Read Te Tusi Tapu I Te Gana Tuvalu Lomiga Lua MATAIO 3 Bible Online

MATAIO 3 - Te Tusi Tapu I Te Gana Tuvalu Lomiga Lua bible

MATAIO 3

¹Ko aso eiloa kona ne vau ei a Ioane te Papatiso, kamata eiloa o talai atu a ia i te koga lavaki o Iutaia,

² ana muna,“Ke salamo koutou me ko pili mai te Malo o te lagi!”

³A Ioane ko te tino tela ne faipati mai ei a te pelofeta ko Isaia penei: “E isi te leo e kalaga i te koga lavaki, ‘Ke fakatoka te alatu mō te Aliki, Ke faka'tonu ona auala!”’

⁴ A gatu o Ioane ne faite mai i fulufulu o kamela; kae ne li foki tena kafanoa pa'kili manu fakatamilo i tena taugasulu; ka ko ana meakai ne kai saale i ei ne se akelise mo meli vao.

⁵Ne o'mai a tino ki a ia mai Ielusalema, mai fenua katoa o Iutaia, mo feitu katoa o te Iolitana.

⁶Ne takutonu atu olotou agasala ki a ia, papatiso ei ne ia latou i loto i te vaitafe ko te Iolitana.

⁷I te mateaga ne Ioane me ko o'mai a Falesaio mo Satukaio ki a ia ke papatiso, ana muna ki a latou: “A koutou ne tama a gata ma'sei. Ko oi ne muna atu ki a koutou, me mafai ne koutou o 'sao mai i te fakasalaga a te Atua tela ka oko mai?

⁸Fakaasi mai ne faiga e iloa i ei me ko sala'mo koutou ki otou agasala.

⁹ Kae sa manatu pela me mafai ne koutou o 'kalo keatea i te otou fai ake pela, ‘A Apelaamo ko te motou tupuna.’ Au e fai atu me mafai ne te Atua o fakatupu ake ne fanau ma Apelaamo i fatu konei!

¹⁰Ko toka nei te takū mō tua ki lalo a lakau mai olotou tafito; a lakau katoa kola e se fua 'lei, ka tua ki lalo kae pei katoa ki te afi.

¹¹Ko papatiso ne au koutou ki te vai, e fakaasi ei ia koutou ko oti ne sala'mo ki otou agasala; ka ko ia tela e vau mai oku tua, e papatiso ne ia koutou ki te Agaga Tapu mo te afi. E sili atu a ia i a au; e se 'tau foki mo au o ave saale ona taka.

¹²E i ona lima te teu kaiga e 'vae ei a kaiga mo saito, e faka'ma ei akutuga saito, kae fakaputu a fuaga saito o ave ki loto i tena fale saito; kae 'sunu ne ia a kaiga saito ki te afi e se mafai o mate!”

¹³Ne vau a Iesu mai Kalilaia ki te Iolitana, kae ne vau ke papatiso a ia ne Ioane.

¹⁴Ka ko Ioane ne taumafai ke fuli ne ia te mafaufau o Iesu. Muna a Ioane, “E 'tau au o papatiso ne koe, kae nei ko vau koe ki a au!”

¹⁵Kae ne tali atu a Iesu ki a ia, “Ke fai ake mua penei i te taimi nei. Me tenei te faiga ka fai ei ne tatou a mea katoa kola e manako ki ei te Atua.”Tela, talia eiloa ne Ioane.

¹⁶I te otiga o Iesu ne papatiso, fanake ei mai te vai. Ne matala te lagi ki a ia, kae ne matea foki ne ia a te Agaga o te Atua ko fanaifo, e tino mai e pela mo se lupe, e fakape'pepe i ona luga.

¹⁷ Ne faipati mai a te leo mai te lagi penei, “Tenei eiloa taku Tama fagasele e fiafia au ki ei.”