Read Te Tusi Tapu I Te Gana Tuvalu Lomiga Lua MATAIO 24 Bible Online

MATAIO 24 - Te Tusi Tapu I Te Gana Tuvalu Lomiga Lua bible

MATAIO 24

¹Ne ulu ki tua a Iesu mai te Fale Tapu, kae ne o'mai ona soko o fakaasi mai ki a ia a fale fakaoso o te Fale Tapu.

²Ne muna atu a Iesu ki a latou, “E lavea ne koutou a mea katoa konei? Au e fai atu ki a koutou: e seai se fatu o fatu konei e toe 'piki i te koga nei e ofa katoa ki lalo.”

³I te taimi ne nofo ei a Iesu i te mauga o Olive, ne o'mai ona soko, ko latou ake eiloa, o fesili mai ki a ia, “Fakaasi mai ki a matou me e fakataunu afea a mea konei? Ne a foki a fakailoga e iloa ei tou foki mai mo te gataga o te lalolagi?”

⁴Ne tali atu a Iesu, “Ke fakaeteete koutou, ia koutou ma faka'se ne se tino.

⁵Me e tokouke a tino e o'mai i toku igoa, kae fakaloiloi ne latou a te tokoukega o tino ki te muna tenei, ‘Au ko te Keliso!’

⁶E lagona ne koutou a taua mo tala o taua; kae sa ma'taku koutou. E 'tau o 'tupu a mea pena ka koi tuai o oko ki te gataga o te lalolagi.

⁷E fai taua te sua fenua ki te sua fenua, mo te sua malo ki te sua malo. E oko mai a oge mo mafuie i koga katoa.

⁸A mea katoa konei ko te kamataga o puapuaga.

⁹ “E puke fakapagota koutou ne tino o ave o fakasala, kae tamate foki. E takalia'lia a fenua katoa ki a koutou, ona ko toku igoa.

¹⁰I te taimi tena, e tokouke a tino e tiakina te lotou talitonuga; e faitogafiti te sua tino ki te sua tino, kae e se fiafia foki te sua tino ki te sua tino.

¹¹E tokouke a pelofeta 'loi e 'tu mai o fakaloiloi a tino e tokouke.

¹²A mea kona e fai ne latou ke na gasolo ei o se a'lofa kae amio ma'sei a tino.

¹³ Ka ko te tino e loto mau ke oko ki te ikuga, e ola eiloa a ia.

¹⁴A te Tala 'Lei tenei e uiga ki te Malo, e fakamatala atu ki te lalolagi katoa, mo fai te molimau ki tino katoa; ko oko mai ei te gataga.”

¹⁵“E lavea ne koutou a te ‘Mea Fakamataku,’ tela ne faipatigina ne te pelofeta ko Tanielu, e tu i te koga tapu.”Ke malamalama i te tino faitau a te uiga o te mea tenei!

¹⁶“Ko tino kola e 'nofo i Iutaia, e 'tau o 'tele ki mauga.

¹⁷ Ko te tino tela e i luga i te tuafale, ke se fanaifo o ave se mea mai i tena fale.

¹⁸Ko te tino tela e i te vao, ke se foki o aumai sona gatu.

¹⁹Kalofa eiloa i fafine fai'tama mo matua kola koi faū olotou pepe manafai e oko mai aso kona.

²⁰'Talo ki te Atua ko te mea ke se tupu a te mea nei i aso o afā io me ko te Sapati!

²¹Me i te fakalavelave e tupu i te taimi tena, e tafa sili i te masei i fakalavelave katoa ko oti ne 'tupu mai i te kamataga o te lalolagi, ke oko mai eiloa ki te aso tena. E seai foki eiloa se fakalavelave pena e toetupu.

²²Moi ne seki fakamutana aso kona ne te Atua, penei e seai se tino e sao. Ne fakamu'tana aso kona ona ko tino filifilia a te Atua.

²³“Tela la, kafai e isi se tino e fai atu ki a koutou penei, ‘Kiloke, tenei te Keliso!’ io me fai atu pela, ‘Tela te Keliso!’ Sa talitonu ki a ia.

²⁴Me e oko mai a Keliso 'loi mo pelofeta 'loi; e fai ne latou ne fakailoga 'lasi mo mea fakaofoofogina mō fakaloiloi a tino ko oti ne filifiligina ne te Atua, manafai e mafai ne latou o fai pena.

²⁵Kiloke! Ko fakailoa fakavave atu ne au a te mea nei ki a koutou, ka koi tuai o oko mai ki tena taimi.

²⁶ “Kae kafai e muna atu a tino ki a koutou penei, ‘Kiloke, a te Keliso tela i te vao!’ Sa olo ki ei; io me muna mai latou pela, ‘Kiloke, a te Keliso tenei e 'muni i konei!’ Sa talitonu ki ei.

²⁷Me i a au te Tama a te Tagata e vau pela mo se uila e lapa i te lagi katoa, mai i te sopogala ki te togala.

²⁸ “Ko te koga e takato i ei se foitino mate, e 'luku ki ei aeto.”

²⁹ “Mai tua ifo o aso kona a te la e pouli, a te masina e se maina. A fetu e tatela ifo mai te lagi, mo mea ma'losi o te lagi e gasue'sue.

³⁰ I te taimi tena, e lavea atu i te lagi a te fakailoga o te Tama a te Tagata; ko te taimi foki tena, e 'tagi mautuutu a tino katoa i te lalolagi, kae e lavea ne latou a te Tama a te Tagata e fanaifo i kaumana o te lagi i te 'mana mo te 'malu lasi.

³¹E fakatagi a te pu lasi, kae e uga atu ne ia ana agelu ki tulimanu e fa o te lalolagi, o 'tae mai ne latou ana tino filifilia mai te sua kapakapalagi ki te sua kapakapalagi.”

³²“Mafaufau ki te mati mo ona uiga. I te taimi e lavea ei ne koutou ona kaula ko ola ake mo ona lau foki ko 'somo, ko iloa ei ne koutou me ko pili mai aso 'vela.

³³E pena foki koutou, i te taimi e lavea ei ne koutou a mea katoa konei, ke iloa ne koutou i te Tama a te Tagata ko pilipili mai eiloa.[21]

³⁴Ke masaua foki ne koutou a te mea tenei, me i mea katoa konei, e fakataunu ka koi tuai o palele atu a te kautama tenei.

³⁵E palele atu foki te lagi mo te lalolagi, ka ko aku muna e mautakitaki eiloa.”

³⁶“E seai se tino i te lalolagi io me se agelu i te lagi e iloa ne ia a te aso tena mo te itula tena. E pena foki a te Tama,[22] kae na ko te Tamana fua e tokotasi e iloa ne ia.

³⁷ A te oko mai o te Tama a te Tagata, e pela mo te mea ne tupu i aso o Noa.

³⁸E pela mo mea ne fai ka koi tuai o poko te lolo. A tino e 'saga eiloa o 'kai kae inu, kae fakatau a'vaga valevale foki, ke oko eiloa ki te aso ne ulu ei a Noa ki loto i tena vaka.

³⁹ Ne seki iloa ne latou a mea ne 'tupu ke oko ki te pokoga o te lolo tela ne tapea'pea ei a latou katoa. E pena foki i te taimi e vau ei a te Tama a te Tagata.

⁴⁰I te taimi tena, e tokolua tagata e ga'lue i te vao: e tokotasi e ave, kae tokotasi e tuku.

⁴¹E tokolua fafine tuki saito i te koga tuki saito; e tokotasi e ave, kae tokotasi e tuku.

⁴²Tela la, ke matapula'pula koutou me se iloa ne koutou me tefea te aso e vau ei te otou Aliki.

⁴³ Ke masaua ne koutou a te mea nei! Kafai te pule o te kaiga e iloa ne ia a te taimi o te po e vau saale i ei a te tino kaisoa; e alaala faeloa a ia ke mo a e vau a te tino kaisoa ki loto i tena fale.

⁴⁴Tela la, e 'tau koutou o toka me i te Tama a te Tagata e vau i te itula tela ne seki fakatali'tali koutou ki ei.”

⁴⁵“Ko oi te tavini fakamaoni kae poto? Ko ia tela ko oti ne fili ne tena pule ke pule i nisi tavini, kae fakasoa atu foki ne ia olotou meakai i te taimi tonu.

⁴⁶Amutia a te tavini tena, manafai e foki mai tena pule e galue faeloa a ia.

⁴⁷Au e fai tonu atu ki a koutou, a te pule e fili ne ia a te tavini tena, ke pule i ana mea katoa.

⁴⁸Kae kafai a ia se tavini se fakamaoni, e fai ake ana pati penei, ‘E se taitai nei o oko mai a toku pule.’

⁴⁹Tela, kamata ei a ia o 'kini a isi tavini, kae 'kai kae inu fakatasi mo tino kola e inu eiloa ke ko'na.

⁵⁰A te pule o te tavini tena, e vau eiloa i te aso ne seki fakamoemoe a ia ki ei, mo te itula foki tela e se iloa ne ia;

⁵¹e 'kati likiliki a ia ne tena pule,[23] kae fakasala fakatasi mo tino faitogafiti, i te koga tela e iai te fakatautagiga mo te gaii o nifo.”