Read Te Tusi Tapu I Te Gana Tuvalu Lomiga Lua MATAIO 16 Bible Online

MATAIO 16 - Te Tusi Tapu I Te Gana Tuvalu Lomiga Lua bible

MATAIO 16

¹ Ne o'mai a nisi Falesaio mo Satukaio ki a Iesu o malei a ia, tela fesili mai ei latou ke fai ne ia se vavega mai te lagi.

²Ne tali atu a Iesu ki a latou, “Kafai e oko ki te afiafi ko muna mai koutou, ‘Ka 'lei te aso, me ko 'kula mai te lagi.’

³I te taeao malu ko fai ake foki koutou, ‘Ka 'to te vaiua me i te lagi ko kula kae pouli.’ E mafai fua o fakatino te tau o te aso i te kilo atu ki te lagi,[14] kae e se iloa ne koutou o tau a fakailoga kola e fakasino tonu ki te vaitaimi tenei!

⁴ Ko seai la se kautama masei mo te se fakamaoni penei! E a, e fia iloa ne koutou se fakailoga mai i a au? E seai! A te fakailoga ka tuku atu ne au ki a koutou, ko te fakailoga o Iona te pelofeta.” Ne tuku ei ne ia a latou kae fano keatea.

⁵I te ologa o soko ki te sua feitu o te namo, ne puli i a latou o ave ne olotou falaoa.

⁶ Ne fai atu a Iesu ki a latou, “Ke fakaeteete eiloa koutou i te mea faka'fete a Falesaio mo Satukaio.”

⁷Fai'pati ei latou i a latou eiloa, olotou muna, “Ne fai ana pati kona i te mea e seai ni o'tou falaoa ne aumai.”

⁸Ne iloa ne Iesu olotou mafaufauga, fai atu ei ki a latou, “A koutou ko tino e fo'liki fakatuanaki! Ai a e mafaufau ei koutou pena? I te mea e seai ni falaoa i a koutou?

⁹ E seki maina eiloa koutou? E se masaua ne koutou a falaoa e lima ki te lima afe, mo tapola foki e fia ne 'fao ne koutou?

¹⁰ Io, me ko falaoa e fitu ki te fa afe, mo tapola foki e fia ne 'fao ne koutou?

¹¹E se maina pefea koutou, i aku pati e se fakauiga ki falaoa? Ke fakaeteete koutou mai te mea faka'fete a Falesaio mo Satukaio!”

¹²Tela, fatoa maina i ei ona soko, me ne seki fai atu ki a latou ke fakaeteete mai te mea faka'fete falaoa, ka ko akoakoga a Falesaio mo Satukaio.

¹³Ne fanatu a Iesu ki te koga fenua i tafa o te fa'kai ko Kaisaleia Filipi, kae ne fesili atu ki ona soko, “Ni a pati a tino, me ko oi au te Tama a te Tagata?”

¹⁴ Ne tali mai latou, “A nisi tino e fai mai me ko Ioane te Papatiso, ka ko nisi tino e fai mai me ko Elia, ka ko nisi e fai mai me ko Ielemia, io me ko se isi mai te kau pelofeta.”

¹⁵Ne fai atu a ia ki a latou, “Ka ko koutou, se a te otou mau me ko oi au?”

¹⁶ Ne tali mai Simona Petelu, “A koe ko te Keliso, ko te Tama a te Atua ola.”

¹⁷Ne tali atu a Iesu ki a ia, “Amutia eiloa koe e Simona te tama a Iona, me e seai se tino ne fakaasi ne ia a te mea tenei ki a koe, ka ko toku Tamana eiloa i te lagi.

¹⁸Tenei la, au ko fai atu ki a koe, a koe ko Petelu. E fakatu ne au taku Ekalesia i luga o te papa tenei. E se mafai eiloa ne te malosi o te mate o fakatakavale.

¹⁹ E tuku atu ne au ki a koe a ki o te Malo o te lagi: a te mea e fakatapu ne koe i te lalolagi, e fakatapu foki i te lagi. A te mea e 'tala ne koe i te lalolagi, e 'tala foki i te lagi.”

²⁰Ne fakatonu malosi atu ei a Iesu ki ona soko, ke se taku atu ki se tino i a ia ko te Keliso.

²¹Ne kamata mai eiloa i te taimi tena o faipati tonu atu a Iesu ki ona soko, me e 'tau eiloa mo ia o fano ki Ielusalema, kae e puapuaga foki a ia i mea e uke mai toeaina, mai faitaulaga sili, mo faiakoga o te Tulafono. E tuku atu foki ke tamate, ka ko te tolu o aso e toetu mai.

²²Ka ko Petelu ne kalaga atu ki a Iesu, “Te Aliki, ke alofa atu a te Atua ki a koe, ke mo a e oko ki a koe a mea kona!”

²³Ne mafuli ake a Iesu, kae fai atu ki a Petelu,“Satani, fano keatea mai ia au. A toku ala ko 'pono ne koe, ka ko ou mafaufauga, e se ne mafaufauga faka-te-Atua, kae ne mafaufauga faka-te-foitino."

²⁴ Tela, fai atu ei a Iesu ki ona soko, “So se tino e tautali mai i a au, ke se mafaufau ki a ia eiloa, kae ke amo tena sataulo, ko tautali mai ei i a au.

²⁵ Ko te tino e fia fakasaosao ne ia a tena ola mo ia ake eiloa, e se maua ne ia, ka ko te tino e fakamaumau ne ia a tena ola ona ko au, e maua ne ia.

²⁶Kae se a te aoga ki te tino manafai e maua ne ia te lalolagi katoa, kae tela la e maumau fua i ei a tena ola? Io, me se a te mea e tuku ne se tino e sui ei a tena ola?

²⁷ A te Tama a te Tagata e vau mo ana agelu i te 'malu o tena Tamana, kae e taui atu ne ia ki tino takitokotasi a tena mea tela ne fai.

²⁸Au e muna tonu atu ki a koutou, me i nisi o koutou konei e 'tu mai nei, ka koi tuai o 'mate latou, e matea muamua ne latou au te Tama a te Tagata ko vau i tena malo.”