Read Te Tusi Tapu I Te Gana Tuvalu Lomiga Lua MATAIO 19 Bible Online

MATAIO 19 - Te Tusi Tapu I Te Gana Tuvalu Lomiga Lua bible

MATAIO 19

¹I te otiga ne faipati a Iesu ki mea konei, tuku ei ne ia Kalilaia kae foki ki Iutaia, i te sua feitu o te vaitafe ko te Iolitana.

²Ne tautali atu foki i a ia te vaitino e tokouke, kae ne faka'lei ne ia olotou masaki i kona.

³A nisi Falesaio, ne o'mai ki a Iesu o fesili tofotofo ki a ia penei: “E taga i te Tulafono a tatou o fakateka ne se tagata tena avaga i so se mea?”

⁴ Ne tali atu a Iesu, “E a, e seki faitau ne koutou i te Tusi? A ia tela ne faite ne ia a tino i te kamataga, ne faite ne ia a te tagata mo te fafine.

⁵ Ne fai atu, “Tena te pogai ko tuku ei ne te tagata tena tamana mo tena matua, kae fakatasi mo tena avaga, ko fai ei laua mo foitino e tasi.”’

⁶Tela la, ko se toe tokolua laua, ka ko tasi. A laua kola ko oti ne fakatasi ne te Atua, e seai se tino e mafai ne ia o 'tala.”

⁷ Ne toe fesili mai a Falesaio ki a Iesu, “Ai a ne fakatonu mai ei a Mose ke avatu se tusi 'tala avaga ne se tagata, e fakateka ei tena avaga?”

⁸Ne tali atu a Iesu ki a latou, “Ona ko te make'ke otou loto, ne fakataga ei ne Mose ke 'tala otou avaga. Kae e seki fai pena mai te kamataga.

⁹ Au e muna atu ki a koutou, so se tino e 'tala tena avaga kae seki mulilua, e mulilua eiloa a ia manafai e toe avaga ki se isi fafine.”

¹⁰Ne fai mai ona soko ki a ia, “Kafai e pena te tulaga i te va o te tagata mo te fafine, e se 'tau o a'vaga a tino katoa.”

¹¹Ne tali atu a Iesu ki a latou, “E se mafai o talia te pati tena ne tino katoa, kae na ko latou fua kola ko oti ne avatu ki ei ne te Atua, a te manako se fia avaga.

¹²I te mea e isi ne mafuaga kesekese, ko se mafai ei o a'vaga a tino. Nisi tino ne fai eiloa pena talu te fa'naumaiga, ka ko nisi ne fai ne tino ke se a'vaga, ka ko nisi tino ne fai eiloa ne latou ke se a'vaga ona ko te Malo o te lagi. A ia tela e fia talia ne ia a te akoakoga tenei, ke na talia nei.”

¹³Ne aumai ne nisi tino ki a Iesu a tamaliki ke fakaeke atu ona lima ki a latou, kae 'talo. Ne 'vao atu a ona soko ki tino kola ne aumai ne latou a tamaliki.

¹⁴Ne fai atu a Iesu, “Tuku mai a tamaliki ke o'mai ki a au; sa taofigina latou, i te mea e o tino penei a te Malo o te lagi.”

¹⁵I te otiga ne fakaeke atu ona lima ki luga ia latou, fano ei a ia keatea.

¹⁶Ne vau ki a Iesu se tagata e tokotasi, kae ne fesili mai ki a ia, “Te Faiakoga, se a te galuega 'lei e 'tau o fai ne au, ke maua ei ne au a te ola se gata mai?”

¹⁷Ne tali atu a Iesu, “Ai a e fesili mai ei koe ki a au e uiga ki se galuega 'lei? E tokotasi fua te tino e 'lei. Kafai e fia oko koe ki te ola se gata mai, ke tausi la ne koe a fakatonuga.”

¹⁸ Ne toe fesili mai a ia ki a Iesu, “Ni a fakatonuga?” Ne tali atu a Iesu, “Sa tatino; sa mulilua; sa kaisoa; sa patiloi;

¹⁹ ava ki tou tamana mo tou matua; e 'tau foki o alofa atu koe ki tou tuakoi e pela eiloa mo koe ki a koe.”

²⁰Ne tali mai a te tamatane, “Ko oti ne tausi ne au a fakatonuga katoa konei. Koi isi ake foki se mea e seki fai ne au?”

²¹Muna a Iesu ki te tamatane: “Kafai e manako koe ke katoatoa te 'lei o tau amio, fano nei eiloa o fakatau atu au koloa katoa, kae avatu a tupe ki tino ma'tiva, ko maua ei ne koe a koloa e uke i te lagi; ko vau ei koe o tautali mai ia Au.”

²²Ne fanoanoa lasi te tamatane tenei i te lagonaga ne ia a pati a Iesu, i te mea i a ia se tagata maukoloa.

²³Muna a Iesu ki ona soko, “Au e fai tonu atu ki a koutou, me se mea e faigata i te tino maumea o ulu atu ki te Malo o te lagi.

²⁴Ke toe fakafoki atu ne au: e faigata o ulu te kamela i te pu o te nila, kae e sili atu i te faigata o ulu atu ki te Malo o te Atua se tino maukoloa.”

²⁵I te lagonaga ne ona soko a muna a Iesu konei, ko oko eiloa i te lotou ofo, kae fai ake olotou pati penei: “Ko oi la te tino e mafai o sao ki te ola, manafai e pena te faiga?”

²⁶Ne kilo tonu atu a mata o Iesu ki a latou, faipati atu ei ki a latou, “E se mafai ne tino o fai a te mea tenei, kae e mafai ne te Atua o fai a mea katoa.”

²⁷Muna a Petelu ki a Iesu, “Kiloke, ko tuku ne matou omotou mea katoa, kae tau'tali atu ia koe. E a, e isi la se mea e maua ne matou?”

²⁸ Ne tali atu a Iesu ki a latou, “Ko taku atu nei ne au a te mea nei ki a koutou: kafai ko nofo te Tama a te Tagata i tena nofogaaliki 'malu i te lalolagi fou; a koutou kona e tinoagafulu mo te tokolua kola ne tau'tali mai ia au; e 'nofo foki koutou i nofogaaliki e sefululua o fakamasino matakaiga e sefululua o Isalaelu.

²⁹So se tino e tiakina ne ia ona fale, taina, tuagane, te tamana mo te matua, fanau, mo manafa ona ko toku igoa; e sili atu i te uke o ana mea e maua fakamuli, kae tuku atu foki ki a ia a te ola se gata mai.

³⁰ E tokouke a tino ne 'mua ka faka'muli, kae tokouke foki a tino ne faka'muli ka 'mua.”