Read Te Tusi Tapu I Te Gana Tuvalu Lomiga Lua MATAIO 2 Bible Online

MATAIO 2 - Te Tusi Tapu I Te Gana Tuvalu Lomiga Lua bible

MATAIO 2

¹A Iesu ne fanau i te fa'kai ko Peteleema i te fenua ko Iutaia, i aso o te Tupu ko Helota. E isi ne tagata 'poto i uiga o fetu ne o'mai mai i te Sopogala ki Ielusalema,

²kae fai mai, “Tefea te tamaliki ne fanau mai, tela ka fai mo tupu o tino Iutaia? Me ne matea ne matou a tena fetu i te Sopogala; tenei te mea ne o'mai ei matou o tapuaki ki a ia.”

³I te lagonaga ne te Tupu ko Helota a te mea nei, ne manavase a ia, pela foki mo tino katoa i Ielusalema.

⁴Ne fakamaopoopo katoa ne ia a faitaulaga sili pela foki mo faiakoga o te Tulafono, kae fai atu, “E fanau ifea te Keliso?”

⁵Ne tali mai latou, “I Peteleema i Iutaia, me penei a muna a te pelofeta ne tusi:

⁶ ‘A koe foki e Peteleema i te fenua o Iuta, Ka sili atu tou taulia i fakai e uke o Iuta; Me e tupu mai ia koe se Takitaki Tela ka pule ne ia toku fenua ko Isalaelu.”’

⁷Tela, ami ei ne Helota a tagata 'poto kona ke fai se lotou fono 'funa, kae o sukesuke foki ki a latou a te taimi tonu tela ne matea ei ne latou a te fetu.

⁸Ne uga ne ia a latou ke olo ki Peteleema mo fakatonuga konei: “Olo o salasala faka'lei a te tamaliki, kafai ko maua fakailoa mai, ko te mea ke fanatu foki au o tapuaki ki a ia.”

⁹Tela ne olo atu ei latou, kae i te olotou auala ne lavea ne latou a te fetu foki tela ne lavea ne latou i te saegala. I te taimi ne lavea i ei ne latou, ko oko eiloa i te olotou fiafia, kae ne 'lifu foki a latou! Ne fano eiloa i olotou mua ke oko ki te taimi ko tu ei i luga o te koga e nofo ei te tamaliki

¹¹Ne olo ki loto i te fale, ne matea ne latou a te tamaliki mo Malia tena matua, totuli ifo ei o tapuaki ki a ia. Ne 'tala olotou taga kae avatu ki a ia a meaalofa: se aulo, se pulu lipano mo te pulu mulo ne sinu manogi.

¹²Ne fakatonu atu latou ne te Atua i te moemiti ke se 'foki ki a Helota; tela, toe 'foki ei o olo ki te lotou fenua i te sua auala.

¹³Mai tua ifo i te 'fokiga o te kau kona, ne fakaasi te agelu a te Aliki ki a Iosefa i te moemiti kae fai atu: “Tu ki luga, puke te tamaliki mo tena matua kae olo nei eiloa ki Aikupito; 'nofo i kona ke oko eiloa ki te taimi e toe fai atu ei au ke olo koutou keatea. A Helota, ka salasala ki te tamaliki o tamate.”

¹⁴ Ala ake Iosefa, puke te tamaliki mo tena matua; olo eiloa i te po tena ki Aikupito,

¹⁵kae ne 'nofo eiloa i kona ke oko eiloa ki te mate o Helota. Ne fai penei ko te mea ke fakataunu ei a muna a te Aliki kola ne fai mai ne te pelofeta, “Ne aumai ne au taku Tama keatea mai Aikupito.”

¹⁶I te iloaga ne Helota i tino faimalaga mai te Sopogala ne 'loi ki a ia, ko oko eiloa i tena kaitaua, tela, fakatonu atu ei ne ia ke tamate katoa a tamaliki tagata i Peteleema mo fenua pili mai, e kamata i te lua tausaga o fanaifo ki lalo, e faka'tau eiloa ki te mea ne iloa kae tauloto ne ia mai te tokotolu tagata 'poto, i te taimi ne sae ei te fetu.

¹⁷Tenei la, ko tonu ei a te muna a te pelofeta ko Ielemia:

¹⁸ “Ne lagona te leo i Lama, ko te leo o te tagi fakaalofalofa mo te fanoanoa. A Lasela ko oko eiloa i te tagi fanoanoa mō ana tamaliki, E tagi ka ko se mafai foki o fakamafanafanagina a tena loto, I te mea ko 'mate katoa latou.”

¹⁹I te matega a Helota, ne fakaasi atu a te agelu a te Aliki ki a Iosefa i te moemiti i Aikupito;

²⁰kae fai mai: “Tu ki luga, puke te tamaliki mo tena matua, kae toe 'foki ki Isalaelu; me ko 'mate katoa a latou kola ne taumafai o tamate te tamaliki.”

²¹Ne tu ake Iosefa, puke te tamaliki mo tena matua, 'foki eiloa latou ki Isalaelu.

²²I te iloaga ne Iosefa me ko Alekilao ko fai mo tupu i Iutaia, e sui tulaga i tena tamana ko Helota, ne mataku manafai e olo latou ki kona. Ne toe fakailoa atu ki a ia a nisi fakatonuga i te moemiti, tela olo ei latou ki Kalilaia,

²³ fano ei o nofo i te fa'kai ko Nasaleta. Ne fai a te mea nei e fakataunu ei a te muna a pelofeta ne fai, “E taku foki a ia se Nasaleta.”