Read Te Tusi Tapu I Te Gana Tuvalu Lomiga Lua MATAIO 4 Bible Online

MATAIO 4 - Te Tusi Tapu I Te Gana Tuvalu Lomiga Lua bible

MATAIO 4

¹ Fakamuli ifo, ne takitaki ne te Agaga a Iesu ki te koga lavaki ke fakaosoosogina a ia ne te Tiapolo.

²Ne fakalikiliki a ia i aso e fa sefulu, lagona ei ne ia te fiakai.

³Ne vau a te Tiapolo ki a ia, kae muna mai, “Kafai koe ko te Tama a te Atua, fakatonu ake ke liu falaoa a fatu konei.”

⁴ Ne tali atu a Iesu, “Muna a te Tusi, ‘E se na ko meakai fua e ola ei te tino, ka ko muna katoa kola e 'to mai i te gutu o te Atua.’ ”

⁵Ne toe ave ne te Tiapolo a Iesu ki te Fa'kai Tapu, kae tuku a ia i te koga tafa maluga o te Fale Tapu,

⁶ kae muna mai ki a ia, “Kafai koe ko te Tama a te Atua, lele ki lalo i te laukele; me i muna a te Tusi, ‘E fakatonu ne te Atua ana agelu mō koe: E sapo ake a koe ne latou i olotou lima, Ko te mea ke se mafai o pa'kia ou vae i fatu.”’

⁷Ne tali atu a Iesu, “Kae ne muna mai foki a te Tusi, ‘E se 'tau mo koe o tofotofo a te Aliki tou Atua.’ ”

⁸Ne toe ave foki a Iesu ne te Tiapolo ki te mauga tafa maluga, kae ne fakaasi atu katoa ki a ia a malo o te lalolagi mo olotou 'malu.

⁹Muna a te Tiapolo, “E avatu katoa ne au ki a koe a mea konei, manafai koe e totuli ifo o tapuaki mai ki a au.”

¹⁰Ne tali atu a Iesu, “Fano keatea e Satani! Muna a te Tusi, ‘Tapuaki ki te Aliki tou Atua, me ko ia fua e tavini koe ki ei!”’

¹¹Ne tiakina a Iesu ne te Tiapolo, o'mai ei agelu o fesoasoani ki a ia.

¹²I te lagonaga ne Iesu me ko oti ne falepuipui a Ioane, fano ei ki Kalilaia.

¹³Ne seki nofo a ia i Nasaleta, kae ne fano o nofo i Kapanaumi, se fa'kai e tu i tafa o te namo o Kalilaia, i te kogā laukele o Sepulona mo Nafatali.

¹⁴Ne fai a te mea nei ke fakataunu ei a muna a te pelofeta ko Isaia ne fai:

¹⁵ “Ko te fenua o Sepulona mo te fenua o Nafatali, I te auala e tau ki tai, i te sua feitu atu o te Iolitana, Ko Kalilaia o fenua fakaatea!

¹⁶Ko latou kola e 'nofo i te pouliga E matea ne latou se mainaga lasi! Ko latou foki kola e 'nofo i te fenua pouli o te mate, E 'pula atu ki a latou te mainaga!”

¹⁷ I te taimi eiloa tena, ne kamata a Iesu o talai atu penei: “Ke salamo koutou mai i otou agasala, me ko pili mai te Malo o te lagi!”

¹⁸I te sasalega a Iesu i tafa o te namo o Kalilaia, ne matea ne ia te tautaina kola ne tino Fai-ika, ko Simona tela e igoa ki a Petelu mo tena taina ko Anitelea, e peipei te la tili i te namo.

¹⁹Kae ne fai atu a ia ki a laua, “Tautali mai i a au, ke fai ne au koulua mo fai a tino Fai-ika ki tino.”

²⁰I kona foki eiloa, tiakina o la tili kae olo tasi mo ia.

²¹I tena fanatuga eiloa tena, matea ei ne ia a te sua tautaina, ko Iakopo mo Ioane ko tama a Sepetaio, e 'nofo i luga i te poti mo te la tamana ko Sepetaio, e ponopono olotou tili; tela kalaga atu ei a Iesu ki a laua.

²²I kona foki eiloa, tiakina te poti mo te la tamana; kae tau'tali i a Ia.

²³Ne fano saale a Iesu i Kalilaia katoa, o akoako atu i olotou fale tapuaki, o folafola atu foki a te Tala 'Lei o te Malo, kae o faka'lei foki a tino ma'saki kola e maua ne masaki valevale.

²⁴Ko salalau te tala e uiga ki a ia i te fenua katoa o Sulia, tela aumai ei ki a ia a tino katoa kola e maua ne masaki valevale mo te fi'ta: ko tino e pukea ne temoni, ko tino e maua ne te masaki pole, mo tino masaki faka'mate; ne faka'lei katoa latou ne Iesu.

²⁵Ne tau'tali a te vaitino e tokouke i a ia mai Kalilaia, Tekapoli, Ielusalema, Iutaia, pela foki mo fenua katoa i te sua feitu o te Iolitana.