Read Te Tusi Tapu I Te Gana Tuvalu Lomiga Lua MATAIO 18 Bible Online

MATAIO 18 - Te Tusi Tapu I Te Gana Tuvalu Lomiga Lua bible

MATAIO 18

¹ I te taimi tena, ne olo atu a soko o fesili ki a Iesu, olotou muna, “Ko oi te tino e sili i te Malo o te lagi?”

²Ne kalaga atu a Iesu ki se tamaliki, kae fakatu ne ia i olotou mua,

³ kae fai atu ki ona soko, “E tonu au e fai atu ki a koutou, kafai e 'fuli koutou ke pela mo tamaliki, e mafai ne koutou o ulu atu ki te Malo o te lagi.

⁴A te tino e sili i te Malo o te lagi, ko te tino tela e fakamalalo ne ia a ia eiloa, ke pela mo te tamaliki tenei.

⁵Ko te tino e talia ne ia se tamaliki penei i toku igoa, e talia foki ne ia a Au.”

⁶“So se tino e fai ne ia se mea ke agasala a tamaliki konei, kola e talitonu ki a au, e sili atu moi fai ne 'sai tena ua ki se fatu kae 'pei ki te moana 'poko.

⁷Kalofa eiloa i te lalolagi ona ko fakaosoosoga ki te agasala! Me e oko mai eiloa a fakaosoosoga, kae kalofa eiloa i a ia tela e fakatupu ne ia te fakaosoosoga!

⁸ “Kafai e faka'se koe ne tou lima io me ko tou vae, 'kati kae 'pei keatea! Me e sili atu mafai e sao koe ki te ola, kae seai sou lima mo se vae, i lo tou pei ki te afi se gata mai mo ou lima mo ou vae.

⁹ Kafai foki e faka'se koe ne tou mata, tapale kae 'pei keatea. Me e sili manafai e sao koe ki te ola mo te mata e tasi, kae masei manafai e 'pei koe mo ou mata ki te afi o Kena.”

¹⁰“A koutou eiloa, me mana fakaseaoga ne koutou se tino o tamaliki konei. Me muna atu au ki a koutou, i olotou agelu i te lagi e matea faeloa ne latou a foliga o toku Tamana i te lagi.[15]

¹¹ (Me i a au ko te Tama a te Tagata ne vau o fakaola a tino ne 'galo.)

¹²“Se a te mea ka fai ne se tino e isi ne ana mamoe e selau, kae galo se mamoe e tasi? E a, e se tuku ne ia a te iva sefulu iva mamoe i tafatafa o te mauga, kae fano o 'sala a te mamoe ne galo?

¹³Kafai la ko maua ne ia, au e muna atu ki a koutou; ka lasi atu tena fiafia ki te mamoe ne galo i lo mamoe e iva sefuluiva kola ne 'toe.

¹⁴E pena foki eiloa te otou[16] Tamana i te lagi. E se manako ke galo se tino o latou konei koi fo'liki.”

¹⁵ “Kafai e agasala mai tou taina ki a koe,[17] fano ki a ia o fakaasi atu a tena 'se i a koulua ake eiloa tokolua. Kafai e fakalogo mai ki a koe, ko tena uiga ko maua ne koe tou taina.

¹⁶ Kae kafai e se fakalogo ki a koe, ke olo koulua mo se tino io me se tokolua, ko te mea ke fakamaoni ei a muna katoa eiloa ne se tokolua io me se tokotolu molimau.

¹⁷Kae kafai foki e se fakalogo ki a latou, taku atu ki te Ekalesia. Kafai foki eiloa e se fakalogo ki te Ekalesia, ke taku la ne koe pela me se tino o fenua fakaatea io me se tino ao lafoga.”

¹⁸ “Au e fai tonu atu ki a koutou: ko te mea e fakatapu ne koutou i te lalolagi, e fakatapu foki i te lagi. Ko te mea e fakataga ne koutou i te lalolagi, e fakataga foki i te lagi.

¹⁹“Au e toe fai atu ki a koutou: me kafai e loto ma'lie se tokolua o koutou ki se mea, kae 'talo atu ki te Atua mo te mea tena, e fai eiloa ne toku Tamana i te lagi.

²⁰Me so se koga e fakapotopoto ei se tokolua, io me se tokotolu i toku igoa, e iai foki au i kona.”

²¹ Ne fanatu a Petelu o fesili ki a Iesu, ana muna, “Te Aliki, e fakafia taimi e fakamagalo ei ne au a toku taina, manafai e agasala mai ki a au? E a, e fakafitu?”

²² Ne tali atu a Iesu, “Ikai, e se fakafitu,” “kae fitu sefulu a fitu.[18]

²³Me i te Malo o te lagi, e pau eiloa mo se tupu tela ne mafaufau o fakamasino ana koloa e tausi ne ana tavini.

²⁴I te kamataga o fakamasino ana tavini, ne mua a ia tela ne kaitalafu ne ia ne miliona tālā.

²⁵Ko se maua ne ia o 'togi tena kaitalafu, tela fakatonu atu ei tena pule ke ave a ia o fakatau atu e pela mo se pologa, fakatasi mo tena avaga mo ana tamaliki, pela foki ana mea katoa mō 'togi tena kaitalafu.

²⁶Ne totuli kae ifo a te tavini i mua o tena pule, ana muna, ‘Te aliki, kufaki malie ake eiloa, me e toe 'togi atu ne au ki a koe au mea katoa!’

²⁷Ne oko ifo ki te pule a te loto alofa ki a ia, tela, fakamagalo ei ne ia tena kaitalafu, kae tuku atu ke fano.

²⁸“Ne fanatu a te tavini ki tua kae fetaui mo te sua taina tavini ne kaitalafu ne ia ne mo tālā i ana tupe. Puke ne ia, kae tolo ki lalo kae fai atu ki ei, ‘Togi fakavave mai tau kaitalafu.’

²⁹Tela, fakasiga ifo ei ki lalo tena taina tavini o fakamolemole mai ki a ia, ana muna, ‘Ke kufaki malie ake eiloa koe, e toe 'togi atu eiloa ne au ki a koe a taku kaitalafu!’

³⁰Kae ne se talia eiloa ne ia a te fakamolemole a tena taina tavini. Ne 'pei ne ia ki te falepuipui, ke oko ki te taimi e palele ei ne 'togi tena kaitalafu.

³¹I te mateaga ne nisi taina tavini a te mea ne tupu, ko oko eiloa i te loto se fia'fia. Olo atu ei ki te lotou pule o fakamatala a mea katoa ne fai.

³²Tela, kalaga atu ei te pule ki te tavini tela se loto fakamagalo ke vau ki loto, kae fai atu ki ei, ‘A koe se tavini masei!’ Ne fakamagalo ne au a tau kaitalafu i a au, me ia koe ne fakamolemole mai.

³³Ne 'tau mo koe o alofa atu ki tou taina tavini, e pela eiloa mo au ne alofa foki ki a koe!’

³⁴Ko oko eiloa i te ita o te pule, tuku ei ne ia te tavini se loto fakamagalo ki te fale puipui, ke oko ki te taimi e palele ei ne 'togi tena kaitalafu katoa.”

³⁵Tela, fakapalele atu ei a muna a Iesu penei: “Ka pena eiloa a faiga a toku Tamana i te lagi ki a koutou katoa, manafai e se Loto fakamagalo koutou ki otou taina.”