Read Te Tusi Tapu I Te Gana Tuvalu Lomiga Lua MATAIO 15 Bible Online

MATAIO 15 - Te Tusi Tapu I Te Gana Tuvalu Lomiga Lua bible

MATAIO 15

¹Ne o'mai a nisi Falesaio mo faiakoga o te Tulafono mai Ielusalema ki a Iesu, kae fai mai ki a ia:

²“Ai a e se faka'logo ei ou soko ki te akoakoga ne tuku fakasolo mai ne o'tou tupuga ki a tatou, me e se 'fano olotou lima manafai e 'kai?”

³Ne tali atu a Iesu, “Ai a foki la koutou e se faka'logo ei ki fakatonuga a te Atua, kae fakasilisili ne koutou otou akoakoga?

⁴ I te Atua ne fakatonu mai, ‘Ava ki tou tamana mo tou matua. So se tino foki e pati masei ki tena tamana mo tena matua, a te tino tena e 'tau o tamate.’

⁵Kae akoako ne koutou, me so se tino e fai atu ki tena tamana mo tena matua penei, ‘So se mea a aku e aoga ki a koulua, a te mea tena ko te taulaga ki te Atua.’ Tela la, ko se 'tau a ia o ava ki ona matua.

⁶A latou e se manako o ava ki olotou tamana.[13] I te faifaiga tenei ko fakaseaoga ei ne koutou a tulafono a te Atua, ko te mea ke tautali eiloa koutou ki otou akoakoga.

⁷A koutou ne tino 'loi! Ko tutonu eiloa ki a koutou a te muna a te pelofeta ko Isaia!

⁸ ‘A tino konei e ava mai fua ki a au i olotou gutu Ka ko olotou loto e 'mao mai i a au.

⁹E se aoga olotou tapuakiga ki a au, I te mea ko akoako atu ne latou a akoakoga a tino ke fai pela me ne tulafono a te Atua!”’

¹⁰Ko kalaga atu a Iesu ki tino kae fai atu, “Faka'logo mai, ko te mea ke iloa ne koutou!

¹¹E se ko te mea e ulu ki te gutu o te tino e fakamasei ei a ia, ka ko te mea tela e vau mai te gutu o te tino, e fakamasei ne ia a te tino.”

¹²Ko o'mai ona soko kae fai mai ki a ia, “E iloa ne koe i Falesaio ne ita i te lagonaga ne latou a tau fakamatalaga tena?”

¹³Ne tali atu a Iesu, “So se lakau e seki 'toki ne toku Tamana faka te lagi, e unu keatea.

¹⁴ Tuku fua i ei, me ko latou eiloa ne takitaki 'kivi. Kae kafai ko te tino 'kivi e takitaki ne ia te sua tino 'kivi, e 'to laua ki te lua.”

¹⁵Kae ne fai mai Petelu ki a ia, “Fakamatala mai ake ki a matou a te tala fakatusa tena.”

¹⁶Kae ne tali atu a Iesu, “A koutou foki koi pouliuli eiloa!

¹⁷E se iloa ne koutou i te mea e ulu ki te gutu, e fano ki te tinae, ko fano ei i tena fanoga?

¹⁸Ka ko te mea e vau i te gutu, e fanake tonu eiloa mai te loto, tena te mea e fakamasei ne ia a te tino.

¹⁹Me ko te loto e mafua mai ei a mafaufauga ma'sei: ko te tatino, ko te mulilua, ko te fina lalolagi, ko te kaisoa, ko te faitala loi, mo te fatufatu.

²⁰A mea konei e fakamasei ne latou a te tino, ka ko te kai mo lima e se 'fano, e se fakamasei ei a te tino.”

²¹Ko tuku ne Iesu a te koga tena, kae fano ki te koga fenua pili ki fa'kai ko Tulo mo Saitonu.

²²Kae kiloke, a te fafine Kanana ne nofo i te koga tena, ne vau ki a ia kae kalaga mai, “Te Aliki te Tama a Tavita, alofa mai ki a au! A taku tama fafine ko pukea masei ne te temoni.”

²³Ka ko Iesu ne seki tali atu ki tena pati. Ne o'mai ei ona soko kae ne fakamolemole atu ki a ia penei: “Uga atu ke na fano, mo te logoa mai i o'tou tua.”

²⁴Ne tali atu a Iesu, “Au ne uga mai fua ki mamoe 'galo o te kaiga o Isalaelu.”

²⁵Kae ne vau te fafine o totuli i ona mua, kae fai mai, “Te Aliki, fesoasoani mai ki a au.”

²⁶Ne tali atu a Iesu, “E se 'tau o tuku atu a meakai a tamaliki ki kuli.”

²⁷Ne tali mai te fafine, “Te Aliki, e tonu eiloa koe, ka ko kuli e 'kai foki ki matutuga o mea kola e tatela mai i te laulau a olotou pule.”

²⁸Ne tali atu a Iesu ki a ia, “A koe se fafine e lasi tou fakatuanaki! Ko te mea e manako koe ki ei, e fai eiloa pena.” Kae i mo taimi eiloa kona, malosi ei tena tama.

²⁹Ne tuku ne Iesu a te koga tena, kae sasale atu i tafa o te namo o Kalilaia. Ne fanake ki luga i te mauga, sagasaga ei ki lalo.

³⁰Ne o'mai ki a ia te vaitino, kae ne aumai ne latou a tino 'pili, tino 'kivi, tino vae 'mutu, tino gūgū, mo nisi tino ma'saki ake foki, kae ne tuku fakapilipili ne latou ki ona vae. Ne faka'lei katoa eiloa ne ia olotou masaki.

³¹A tino ne ofo i te 'kiloatuga ki tino gūgū ko fai'pati, a tino vae 'mutu ko 'lei, a tino 'pili ko sasale, mo tino 'kivi ko 'kite. Tela, 'viki atu ei latou ki te Atua o Isalaelu.

³²Ne kalaga atu a Iesu ki ona soko kae fai atu, “Au ko alofa i tino, me ko tolu nei aso i te motou 'nofoga, kae seki 'kai eiloa latou. Au e se loto ke uga atu ke olo kae seki 'kai, me mana mata'po i te auala.”

³³Ne fesili mai a soko ki a ia, “E maua ifea ne tatou ne meakai mo fagai a tino konei, i te koga nei se koga lavaki?”

³⁴Ne fesili atu a Iesu ki a latou, “E fia otou falaoa kona?” Ne tali mai latou, “E fitu falaoa mo mu ika foliki.”

³⁵Ne fakatonu atu ne Iesu a tino ke 'nofo ifo ki lalo.

³⁶Kae ne puke ei ne ia a falaoa e fitu mo ika, ko fakafetai, ko tofitofi ne ia, kae tuku atu ei ki ona soko, ke tufatufa atu ne latou ki tino.

³⁷Ne 'kai katoa, ko ma'kona; 'fao ake ei ne latou a tapola e fitu, ko 'fonu i toega meakai.

³⁸A tino ne 'kai e fa afe tagata, kae e se faitau a fafine mo tamaliki.

³⁹I te otiga ne uga ne ia a tino ke olo, sopo ei ki te poti o fano ki te koga fenua o Makatani.