Read Te Tusi Tapu I Te Gana Tuvalu Lomiga Lua MATAIO 20 Bible Online

MATAIO 20 - Te Tusi Tapu I Te Gana Tuvalu Lomiga Lua bible

MATAIO 20

¹“A te Malo o te lagi, e pela eiloa mo te pule o te togavine, tela ne alausu o 'sala tena kau faigaluega, ke ga'lue i tena togavine.

²Ne loto malie a ia fakatasi mo tino ga'lue ke 'togi latou ki te tupe siliva e tasi i te aso i te tino e tokotasi; tela uga atu ei ne ia a latou ke olo o ga'lue i te togavine.

³I te itula e iva, ne toe fanatu a ia ki te maketi, matea ei ne ia a nisi tagata e takatu'tu fua, e seai ne olotou galuega e fai.

⁴Fai atu ei a ia ki a latou, ‘Olo foki koutou o galue i te togavine, kae e 'togi ne au koutou ki se 'togi 'tau.’ Tela, olo ei a tagata kona.

⁵Ne toe fanatu foki a ia ki te maketi i te itula e sefululua mo te itula e tolu, o 'sala ne tagata, kae fai atu foki ki a latou ke olo o galue i te togavine.

⁶Ko pili o ta te lima i tena fanoga ki te maketi, matea ei ne ia a nisi tagata e takatu'tu fua i kona. Fesili atu ei a ia ki a latou, ‘Ai a e fakamaumau ei ne koutou a te aso o takatu'tu tauanoa i konei, kae seai ne otou mea e fai?’

⁷Ne tali mai latou, ‘Me e seai la se tino ne fai mai ke olo matou o galue i a ia. ’Fai atu ei a te pule ki a latou, ‘Ko 'lei, olo atu foki mo koutou o galue i te togavine.’

⁸ “Ko oko ki te afiafi, muna atu ei a te pule ki te takitaki o te kau faigaluega, ‘Kalaga atu ki tino galue ke o'mai o peofu, e kamata mai ia latou kola ne fatoa galue, kae fakaoti ki a latou kola ne ga'lue muamua.’

⁹A latou kola ne fatoa ga'lue i te itula e lima, ne peofu ki te takitasi tupe siliva i te tino.

¹⁰Ka ko te o'maiga a latou kola ne ga'lue muamua ke peofu, e leake eiloa me ka uke atu a te lotou peofuga; kae tagaila e takitasi foki olotou tupe siliva.

¹¹Ne puke olotou 'togi, kae kamata o musu'musu ki te pule, olotou muna,

¹²‘A tagata konei e tasi fua te itula ne ga'lue i ei. Ka ko fakapau ne koe a latou mo matou konei ne fi'ta i te galuega i te aso katoa i te 'vela o te la!’

¹³Ne tali atu a te pule ki te tokotasi o latou, ‘Faka'logo mai e toku taugasoa. E seai soku 'se ki a koe, ka ko koe ne lotomalie eiloa o fai a te galuega i te aso katoa ki te 'togi e tasi a te tupe siliva.

¹⁴Nei, puke tou 'togi kae fano ki tou kaiga. Ko taku pule eiloa e avatu ei ki a ia tenei ne galue fakamuli a te 'togi e pau mo te mea ne avatu ne au ki a koe.

¹⁵Me e pule eiloa au i aku mea. Ai a e fakama'sei ei ou mata ki a au? Ona ko au e alofa?”’

¹⁶ Fai atu ei a Iesu, “Ko latou kola ne muamua ka faka'muli, ka ko latou ne faka'muli ka 'mua.”

¹⁷I te fanoga a Iesu ki Ielusalema, ne ave ne ia ona soko e tinoagafulu mo te tokolua, kae ne faipati atu ki a latou i te lotou sasalega i te auala, ka ko latou ake eiloa.

¹⁸Ana muna ki a latou, “Faka'logo mai, a tatou e olo atu ki Ielusalema, ko tuku atu ei au te Tama a te Tagata ki lima o faitaulaga sili mo faiakoga o te Tulafono. E fakasala ne latou au ki te mate.

¹⁹E tuku atu foki au ki tino o fenua fakaatea. E fakatauemu mai ki a au, e 'kini au, e fakasataulo au, kae i te tolu o aso e toetu mai au mai te mate.”

²⁰Ne vau a te matua o tamaliki tagata a Sepetaio, fakatasi mo ana tama tagata. Ne ifo i mua o Iesu, kae e isi se mea ne fia fesili ei a ia ki a Iesu.

²¹Muna a Iesu ki te fafine, “Se a te mea e manako koe ki ei?” Kae tali mai a ia, “Fai ake sau feagaiga ki aku tama tagata konei e tokolua, ke nofo te sua tino i tou feitu fakaatamai, ka ko te sua tino i tou feitu fakamau i te taimi e fai ei a koe mo Tupu.”

²²Ne tali atu a Iesu ki a latou, “E se iloa ne koutou a te mea tena e fesili mai ei koutou? E a, e mafai ne koulua o inu i te ipu tela ka inu ei au?” Ne tali mai laua, “E mafai ne maua.”

²³Fai atu ei a Iesu ki a laua, “E inu eiloa koulua i taku ipu, ka ko ia tela ka nofo i toku feitu fakaatamai mo ia foki ka nofo i toku feitu fakamaui; e seai la saku pule i ei, na ko latou eiloa ko oti ne fakatoka ne toku Tamana mō latou a te koga tena.”

²⁴I te lagonaga ne soko e tinoagafulu a te mea nei, ko oko eiloa i te lotou kaitaua ki te tautāina konei.

²⁵Tela, kalaga atu ei a Iesu ki a latou katoa, ana muna: “E iloa ne koutou i pule e isi se lotou malosi o pule i tino, a takitaki foki e isi se lotou malosi ia latou o fakatonu a tino.

²⁶ Tenei la, e se tena te auala mō koutou. Kafai se tino ia koutou e manako ke sili a ia, e 'tau mo ia o fai mo tavini a koutou.

²⁷A ia foki tela e fia muamua, ke fai a ia mo pologa a koutou.

²⁸E pela mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola mō tino e tokouke.”

²⁹I te lotou oloatuga mai i Ieliko, ne tau'tali atu ia latou a te vaitino e tokouke.

³⁰E tokolua tagata 'kivi e saga'saga i tafa o te auala. Ne lagona ne laua a Iesu e sasale ake, tela ka'laga mai ei laua: “Te Aliki te Tama a Tavita; a koe ke alofa mai ki a maua!”

³¹Ne 'liko atu a tino ki a laua kae fai atu ke filemu. Ka ko laua ne gasolo ake eiloa o ka'laga malosi, “Te Aliki te Tama a Tavita; a koe ke alofa mai ki a maua!”

³²Ne tu a Iesu kae kalaga atu ki a laua, “Se a te mea e ma'nako koulua ki ei, ke fai ne au mo koulua?”

³³Ne tali mai a laua, “Te Aliki, a maua e manako ke faka'pula ne koe o ma mata.”

³⁴Ko oko eiloa i te alofa o Iesu ki a laua, puke atu ei ki o la mata. I kona foki eiloa, ko te mea eiloa ko kite, tautali atu ei i a ia.