Read Te Tusi Tapu I Te Gana Tuvalu Lomiga Lua MATAIO 27 Bible Online

MATAIO 27 - Te Tusi Tapu I Te Gana Tuvalu Lomiga Lua bible

MATAIO 27

¹I te aoakega, ne fai a te fono a faitaulaga sili katoa mo toeaina Iutaia, ke tamate a Iesu.

²Ne saisai ne latou a Iesu kae takitaki atu ne latou o tuku atu ki a Pilato te Kovana.

³ I te iloaga ne Iuta te fakalata i a Iesu ko fakasala, ne salamo ki tena mea ne fai, fakafoki ei ne ia a tupe siliva e tolu sefulu ki faitaulaga sili mo toeaina.

⁴Ne muna atu a Iuta ki a latou, “Au ko agasala i te fakalataga o te tino e seai sona 'se.” Ne muna mai latou, “E seai se motou fekau i ei, kae faitalia eiloa koe!”

⁵Ne lafo ne ia a tupe ki loto i te Fale Tapu, tuku ei ne ia latou, kae fano o noaua.

⁶Ne puke ne faitaulaga sili a tupe, kae fai ake, “E tapu ma tuku a tupe konei ki te fakaputuga o koloa o te Fale Tapu, i te mea ko te 'togi o te toto.”

⁷Ne fai te lotou fono ki te fakaaogaga o te tupe, iku ei ia latou ke 'togi te manafa o te tino fai ipu kele mo fai te tanu o tino o fenua fakaatea.

⁸Tena te pogai ne fakaigoa ei a te manafa tenei ke oko mai ki aso nei, ko te “Laukele o te Toto”.

⁹ Tela la, ko tonu ei a muna a te pelofeta ko Ielemia ne fai: “Ne puke ne latou a tupe siliva e tolu sefulu, ko te aofaki ne loto ki ei a tino Isalaelu o 'togi ki a ia,

¹⁰ne fakatau foki ne latou a te manafa o te tino fai ipu kele, e pela eiloa mo muna a te Aliki.”

¹¹Ne tu a Iesu i mua o te kovana, fesili mai ei a te kovana ki a ia, “A koe ko te tupu o tino Iutaia?” Ne tali atu a Iesu, “Tena eiloa ne fai mai ne koe.”

¹²Ka ko te mau a faitaulaga sili mo toeaina, e seai eiloa sena tali ne fai ki ei.

¹³Muna a Pilato ki a ia, “E a, e se lagona ne koe a mau e uke e 'tu ki a koe?”

¹⁴Kae ne ita a Iesu o tali se muna e tasi; tela la, ko oko eiloa i te ofo o te kovana.

¹⁵I Paseka takitasi, e masani a te kovana o fakasaoloto atu se pagota e tokotasi tela e loto ki ei a tino.

¹⁶I aso kona e isi se pagota takutakua i te masei e igoa ki a Iesu Palapa.

¹⁷I te maopoopomaiga o tino, ne fai atu ei a Pilato ki a latou, “Ko oi te tino e loto ki ei koutou ke fakasaoloto atu ne au ki a koutou: ko Palapa me ko Iesu te Keliso?”

¹⁸Me ko iloa 'lei ne ia me ko te loto masei fua ne 'moli mai ei ne latou a ia.

¹⁹Ka koi sagasaga a Pilato i te nofoga fakamasino, ne oko mai ki a ia a te fekau mai tena avaga: “Mo a eiloa ma fai ne koe se mea ki te tagata amiotonu tena, me ko oko eiloa i te se toka o toku loto i taku moemiti e uiga mo ia i te po.”

²⁰I te taimi tena, ne fakamalosi ne faitaulaga sili mo toeaina a tino ke fai atu ki a Pilato, ke 'tala mai Palapa kae ke tamate a Iesu.

²¹Ne toe fai atu a te kovana ki a latou, “Ko oi te tino ia laua nei e ma'nako ki ei koutou ke fakasaoloto atu?” Ne tali mai a latou, “Ko Palapa!”

²²Muna a Pilato ki a latou, “Kae se a nei taku mea ka fai ki a Iesu te Keliso?” Ne muna mai latou katoa, “Fakasataulogina!”

²³Ne toe fesili atu a Pilato ki a latou, “Ai a? Se a tena agasala ne fai?” Ka ko na kalaga ake ei latou, “Fakasataulogina.”

²⁴ I te iloaga ne Pilato me ko seai se aoga o ana muna, ka ko kamata o tupu te fakalavelave, 'fano ei ona lima i mua o te vaitino, kae fai atu, “Au e 'ma i te toto o te tagata tenei: faitalia eiloa koutou!”

²⁵Ne tali mai a tino katoa, “Ke i luga ia matou mo omotou fanau tena toto!”

²⁶Fakamuli ake, ne fakasaoloto atu a Palapa ne Pilato ki a latou, kae 'kini ne ia a Iesu, tuku atu ei a ia ke fakasataulo.

²⁷Ne ave a Iesu ne sotia ki te fale o te kovana, kae 'luku atu ki ei a te kautau katoa.

²⁸Ne tapale fakamasei ne latou ona gatu, kae fakapei ki te gatu kula ko te gatu o te tupu.

²⁹Ne 'fili foki ne latou a te fou ki lakau makaikai kae tuku ki tena ulu, tuku atu ei foki ne latou ki ei te tokotoko. Ne totuli latou i ona mua kae fakatauemu ki ei, olotou muna: “Ke manuia a te Tupu o tino Iutaia!”

³⁰Ne puapuaki latou ki a ia, kae pago foki ne latou tena ulu ki te lakau.

³¹I te otiga foki ne fakatauemu latou ki a ia, ne tata ne latou a te gatu lasi, kae fakapei ki ona gatu tonu eiloa. Oti, takitaki atu ei a ia ki tua o te fa'kai o fakasataulo i ei.

³²Ka koi sasale atu latou ki tua o te fa'kai, ne fetaui latou mo Simona te Kulene. Ne fai malo ne latou a ia ke amo te sataulo o Iesu.

³³Ne oko atu latou ki te koga e igoa ki a Kolokota, ko tena uiga, “Ko te koga o Gatiulupoko.”

³⁴Ne tuku atu foki ne latou ki a ia a te uaina e palu tasi mo te lakau 'kona ke inu. Ne tami ki ei, kae seki inu ki ei.

³⁵ Ne fakasataulo ne latou a Iesu, kae ne fai ne latou te vili mo tufa a gatu o Iesu ia latou eiloa.

³⁶Mai tua ifo, ne sagasaga ei latou i kona o leoleo a Iesu.

³⁷Mai i luga i tena ulu, ne tuki ne latou a te faka'pulaga e uiga ki te sala ne 'moli ei a ia ki te fono: “Ko Iesu tenei, ko te Tupu o tino Iutaia.”

³⁸Ne fakasataulo foki ne latou a pagota e tokolua fakatasi mo Iesu. E tokotasi i tena feitu fakaatamai, kae tokotasi i tena feitu fakamaui.

³⁹ A tino foki kola ne solo ake i kona ne tugakigaki olotou ulu, kae fakatauemu ki a Iesu penei:

⁴⁰ “Ne ofa ne koe a te Fale Tapu, kae toe faite i aso e tolu! Fakaola la koe ne koe eiloa, manafai ko koe te Tama a te Atua! Fanaifo la ki lalo!”

⁴¹Ne fakatauemu foki ki a ia a Faitaulaga Sili mo faiakoga o te Tulafono mo toeaina penei:

⁴²“Ne fakaola ne ia nisi tino, kae se maua ne ia o fakaola a ia eiloa. A ia ko te Tupu o Isalaelu; ke na fanaifo la a ia ki lalo mai te sataulo; ko talitonu ei tatou ki a ia.

⁴³ E talitonu a ia ki te Atua, kae fai ake foki i a ia ko te Tama a te Atua. Tuku ake la ke lavea ne tatou me vau te Atua o fakaola a ia!”

⁴⁴Ne fakatauemu foki eiloa pena te tokolua pagota kola ne fakasataulo fakatasi mo ia.

⁴⁵I te tutonu, pouli ei te fenua katoa e tusa mo te tolu itula.

⁴⁶I te itula e tolu i te afiafi, ne kalaga a Iesu mo te leo lasi ana muna, “Eli, Eli, lama sapakatani?” ko tena uiga, “Toku Atua, toku Atua, se a te mea ko tiaki mai ei ne koe Au?”

⁴⁷A nisi tino ne 'tu i kona, ne lagona ne latou kae fai ake penei, “Ko kalaga ki a Elia!”

⁴⁸A te sua tino o latou ne tele atu fakavave, puke ki te omomi kae faka'siu ki te uaina. Oti, fakalave ei ne ia te omomi ki te mata o te lakau, kae tuku ake ke inu a ia.

⁴⁹Kae ne fai ake nisi tino, “Fai'tali mua, ke lavea ake ne tatou me vau a Elia o fakaola a ia!”

⁵⁰Ne kalaga malosi a Iesu, ko te mea eiloa ko mate.

⁵¹ I te taimi eiloa tena, masaelua ei te 'pui laugatu o te Fale Tapu, e kamata mai luga ke i ki lalo. Ne galulu te laukele kae ma'fa kaupapa.

⁵²Ne ma'suke tanuga, ka ko toe'tu mai a te ukega o tino o te Atua kola ne 'mate.

⁵³Ne tiaki ne latou olotou tanuga; kae mai tua ifo o te toetu o Iesu, ne olo ei a latou ki te Fa'kai Tapu, matea ei latou ne tino e tokouke.

⁵⁴I te laveaga ne te takitaki o te tokoselau mo sotia ne leoleo i kona te mafuie mo mea katoa ne 'tupu i te taimi tena, ko oko eiloa i te mataku, kae fai ake: “E tonu, ko te Tama eiloa tenei a te Atua!”

⁵⁵E tokouke a fafine ne iai i kona, e kilo'kilo 'mao mai, ko latou kola ne tautali ia Iesu mai Kalilaia, kae ne fesoasoani foki ki a ia.

⁵⁶Ko latou tasi foki eiloa mo Malia te Makatala, Malia te matua o Iakopo mo Iosefa, pela foki mo te matua o tama a Sepetaio.

⁵⁷I te afiafi, ne oko mai a te tagata maukoloa mai Alimataia e igoa ki a Iosefa, kae se soko foki o Iesu.

⁵⁸Ne fano ki a Pilato o fanoi ke teu ne ia a te foitino o Iesu. Tela, fakatonu atu ei Pilato ke tuku atu a te foitino o Iesu ki a ia.

⁵⁹Puke ei ne Iosefa a te foitino o Iesu, kae pelupelu ki te sulukafu lino.

⁶⁰Ne ave ne ia a te foitino o Iesu o tuku i loto i te tanuga ne tuki i kaupapa, fakateka atu ei a te fatu lasi o 'pono i te gutu o te tanuga. Oti, fano ei a ia.

⁶¹Ne iai i kona a Malia te Makatala mo nisi Malia ake foki, e sagasaga i te sua feitu e fakafeagai mo te tanuga.

⁶²I te sua aso, tela ko te aso mai tua o te aso Fakatoka, ne maopoopo fakatasi a faitaulaga sili mo Falesaio i mua o Pilato,

⁶³ olotou muna, “Te Aliki, e manatua ne matou ka koi ola te tino patiloi tena ne fai ake pela, ‘Mai tua o aso e tolu e toetu mai ei au.’

⁶⁴Tela la, fai sau fakatonuga ke leoleo faka'lei eiloa a te tanuga ke oko ki te tolu o aso, i te mea ma olo ona soko o kaisoa tena foitino ko fai atu ei ki tino, ‘Ko toetu a ia mai te mate.’ A te tala loi la tena, ka sili atu i te tala loi muamua.”

⁶⁵Ne fai atu a Pilato ki a latou, “Kona ei a koutou a sotia. Olo la o leoleo a te tanuga ke mo a ma sao se tino ki ei.”

⁶⁶Tela, olo ei latou o puipui te tanuga mai tino, o fakamau fakalei te fatu lasi mo te fakailoga. Ne fai foki ne latou se fakailoga i te fatu lasi, kae tuku foki i ei a sotia ke leoleo i ei.