Read Te Tusi Tapu I Te Gana Tuvalu Lomiga Lua MATAIO 6 Bible Online

MATAIO 6 - Te Tusi Tapu I Te Gana Tuvalu Lomiga Lua bible

MATAIO 6

¹ “Sa fakamata'mata koutou o fakaasiasi te otou amiotonu ke matea ne tino, me e se maua i ei ne koutou a te taui mai te otou Tamana i te lagi.

²“Tela la, kafai ko avatu au meaalofa, ke se fakatagi ne koe a te pu, e pela mo te faiga a tino fia amiotonu i fale tapuaki mo auala, ko te mea ke tavaegina latou ne tino. E tonu, au e fai atu ki a koutou, e maua ne latou te lotou taui.

³Kae kafai e avatu ne koe ne meaalofa, ke se iloa ne tou lima fakamaui a te mea ko fai ne tou lima fakaatamai;

⁴ko te mea ke se matea ne ia au meaalofa; ka ko tou Tamana fua e lavea ne ia koe i te koga se lavea; ka avatu foki ne ia te taui ki a koe.”

⁵“Kae kafai koutou e 'talo ke se fakaakoako ki tino fia amiotonu, me i a latou e fia 'tu kae 'talo i fale tapuaki mo maga auala, ko te mea ke lavea mai latou ne tino. E tonu, au e fai atu ki a koutou, e maua ne latou te lotou taui.

⁶Kafai e 'talo koe, ulu ki loto i tou potu, 'pono te mataloa; ko fai ei tau 'talo ki tou Tamana tela e i te koga se lavea; ka ko tou Tamana tela e lavea ne ia koe i te koga se lavea, e avatu foki ne ia a te taui ki a koe.

⁷“Kae kafai e 'talo koutou, sa fakaukeuke otou pati, ke pela mo te amioga a tino o fenua fakaatea, me fai mai te lotou manatu me ko te uke o muna, ko te talia tena o te 'talo.

⁸Sa fai koutou e pela mo latou, me lavea ne te otou Tamana a mea kola e fia maua ne koutou, kae e seki fakatagi atu eiloa a koutou ki a ia.

⁹Tela la, ke 'talo koutou penei: ‘Te motou Tamana tela i te lagi: Ke tapu tou igoa,

¹⁰Ke oko mai tou Malo, Ke fai te mea e loto koe ki ei i lalo nei, e pela mo te faiga i te lagi.

¹¹Tuku mai omotou meakai e 'tau mo te aso nei;[3]

¹²Fakamagalo mai omotou agasala E pela mo matou e fakamagalo atu ki tino kola e se mai ki a matou;

¹³Kae sa takitakigina matou ki se tofotofoga, kae faka'sao mai matou mai te masei.’[4]

¹⁴ I te mea kafai koutou e fakamagalo atu ki tino i olotou agasala, e fakamagalogina foki koutou ne te otou Tamana tela i te lagi.

¹⁵Kae kafai e se loto fakamagalo atu koutou ki tino i olotou agasala, e se fakamagalogina foki koutou ne te otou Tamana i otou agasala.”

¹⁶“Kae kafai e fakaliki'liki koutou mō tapuakiga, ke se mata fanoa'noa koutou e pela mo tino fia amiotonu; me i a latou e fakama'sei olotou mata, ke lavea mai ne tino i a latou ko fakaliki'liki mō tapuakiga. E tonu, au e fai atu ki a koutou, e maua ne latou te lotou taui.

¹⁷Kae kafai e fakalikiliki koe mō tapuakiga, teuteu faka'lei tou foitino,

¹⁸ko te mea ke se iloa ne tino i a koe ko fakalikiliki mō tapuakiga, ka ke iloa fua ne tou Tamana tela e nofo i te koga se lavea; ko tou Tamana foki tela e lavea ne ia a mea e se lavea, e avatu ne ia ki a koe se taui.”

¹⁹ “Sa fakaputu ne otou koloa i te olaga nei, me e iai a mogamoga mo te pala o fakamasei, e iai foki ne tino kai'soa e ofa ne latou a mea kae kaisoa.

²⁰Kae fakaputu ne otou koloa i te lagi, tela e seai ne mogamoga mo te pala o fakamasei; e seai foki ne tino e ofa ne latou a mea kae kaisoa.

²¹Me ko te koga tela e tuku i ei ou koloa, e iai foki mo tou loto i kona.”

²²“A te moli o te foitino ko mata; kafai ou mata e fia kilokilo faeloa ki mea 'lei, ka maina atu katoa tou olaga.

²³Kae kafai ou mata e fia kilokilo ki mea ma'sei, e pouli katoa tou olaga; tela la, kafai e pouli te mainaga tela e i loto i a koe, e lasi foki te pouliga i ei!”

²⁴“E seai se tino e mafai ne ia o tavini ki aliki e tokolua; me e takalialia a ia ki te sua tino, kae alofa ki te sua tino, e fakamaoni ki te sua tino kae se fakamaoni ki te sua tino. E se mafai ne koutou o tavini ki te Atua mo koloa.

²⁵“Tena te mea e fai atu ei au ki a koutou, ke se manava'se koutou ki otou ola, ki mea e 'kai ei koutou, mo mea e inu ei koutou, io me ko otou foitino, ki mea e pei ei koutou. E a, e se sili la te ola i meakai io me ko te foitino i gatu?

²⁶Ke 'kilo koutou ki manu eva; a latou e se 'toki saito, io me kati saito, io me fakaputu i fale saito; kae fagaigina eiloa latou ne te otou Tamana tela i te lagi. E se sili la a te otou tāua i a latou?

²⁷Ko oi se tino i a koutou e mafai ne ia i tena manavase o toe fakasilia a tona ola ki se aga e tasi?[5]

²⁸“Se a foki te mea e manavase ei koutou ki gatu? Ke mafaufau koutou ki te 'tupuakega o talotalo o te vao, e se 'pole latou ki feitu pena.

²⁹ Kae fai atu au ki a koutou me i a Solomona i tena 'malu e 'seki pei eiloa ki se gatu gali, e penei mo pula o lakau konei.

³⁰Kae kafai ko te Atua ne fakalavalava ne ia a mouku o te vao konei e ola i te aso nei, kae pei ki te afi i te aso a taeao; e a, e se sili atu la te fakalavalava ne ia koutou kona e fo'liki otou fakatuanaki?

³¹Tela la, sa manava'se koutou o fai ake pela: ‘Ne a mea ka 'kai ei tatou? Ne a foki mea ka inu ei tatou? Ne a foki mea ka pei ei tatou?’

³²Me i mea katoa kona, e salasala ne tino o fenua fakaatea. Ko iloa ne te otou Tamana i te lagi me aoga katoa a mea kona ki a koutou.

³³Ke mua koutou o 'sala tena Malo mo tena amiotonu; kae ka fakaopoopogina atu a mea katoa kona ki a koutou.

³⁴Ia, ke se manava'se la koutou ki te aso a taeao, me manavase eiloa te aso a taeao ki ana mea. Ke faitalia eiloa te aso ke nofo mo ona fakalavelave.”