Read Te Tusi Tapu I Te Gana Tuvalu Lomiga Lua MATAIO 28 Bible Online

MATAIO 28 - Te Tusi Tapu I Te Gana Tuvalu Lomiga Lua bible

MATAIO 28

¹Ko teka atu a te Sapati, ka ko mapa mai te ata ao o te aso muamua o te vaiaso, ne olo atu ei a Malia te Makatala mo te sua Malia ki te tanuga.

²Ne poko fakavave mai eiloa te mafuie i mo taimi kona; me ne fanaifo a te agelu a te Aliki mai te lagi, kae ne fakatakafili ne ia keatea a te fatu kae sagasaga i ei.

³A tena foitino e pela eiloa mo se mainaga o te uila, ka ko ona gatu e 'kena pakipaki eiloa e pela mo se kiona.

⁴Ko oko eiloa i te ma'taku o sotia e leoleo i kona, tela ne pole'pole ei latou; ko te mea eiloa ko fai pela mo ne tino 'mate.

⁵Ne fai atu a te agelu ki fafine, “Sa mataku koutou; me e iloa ne au ia koutou e salasala ki a Iesu tela ne fakasataulo.

⁶E galo i konei, ka ko toetu; e pela eiloa mo ana muna. O'mai o kilo'kilo ki te koga ne takato ei a ia.

⁷Olo fakavave nei o taku atu ki ona soko: ‘Ko toetu a ia mai te mate, ka ko mua atu nei ia koutou ki Kalilaia; ka fetaui ei koutou mo ia i kona.’ Ke masaua taku muna ne fai atu ki a koutou.”

⁸Tela, tuku fakavave eiloa ne laua a te tanuga mo te ma'taku mo te fiafia lasi foki, kae 'tele atu ki soko o Iesu.

⁹Kae 'poi eiloa me ko fakafetaui laua ne Iesu, fai atu ei ki a laua, “Ke ia koulua te filemu!” Ne o'mai laua ki a ia kae puke ki ona vae kae tapuaki atu ki a ia.

¹⁰Ne muna atu a Iesu ki a laua, “Sa mataku! Olo o taku atu ki oku taina ke olo ki Kalilaia, me e fetaui matou i kona.”

¹¹Ka koi olo atu a fafine i te auala, a nisi sotia kola ne leoleo i te tanuga ne olo ki te fa'kai kae taku atu ki faitaulaga sili a mea katoa kola ne 'tupu.

¹²Ne fono fakatasi a faitaulaga sili mo toeaina, fai ei te lotou fuafuaga; kae ne tuku atu ne latou ki sotia a tupe e uke,

¹³mo te fakatonuga ki a latou penei, “Fai atu ki tino i soko o Iesu ne o'mai i te po o kaisoa tena foitino ka koi 'moe koutou.

¹⁴Kafai foki e lagona ne te kovana a te tala tena, e fakatalitonu ne matou ki a ia; ko seai ei se mea e tupu ki a koutou.”

¹⁵Ne puke ne sotia kona a te tupe, kae fai ne latou a te mea ne fakatonu atu ke fai. Ne salalau atu a te tala ki tino Iutaia katoa ke oko mai ki aso nei.

¹⁶ Ne olo atu a te tinoagafulu mo te tokotasi soko ki te mauga i Kalilaia, tela ne fai atu ei a Iesu ke olo ki ei.

¹⁷I te laveaga ne latou a ia, tapuaki atu ei latou ki a ia, ka ko nisi tino o latou ne fakalotolotolua.

¹⁸Ne fakapilipili atu a Iesu ki a latou kae fai atu, “Ko oti ne tuku mai ki a au a te pule katoa i te lagi mo te lalolagi.

¹⁹ Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu.

²⁰Akoako atu foki latou ke faka'logo ki mea katoa kola ne fakatonu atu ne au ki a koutou. Kiloke! Au e fakatasi faeloa mo koutou, ke oko eiloa ki te gataga o te lalolagi.”