Read Te Tusi Tapu I Te Gana Tuvalu Lomiga Lua MATAIO 23 Bible Online

MATAIO 23 - Te Tusi Tapu I Te Gana Tuvalu Lomiga Lua bible

MATAIO 23

¹Tela, faipati atu ei a Iesu ki tino mo ona soko:

²“A faiakoga o te Tulafono mo Falesaio, ko latou kona e fakamatala ne latou a te Tulafono a Mose.

³Tela la, e 'tau mo koutou o tau'tali kae faka'logo ki mea katoa e fakatonu atu ne latou ke fai; kae mo a la ma fakaakoako koutou ki olotou amioga. E akoako ne latou a tino ke tausi te Tulafono, kae se tausi ne latou.

⁴E fakaeke foki ne latou amoga 'mafa kae saisai ki tua o tino, kae e se mafai lele eiloa ne latou o fakapatele atu se maikao e tasi ki amoga kona.

⁵ A mea katoa a latou e fai, e fai fua ke kilo'kilo atu a tino ki ei. E lavea ne koutou a te 'lasi o mea kola e tusi i ei a foaiupu o te Tulafono kae faka'piki i olotou lae mo lima. E matea foki ne koutou te 'loa olotou gatu.[19]

⁶E fia 'nofo foki i nofoga sili i 'kaiga mo fale tapuaki.

⁷E ma'nako foki latou ke fakaaloalogina ne tino i potopotoga, kae ke taku foki latou ne ‘Faiakoga’.

⁸E se 'tau koutou o taku katoa ki ‘Faiakoga’, me ia koutou ne taina, kae tokotasi fua te otou Faiakoga.

⁹Kae mo a foki koutou e fakaigoa ne koutou se tino e tokotasi i te lalolagi nei ki te ‘Tamana’, me e tokotasi fua te otou Tamana tela i te lagi.

¹⁰Ke mo a foki e fakaigoa koutou ko ‘Takitaki’, me e tokotasi fua te otou takitaki ko te Keliso.

¹¹ A te tino maluga ia koutou, ko te otou tavini tena.

¹² A te tino e fia maluga e fakamalalogina, ka ko te tino e fia malalo e fakamalugagina.”

¹³“Kalofa eiloa ia koutou faiakoga o te Tulafono mo Falesaio! A koutou ne tino 'loi. Ko 'pono ne koutou a te mataloa o te Malo o te lagi i mata o tino, kae se olo koutou ki loto, kae taumafai foki o taofi ne koutou a tino kola e fia ulu ki loto.[20]

¹⁴“Kalofa eiloa ia koutou faiakoga o te Tulafono mo Falesaio! A koutou ne tino 'loi. E fakaloiloi ne koutou a fafine ko 'mate olotou avaga, e puke malo foki ne koutou olotou koloa, kae 'talo fakaloa'loa foki. Mai i otou faifaiga kona, ko na gasolo ei o 'mafa te otou fakasalaga.

¹⁵“Kalofa eiloa ia koutou faiakoga o te Tulafono mo Falesaio! A koutou ne tino 'loi. Ne faimalaga koutou i te moana mo te laukele, ke 'liu mai se tino ki a koutou. Kafai ko maua mai se tino, kalofa eiloa i te tino tena, me ko fai ne koutou a ia ke sili tena malaia i Kena i lo koutou.

¹⁶“Kalofa eiloa ia koutou takitaki 'kivi! Ne fai mai koutou, ‘E se fusifusia a te tino e tauto ki te Fale Tapu, kae fusifusia a te tino e tauto ki te aulo i loto i te Fale Tapu.’

¹⁷Tino 'supa mo te 'kivi! Tefea e sili atu i te aoga; ko te aulo io me ko te Fale Tapu tela e faka'mana ne ia a te aulo?

¹⁸Ne fai mai foki koutou, ‘E se fusifusia se tino e tauto i te fata faitaulaga, kae fusifusia a te tino e tauto ki te taulaga i luga o te fata faitaulaga. ’

¹⁹Tino 'supa kae 'kivi! Tefea te mea e sili atu tena aoga, ko te taulaga io me ko te fata tela e faka'mana ne ia a te taulaga?

²⁰Tela la, kafai se tino e tauto i te fata faitaulaga, e tauto foki a ia ki te fata mo mea katoa i ei.

²¹Kae kafai se tino e tauto ki te Fale Tapu, e tauto ki ei, e tauto foki ki te Atua tela e nofo i ei.

²² Kafai foki se tino e tauto ki te lagi, e tauto a ia ki te nofogaaliki o te Atua tela e nofo i ei.

²³ “Kalofa eiloa ia koutou faiakoga o te Tulafono mo Falesaio! A koutou ne tino 'loi. E tuku atu ne koutou ki te Atua te tasi vae sefulu o fuataga o lakau fo'liki, e pela mo te mili, pekano, mo nisi lakau ake, ka ko tiakina ne koutou a feitu aoga o akoakoga mai i te Tulafono, e pela mo te fai mea tonu, te alofa mo te fakamaoni. E 'tau mo koutou o fai a mea konei, kae mo a foki ma se fai a nisi mea.

²⁴Takitaki kivi! E sili te manatu 'mafa o koutou ki agasala fo'liki, kae manatu mama ki agasala 'lasi.

²⁵“Kalofa eiloa ia koutou faiakoga o te Tulafono mo Falesaio! A koutou ne tino 'loi. E 'fulu ne koutou a te tua o te ipu mo te tifa, ka ko te koga i loto e fonu i mea ne puke malo mo te amio masei.

²⁶A koe e te Falesaio kivi! 'Mulu taumua a mea kola i loto o te ipu ke 'ma, ka oti ko 'mulu ei i tua.

²⁷ “Kalofa eiloa ia koutou faiakoga o te Tulafono mo Falesaio! A koutou ne tino 'loi. A koutou e pau eiloa mo ne tanuga ne fakakena ke gali mai tua, ka ko loto e 'fonu i ivi o tino 'mate mo mea ma'sei.

²⁸E pena foki eiloa a koutou; e kilo'kilo atu a tino ki a koutou i tua, e foliga amiotonu mai, ka ko loto o koutou e 'fonu i te loi mo te amio masei.”

²⁹“Kalofa eiloa ia koutou faiakoga o te Tulafono mo Falesaio! A koutou ne tino 'loi. Ne faite ne koutou a tanuga o pelofeta, kae fakagaligali foki ne koutou a fatu fakamanatu o tino kola ne ola mo te amiotonu.

³⁰Kae ne muna mai foki koutou, ‘Moi fai ko matou ne ola i te taimi ne ola ei omotou tupuga, e se fai eiloa ne matou a mea kola ko oti ne fai ne latou mo te tamatega o pelofeta!’

³¹Tela la, ko fakaasi tonu mai ne koutou ia koutou ko mokopuna o latou kola ne tamate ne latou a pelofeta!

³²Ke fakapalele la ne koutou a te mea ne kamata ne otou tupuga!

³³ A koutou ne gata, ko tama foki a gata ma'sei. A koutou e taofi pela me 'sao koutou mai te fakasalaga o Kena?

³⁴Au e muna atu ki a koutou: e uga mai ne au ki a koutou ne pelofeta, ne tagata 'poto mo faiakoga; e tamate ne koutou a nisi o latou, kae fakasataulo foki a nisi o latou, e 'kini foki a nisi i otou fale tapuaki, kae tulituli foki ne koutou a latou mai te sua fa'kai ki te sua fa'kai.

³⁵ E paku tonu ki luga ia koutou a te taui mō te tamatega o tino e seai ne olotou 'se, e kamata mai i te tamatega o Apelu ke oko ki te tamatega o Sakalia, te tama a Palakaio tela ne tamate ne koutou i te va o te Fale Tapu mo te fata faitaulaga.

³⁶Au e fai atu ki a koutou: a te fakasalaga e uiga mo mea konei, e paku tonu ki luga i te kautama tenei!”

³⁷“Ielusalema, Ielusalema! Ne tamate ne koe a pelofeta, kae peipei ki fatu a ave fekau a te Atua ne uga atu ki a koe! Ko uke a taimi ne manako au o fakapulupulu koutou ki oku lima, e pela eiloa mo se moa fafine e fakapulupulu ana tama ki ona kapakau, kae ne seki talia ne koe au!

³⁸ Nei la, e maofa valevale te otou fenua.

³⁹ Au e fai atu ki a koutou, e kamata mai i te taimi tenei, e se toe lavea ne koutou au, ke oko eiloa ki te taimi e fai ake ei koutou penei, ‘Ke manuia a ia tela e vau i te igoa o te Aliki.”’