Read Te Tusi Tapu I Te Gana Tuvalu Lomiga Lua MATAIO 25 Bible Online

MATAIO 25 - Te Tusi Tapu I Te Gana Tuvalu Lomiga Lua bible

MATAIO 25

¹ “I te aso tena, e fakatusa a te Malo o te lagi ki tamafine e tinoagafulu kola ne olo atu mo olotou moli, o fakafetaui ki te tamatane fatoa fakaipoipo.

²E va'lea te sua tokolima, kae 'poto te sua tokolima.

³A tamafine va'lea ne olo fua mo moli, kae e seai ne olotou kalasini fakaleoleo ne ave.

⁴Ka ko tamafine 'poto ne olo mo olotou moli, kae ne ave foki olotou kalasini o fakaleoleo.

⁵Ko tuai mai te tagata fatoa fakaipoipo; tela matule'tule ei a tamafine i te fia 'moe, 'moe atu eiloa.

⁶“Ko oko ki te valuapo, ne 'pa mai te kalaga, ‘ko oko mai te tagata fatoa fakaipoipo! O'mai o fakafetaui ki ei!’

⁷Ne ala ake te tinoagafulu tamafine konei, kae fakatoka olotou moli o fa'ka.

⁸Ne akai atu a tamafine va'lea ki tamafine 'poto, ‘Fakamolemole, aumai mua ne otou kalasini mo utu omotou moli ka 'masa.’

⁹Ne tali mai tamafine 'poto, ‘Ikai, e se mafai me se lava mo kalasini mō tatou; kae sili ke olo koutou o 'togi ne otou kalasini i te sitoa.’

¹⁰Tela, olo atu ei tamafine va'lea o 'togi kalasini. Ka koi 'galo atu eiloa latou, kae oko mai te tagata fatoa fakaipoipo. A tamafine 'poto ne ulu fakatasi mo te tagata ki te 'kaiga o te fakaipoipoga, 'pono ei te mataloa.

¹¹ “E se leva, kae oko mai a tamafine va'lea, kae ka'laga atu, ‘Te aliki, te aliki! 'Tala mai ake te mataloa ke ulu atu a matou ki loto!’

¹²Ne tali mai a te tagata fatoa fakaipoipo, ‘Au e fai atu ki a koutou, e se iloa eiloa ne au a koutou.’

¹³Tela la, ke matapula'pula koutou, me se iloa ne koutou tena aso mo tena taimi.”

¹⁴ “I te aso foki tena, a te Malo o te lagi e pela mo te tagata ne fai o fano tena malaga, kalaga atu ei ki ana tavini kae tuku ki a latou ana mea ke tausi.

¹⁵Ne tuku atu ne ia ki a latou takitokotasi e fakatau ki te mea e mafai ne te tino o tausi. E sefulu afe talā ki te sua tino, ka ko te sua tino e fa afe talā, kae ki te sua tino e lua afe talā. Oti, fano ei tena malaga.

¹⁶A te tavini tela ne tuku atu ki a ia a te sefulu afe talā, ne fakagalue ne ia a te tupe, maua mai ei te sua sefulu afe talā.

¹⁷Ne fai foki pena ne te tavini ne maua ne ia te fa afe talā, ne toe maua foki ne ia a te sua fa afe talā.

¹⁸Ka ko te tavini tela ne tuku ki ei a te lua afe talā, ne fano o keli te lua mo 'funa a te tupe a tena pule i ei, tausi ei ne ia.

¹⁹“Ko leva eiloa te galoga o te pule foki mai ei, fakamasino ei ne ia ana tupe ne tuku ki ana tavini.

²⁰A te tavini tela ne tuku ki a ia a te sefulu afe talā, ne vau mo te luasefulu afe, ana muna, ‘Toku pule, tenei te luasefulu afe talā. E sefulu afe ne aumai ne koe ki a au, ka ko te sua sefulu afe talā ne maua i te fakagaluegaga ne au o te tupe.’

²¹Ne fai atu a tena pule ki a ia, ‘Fakafetai, ko oko eiloa i te 'lei. A koe se tavini 'lei kae fakamaoni. Ne fakamaoni koe i te tausiga o mea foliki, nei ko tuku atu ne au koe ke pule i mea e uke; ulu mai la ki loto ke fia'fia tasi taua!’

²²Ne vau foki te tavini tela ne tuku atu ki a ia a te fa afe talā, ana muna, ‘Te Aliki, tenei te fa afe talā ne aumai ne koe ki a au. Tenei foki te sua fa afe talā ne maua ne au i te fakagaluegaga ne au tau tupe.’

²³Ne fai atu a tena pule ki a ia, ‘Fakafetai, ko oko eiloa i te 'lei. A koe se tavini 'lei kae fakamaoni. Ne fakamaoni koe i te tausiga o mea foliki, nei la ko tuku ne au koe ke pule i mea e uke; ulu mai la ki loto ke fia'fia tasi taua!’

²⁴Ne vau foki ki loto a te tavini tela ne tuku atu ki ei a te lua afe talā, ana muna, ‘Toku pule, e iloa ne au ia koe se tagata faigata. E 'kati ne koe a saito kola e seki toki ne koe, kae tau foki ne koe a fuaga o lakau e seki toki ne koe.

²⁵Tela la, ne tanu ne au a tau tupe o 'funa ia au ne mataku ia koe. Tenei la tau tupe ne tuku mai.’

²⁶Kae ne tali atu a tena pule ki a ia, ‘A koe se tavini masei kae paie! Ne iloa ne koe me e 'kati ne au a saito kola e seki toki ne au, kae tau foki ne au a fuaga o lakau e seki toki ne au?

²⁷Ne 'tau eiloa koe o teu taku tupe i te fale teutupe, ko te mea ke maua ne au a te tupe mo tena pasene, manafai e foki mai au.

²⁸Tela la, 'fao ne koutou a te tupe tena mai i a ia, kae tuku atu ki te tavini tela e i a ia te luasefulu afe talā.

²⁹Ko tino kola e uke olotou mea, e fakaopoopo ke uke atu. Ka ko tino kola e seai ne olotou mea, kae ne mo mea fua, e ave eiloa keatea mai ia latou.

³⁰ Ke apa ne koutou a te tavini se aoga tenei ki tua i te pouliga, ki te koga tela e iai te fakatautagiga mo te gaii o nifo.”’

³¹ “Kafai e vau au te Tama a te Tagata i toku 'malu fakatupu, e o'mai matou mo aku agelu katoa, ko nofo ei au i toku nofogaaliki.

³²E tu au i mua o tino katoa o te lalolagi, o 'vae ne au ki vaega e lua, e pela mo te tausi mamoe e 'vae keatea ne ia a mamoe mai kouti.

³³E tuku ne au a mamoe ki toku feitu fakaatamai, ka ko kouti ki toku feitu fakamaui.

³⁴Tela la, ko fai atu ei au ko te tupu ki tino i toku feitu fakaatamai, ‘O'mai, ia koutou ko oti ne fakamanuiagina ne toku Tamana, ke fai mo koutou a te malo ne fakatoka mo koutou mai te kamataga o te lalolagi.

³⁵Me ia au ne fiakai, kae ne fagai au ne koutou. Au foki ne fia inu, kae ne fainu au ne koutou. Ne fakaalofa foki au, kae ne alofa mai koutou ki a au.

³⁶Ne seai ne oku gatu, kae ne aumai ne koutou oku gatu. Ne masaki au, kae ne tausi mai foki koutou ki a au. Ne i te fale puipui foki au, kae ne asiasi mai koutou ki a au.’

³⁷Ne tali mai a tino amiotonu ki a au, ‘Te Aliki, ko anafea ne iloa ei ne matou ia koe ne fia kai, kae avatu ne matou a meakai, io me ne fia inu, kae avatu ne matou a meainu?

³⁸Ko anafea foki ne iloa ei ne matou ia koe se fakaalofa, kae atafai atu ki a koe, io me ko te seai ne ou gatu kae ne avatu ne matou ne gatu?

³⁹Ko anafea foki ne iloa ei ne matou ia koe ne masaki, kae tausi atu matou, io me ne falepuipui koe, kae asiasi atu matou?’

⁴⁰Ka tali atu au te Tupu ki a latou, ‘Au e taku tonu atu ki a koutou, so se mea ne fai ne koutou ki se tokotasi o oku taina konei e se taulia, ko au tena ne fai ne koutou ki ei!’

⁴¹“E fai atu foki a au ki tino i toku feitu fakamaui: ‘Olo keatea koutou mai i a au, ia koutou ne tino malaia. Olo atu ki te afi se gata mai tela ne fakatoka mo te Tiapolo mo ana agelu;

⁴²me i a au ne fia kai, kae seki fagai ne koutou, ne fia inu, kae ne seki fainu ne koutou.

⁴³Ne fakaalofa, kae ne seki alofa mai koutou. Ne seai ne oku gatu, kae ne seki aumai ne koutou ne gatu. Au ne masaki, kae ne seki tausi mai koutou. Ne falepuipui foki au, kae ne seki asiasi mai koutou.’

⁴⁴Ka tali mai latou, ‘Te Aliki, ne lavea ne matou anafea koe ne fia kai, io me ne fia inu, io me ne fakaalofa, io me ne seai ne ou gatu, io me ne masaki, io me ne falepuipui foki, kae ne seki fesoasoani atu matou ki a koe?’

⁴⁵Kae ka tali atu au te Tupu ki a latou, ‘Au e fai tonu atu ki a koutou, e pela mo te se fai ne koutou se fesoasoani ki se tokotasi o latou konei e se taulia, ko au tena ne seki fai ne koutou ki ei.’

⁴⁶ Ko olo atu ei latou ki te fakasalaga se gata mai, ka ko tino amiotonu e olo atu ki te ola se gata mai.”