Read Te Tusi Tapu I Te Gana Tuvalu Lomiga Lua MATAIO 21 Bible Online

MATAIO 21 - Te Tusi Tapu I Te Gana Tuvalu Lomiga Lua bible

MATAIO 21

¹Ka ko pili atu latou ki Ielusalema, oko atu ei latou ki Petefake i te mauga o Olive. Tela, uga atu ei ne Iesu ona soko e tokolua ke 'mua,

²kae fai atu ki a laua: “Olo ki te fa'kai tena mai mua. E lavea ne koulua i ei se asini e tukau, mo tena tama foki e tu i ona tafa. 'Tala o aumai ki a au.

³Kafai la e isi se tino e fesili atu ki a koulua, fai la ki ei, ‘E manako ki ei te Aliki,’ ko te mea eiloa ko tuku atu ne ia.”

⁴Ne tupu a te mea tenei, ko te mea ke fakataunu ei a te pati a te pelofeta ne fai:

⁵ “Fai atu ki te fa'kai o Siona: Kiloke, a tou tupu ko vau ki a koe, E loto malalo a ia, kae sopo i te asini, E sopo foki i te tama asini, ko te tama a te asini.”

⁶Tela, muamua atu ei a soko konei e tokolua, kae ne fai katoa ne laua a mea ne fakatonu atu ne Iesu ke fai.

⁷Ne aumai ne laua a te asini mo tena tama, fakatoka ei ne latou olotou gatu ki tua o asini, sopo ake ei a Iesu.

⁸E tokouke a tino ne 'fola olotou gatu i te auala, ka ko nisi tino ne 'fati ne latou a kaula mō 'fola te auala.

⁹A te vaitino kola ne sasale i mua mo tua o Iesu, ne ka'laga penei, “Ke vikia te Tama a Tavita! Ke manuia a ia tela e vau i te igoa o te Aliki! Ke vikia te Atua!”

¹⁰I te okoatuga a Iesu ki Ielusalema, ne ua'te mo tino o te fa'kai katoa, kae fakatau ka'laga penei: “Ko oi te tino tenei?”

¹¹Ne tali mai a tino kola ne o'mai mo Iesu, “Ko Iesu tenei, ko te pelofeta mai Nasaleta i Kalilaia.”

¹²Ne ulu atu a Iesu ki loto i te Fale Tapu, kae ne afuli ne ia ki tua a tino katoa kola ne fakatau mea i ei. Ne 'tule foki ne ia a laulau a tino faka'liu tupe, pela foki mo nofoaga o tino fakatau lupe.

¹³ Ne muna atu a ia ki a latou: “Ko oti ne tusi i te Tusi, i te Atua ne muna mai penei, ‘E taku toku fale ko te fale 'talo.’ Ka ko fai nei ne koutou ke fai mo ana o tino kaisoa!”

¹⁴A tino 'kivi mo tino 'pili ne olo atu ki a ia i te Fale Tapu, fai ei ne ia latou ke 'lei.

¹⁵Ne ita a faitaulaga sili mo faiakoga o te Tulafono i te laveaga ne latou ana galuega fakaofoofogina ne fai. Ne ka'laga foki a tama'liki i loto i te Fale Tapu, kae fai ake olotou pati penei, “Ke vikia te Tama a Tavita!”

¹⁶ Tela, fai mai ei latou ki a Iesu, “E lagona ne koe olotou pati ne fai?” Ne tali atu a Iesu, “Ao, e lagona ne au. Kae e seki faitau eiloa koutou i muna kola ne tusi i tusi, ‘Ko oti ne akoako ne koe a tamaliki mo pepe ke tuku atu ne latou a vikiga tonu ki a koe’?”

¹⁷Ne tuku ne Iesu a latou kae fano ki tua o te fa'kai, oko atu ei ki Petania, moe ei i kona i te po.

¹⁸Ne lagona ne Iesu a te likiliki i te taeao pogipogi, i tena fokiatuga ki te fa'kai.

¹⁹Ne lavea ne ia a te mati i tafa o te auala, fanatu ei a ia ki ei. Matea ake ei ne ia i te mati e se fua, kae ne lau fua e ola mai. Tela, muna atu ei a ia penei ki te lakau, “Ke se toe fua mai eiloa koe” I kona foki eiloa, magemage ei mo te mati.

²⁰Ne lavea ne soko a te mea tenei kae ne ofo latou. Ne fesili atu latou ki a Iesu, “Ai a ne magemage fakavave ei a te mati?”

²¹ Ne tali atu a Iesu penei, “Masaua a te mea tenei! Kafai e fakatuanaki koutou e aunoa mo se fakalotolotolua, e mafai ne koutou o fai a te mea ko oti ne fai ne au ki te mati. E se gata fua i te mea nei, kae e mafai foki ne koutou o muna atu ki te mauga tenei, ‘Masiki koe o tu i te tai,’ e fai eiloa pena.

²²Kafai e fakatuanaki koutou, e maua ne koutou so se mea e fakatagi koutou ki ei i te 'talo.”

²³Ne toe foki mai a Iesu ki te Fale Tapu. Ka koi tuai o akoako ki tino, kae oko mai a faitaulaga sili mo toeaina Iutaia o fesili mai ki a ia, “E a ai te pule e fai ei ne koe a mea konei? Ko oi foki ne avatu ne ia ki a koe a te pule?”

²⁴Ne tali atu a Iesu ki a latou: “E isi foki saku fesili e fia taku atu ki a koutou, ke tali mai ne koutou. Kafai e taku mai ne koutou te tali, ko fakaasi atu ei ne au a te pule e fai ei ne au a mea konei.

²⁵A te papatisoga a Ioane ne maua mai i te Atua me mai i tino?” Ne kamata eiloa latou o fakakinau ia latou eiloa, olotou muna, “Se a te tali a tatou? Kafai e tali atu tatou penei, ‘Mai i te Atua,’ e fai mai a ia, ‘Se a la te mea ne seki talitonu ei koutou ki a Ioane?’

²⁶Kae kafai e fai atu tatou, ‘Mai i tino,’ tatou e ma'taku ki tino i te mea e taofi latou ia Ioane se pelofeta.”

²⁷Tela, tali atu ei a latou ki a Iesu, “E se iloa ne matou.” Muna a Iesu ki a latou, “E se fakailoa atu foki ne au ki a koutou a te pule e fai ei ne au a mea konei.”

²⁸“Se a te otou manatu ki te mea nei? E isi se tagata e tokolua ana tamaliki tagata. Ne fano ki tena tama matua kae fai atu, ‘Toku toe, fano koe o galue i te togavine i te aso nei.’

²⁹Ne tali mai a ia, ‘Ikai, au e se fano,’ kae fakamuli ifo, ne mafuli tena mafaufau, fano ei o galue i te togavine.

³⁰Ne fano foki ki tena sua tama, e pena foki eiloa ana pati ne fai ki a ia, Ne tali mai a ia, ‘Ko 'lei,’ kae ne seki fano.

³¹Ko oi la te tino ia laua ne fai ne ia a te loto o te tamana?” Ne tali mai latou, “Ko te tama matua.” Muna a Iesu ki a latou, “Au e muna tonu atu ki a koutou, me muamua a tino ao lafoga mo fafine tali tagata o ulu atu ki te Malo o te Atua i lo koutou.

³²Me ia Ioane te Papatiso ne vau o fakaasi atu ki a koutou a te auala tonu e 'tau o sasale i ei koutou, kae ne seki talitonu koutou ki a ia; ka ko tino ao lafoga mo fafine tali tagata ne talitonu ki a ia. Ne 'kilo tonu eiloa otou mata ki ei, kae ne seki salamo koutou, io me talitonu ki a ia.”

³³ Muna a Iesu, “Faka'logo mai ki te sua tala fakatusa tenei. E isi se tagata ne fai tena togavine. Ne 'pui ne ia kae keli ne ia se pu mo tuku te mea e 'tau ei a te sua o te vine. Ne faite foki ne ia se fale leoleo maluga e leoleo ei te togavine. Ne tuku atu tena togavine ki tino ga'lue ke tausi ne latou, kae fai malaga ki te sua fenua.

³⁴I te okoga ki aso o te taukai vine, ne uga atu ne ia ana tavini ke olo ki tino kola e tausi ne latou tena togavine, ke maua mai tena tusaga.

³⁵Ne puke ana tavini ne tino galue. Ne 'kini ne latou te sua tino, kae tamate te sua tino, ka ko te sua tino ne peipei ki fatu.

³⁶Ne toe uga atu ne te tagata tena a nisi tavini. Ko tokouke atu ia latou kola ne muamua. Ne fai foki eiloa pena ne tino galue.

³⁷Fakamuli ake, ne uga atu ne ia tena tama mo tena manatu, ‘E faka'logo latou ki taku tama!’

³⁸I te laveaga ne tino ga'lue i te togavine a te tama, fai ake ei olotou muna penei: ‘Tenei te sui tonu, o'mai ke na ta ne tatou, ko te mea ka fai mo tatou te togavine!’

³⁹Tela, puke atu ei latou ki a ia, kae apa ki tua o te togavine, tamate ei ne latou.”

⁴⁰Ne fesili atu a Iesu, “Kafai la ko vau te tino e o ia te togavine, se a tena mea ka fai ki tino ga'lue i te togavine?”

⁴¹Ne tali mai latou, “E tamate eiloa ne ia a tino ma'sei kona, kae tuku atu te togavine ke galue ne nisi tino, tela e maua mai ei sona tusaga i taimi tonu o te taukai vine.”

⁴²Muna a Iesu, “E seki faitau eiloa koutou ki muna a te Tusi? ‘A te fatu ne tiakina ne tufuga fai fale Ko fai nei mo fatu tafasili i te aoga. Ne fai ne te Aliki, Kae se mea fakaofoofogina ki otou mata!’ ”

⁴³Muna a Iesu, “Au e fai atu ki a koutou, i te Malo o te Atua e ave keatea mai ia koutou, kae tuku atu ki se fenua tela e fakaasi mai i ei ne fua 'lei.

⁴⁴So se tino e siga ki luga i te fatu tenei, e fatifati valevale; kae kafai e to te fatu tenei ki luga i se tino, e malukuluku likiliki eiloa a ia.”

⁴⁵Ne lagona ne faitaulaga sili mo Falesaio a tala fakatusa a Iesu; iloa ake ei ne latou ia Iesu e fakasino ana tala fakatusa ki a latou.

⁴⁶Ne ma'nako latou o puke o tamate a Iesu, kae ne ma'taku i te tokoukega o tino e taofi pela ia Iesu se pelofeta.