Read Te Tusi Tapu I Te Gana Tuvalu Lomiga Lua MATAIO 22 Bible Online

MATAIO 22 - Te Tusi Tapu I Te Gana Tuvalu Lomiga Lua bible

MATAIO 22

¹Ne toe faipati atu a Iesu ki a latou i tala fakatusa:

²“A te Malo o te lagi e fakatusa ki te tupu ne fakatoka te 'kaiga o te fakaipoipoga a tena tama.

³Ne uga ne ia ana tavini ke olo o fai ki tino kola ne ami ke o'mai ki te 'kaiga, kae ne se fia o'mai.

⁴Ne toe uga atu ne ia a nisi tavini ke olo atu o fai tena fekau ki tino ami: ‘Fakailoa atu ki tino ami, “Ko toka nei taku 'kaiga, ko oti foki ne ta aku pulumakau 'lasi mo tamā pulumakau putaputa. Tela la, ke na o'mai koutou ki te 'kaiga me ko toka a mea katoa.”’

⁵Ka ko tino ne ami, ne seki 'saga mai ki ei, kae ne olo eiloa o fai olotou galuega. A te sua tino ne fano o galue i tena manafa, ka ko te sua tino ne fano o galue i tena sitoa.

⁶Ka ko nisi ne puke ne latou ana tavini o 'kini kae tamate foki.

⁷Ko oko eiloa i te ita o te tupu, uga atu ei ne ia ana sotia o tamate a tino kona, kae 'sunu te lotou fa'kai.

⁸Ne kalaga atu a ia ki nisi ana tavini, ana muna, ‘Ko toka taku 'kaiga o te fakaipoipoga ka ko se aoga nei mō latou kola ne ami muamua.

⁹Olo nei eiloa ki auala katoa o te fa'kai, o ami mai so se tino e fetaui mo koutou ke vau ki te 'kaiga.’

¹⁰Tela, olo ei tavini konei i auala katoa o te fa'kai o ami mai so se tino e fetaui latou, ko tino 'lei mo tino ma'sei. Ko i takitaki eiloa te fale i tino ami.

¹¹“I te fanatuga a te tupu o kilo ki tino ne ami kola ne o'mai ki te 'kaiga, ne lavea ne ia a te tagata e tokotasi e se pei ki gatu e fakaaoga i 'kaiga o fakaipoipoga.

¹²Ne fesili atu a te tupu ki a ia, ‘Toku taugasoa, ne vau pefea koe ki loto i konei, kae e se fai tou gatu e 'tau mo 'kaiga o fakaipoipoga?’ E seai sena tali ne fai ki te tupu.

¹³ Tela, fai atu ei a te tupu ki ana tavini, ‘Saisai ona vae mo ona lima kae apa ki tua i te pouliga, i te koga tela e iai te fakatau'tagiga mo te gaii o nifo i ei.”’

¹⁴Kae ne fakapalele a pati a Iesu penei, “E tokouke a tino e kalagagina, kae ne mu tino fua e filifiligina.”

¹⁵Ne olo a Falesaio o fai'pati ki se faifaiga ka fakatogafiti ei ne latou a Iesu ki olotou fesili.

¹⁶Ne uga mai ei ne latou a nisi o olotou soko fakatasi mo nisi o te kau a Helota ki a Iesu, ke fai mai ki a ia, “Te Faiakoga, e iloa ne matou ia koe se tino fakamaoni. E akoako atu ne koe a te mea tonu e uiga mō te loto o te Atua ki tino, kae se saga eiloa koe ki manatu o tino, me ia koe e se fakailoga tino.

¹⁷Fakaasi mai nei ki a matou a tou taofi. E tapu i te Tulafono o 'togi lafoga ki a Kaisala me ikai?”

¹⁸Ko iloa ne Iesu olotou togafiti ma'sei, tela muna atu ei a ia ki a latou, “A koutou ne tino 'loi! Ai a e fesili tofotofo mai ei koutou ki a au?

¹⁹Fakaasi mai se tupe e tasi.” Aumai ei ne latou a te tupe.

²⁰Ne fesili atu a Iesu ki a latou, “E oi te ata mo te igoa tenei?”

²¹Ne tali mai latou, “E o Kaisala.” Tela, muna atu ei a Iesu ki a latou, “Ko 'lei la, e tau mo koutou o fai te otou tiute ki te Malo, pela foki mo otou tiute ki te Atua.”

²²I te lagonaga ne latou a pati konei, ko oko eiloa i te lotou ofo. Tuku ei ne latou a Iesu kae olo keatea.

²³ I te aso eiloa tena, e isi ne Satukaio ne o'mai ki a Iesu. Ko latou konei e se talitonu ki te toetu, kae fai mai me e seai se toetu.

²⁴ Olotou muna, “Te Faiakoga, e penei te akoakoga a Mose: ‘Kafai e mate se tagata kae se afu, e 'tau mo tena taina o avaga mo tena avaga, ko te mea ke maua ne tamaliki mō sui te tino tela ne mate.’

²⁵E isi se tautaina e tokofitu. Ne avaga te toekimua kae ne mate se afu, tela tuku atu ei tena avaga ke avaga mo tena taina.

²⁶Ne avaga foki ki ei a te tokolua, te tokotolu ke oko eiloa ki te tokofitu.

²⁷Ka ko te fafine ne mate fakamuli atu.

²⁸Nei la, kafai e oko ki te aso o te toetu, ko oi te tino ia latou e avaga mo ia, me ia latou ne a'vaga katoa ki ei.”

²⁹Kae ne tali atu penei a Iesu ki a latou, “E 'se koutou. E se maina koutou i Tusi io me ko te 'mana o te Atua.

³⁰Me kafai e toe'tu mai a tino e 'pau latou mo agelu i te lagi, e se a'vaga.

³¹Kae e pela mo te toetu; e seki faitau eiloa ne koutou a muna ko oti ne fai atu ne te Atua ki a koutou? Ne fai mai ana muna,

³² ‘Au ko te Atua o Apelaamo, ko te Atua o Isaako mo te Atua o Iakopo.’ Ko tena uiga, a ia ko te Atua o tino ola, kae se se Atua o tino 'mate.”

³³I te lagonaga ne tino ana akoakoga, ne ofo latou i ei.

³⁴Ne maopoopo fakatasi a Falesaio i te lagonaga ne latou i Satukaio ne se mafai o tali a fesili a Iesu.

³⁵E tokotasi o latou, se faiakoga o te Tulafono, ne taumafai o fesili tofotofo ki a Iesu:

³⁶“Te Faiakoga, tefea a te fakatonuga tafasili i te Tulafono?”

³⁷ Ne tali atu a Iesu, “‘E 'tau mo koe o alofa ki te Aliki tou Atua mo tou loto katoa, mo tou agaga katoa, mo tou mafaufau katoa.’

³⁸Tena te tulafono tafasili mo te aoga.

³⁹ Ko te lua o tulafono tafasili i te aoga tenei: ‘E 'tau mo koe o alofa ki tou tuakoi e pela eiloa mo koe ki a koe.’

⁴⁰ A te katoatoaga o te Tulafono a Mose mo akoakoga a pelofeta, e fakavae i luga i tulafono konei e lua.”

⁴¹I te taimi ne maopoopo ei fakatasi a Falesaio, ne fesili atu a Iesu ki a latou:

⁴²“Se a te otou taofi e uiga ki te Keliso? E oi te gafa ne tupu mai ei a ia?” Ne tali mai latou, “Ko te gafa o Tavita.”

⁴³Ne toe fesili atu foki a Iesu penei, “Ai a la ne fai ei ne te Agaga Tapu a Tavita ke taku ne ia a te Keliso ko tena Aliki? Me e penei a muna a Tavita,

⁴⁴ ‘A te Aliki ne faipati ki toku Aliki: Nofo i toku feitu fakaatamai, Ke oko ki te taimi e fai ei ne au ou fili mo mea e tuku ei ou vae.’

⁴⁵Kafai Tavita ne taku ne ia a te Keliso ko tena Aliki, e mafai la pefea o fai mai koutou i te Aliki ne tupu mai i te gafa o Tavita?”

⁴⁶E seai eiloa se tino ne mafai ne ia o tali atu ki a Iesu. Ne fakagata mai foki eiloa i te aso tena a te lotou fia fesili ki a Iesu.