i te foliki. Ai a ne fakalotolotolua ei koe?”

³²Kae i te la okoga ki te poti, malū ei te matagi.

³³Ka ko soko kola ne i te poti, ne tapuaki atu ki a Iesu, olotou muna, “E tonu eiloa ia koe ko te Tama a te Atua.”

³⁴Ne olo latou ki te sua feitu o te namo, oko atu ei ki te fenua ko Kenesaleta,

³⁵ko te koga tela e iloa 'lei eiloa ne tino a Iesu. Tela, fekau atu ei latou ki tino ma'saki i so se koga o te fenua tena, ke aumai ki a Iesu.

³⁶Ne fakamolemole atu a tino o te fenua tena ki a ia, me e a mana tuku a tino ma'saki ke fakapa'tele ki kapakapa o tena gatu. Tela la, ko tino katoa ne fakapa'tele ki ei ne 'lei katoa olotou masaki.