Read Te Tusi Tapu I Te Gana Tuvalu Lomiga Lua MATAIO 9 Bible Online

MATAIO 9 - Te Tusi Tapu I Te Gana Tuvalu Lomiga Lua bible

MATAIO 9

¹Ne sopo ake a Iesu ki te poti o foki atu ki te sua feitu o te namo, oko atu ei ki tena fa'kai tonu.[7]

²Kae kiloke, ne aumai ne nisi tino a te tagata e masaki faka'mate, e takato i luga i te moega. Ko matea atu eiloa ne Iesu te lotou fakatuanaki, faipati atu ei a Iesu ki te tagata e masaki faka'mate penei: “Taku tama, ke nui tou manava me ko magalo au agasala.”

³Kae ne fai ake pela a nisi faiakoga o te Tulafono i a latou eiloa, “Ko muna masei a te tagata nei ki te Atua!”

⁴Ka ko Iesu ko iloa ne ia a mafaufauga o latou, tela fai atu ei penei: “Se a te mea e mafaufau ma'sei ei koutou?

⁵Tefea te mea e faigofie, ko te fai atu pela, ‘Ko magalo au agasala,’ io me ko te fai atu pela, ‘Tu ki luga o sasale’?

⁶Kiloke, ka fakamaoni atu ne au ki a koutou, i te mea a te Tama a te Tagata e pule i te fakamagaloga o agasala i te lalolagi nei.”Tela, fai atu ei a Iesu ki te tagata e masaki faka'mate, “Tu ki luga, puke tou moega, kae fano ki tou fale!”

⁷Ne tu ake te tagata tena, fano ei ki tena fale.

⁸I te laveaga ne tino a te mea nei, ne ma'taku latou, kae 'viki ki te Atua me ko tuku mai ne ia a te pule pena ki tagata.

⁹Ko tiaki ne Iesu a te koga tena, ka koi sasale atu a ia o fano, ne lavea ne ia a te tagata e igoa ki a Mataio, e sagasaga i te ofisa o lafoga. Tela, fai atu ei a ia ki ei penei: “Tautali mai i a au.” Tela, tu ei ki luga a Mataio kae tautali atu i a ia.

¹⁰I te taimi ne kai ei a Iesu i te fale o Mataio, [8] e tokouke a tino ao lafoga mo tino agasala ne o'mai, ke 'kai fakatasi latou mo Iesu mo ona soko i te laulau.

¹¹I te laveaga ne nisi o Falesaio a te 'kaiga tenei, faipati atu ei latou ki ona soko penei: “Se a te mea ko 'kai fakatasi ei te otou faiakoga mo tino ao lafoga, pela foki mo tino agasala?”

¹²Ne lagona ne Iesu olotou pati, tali atu ei a ia penei: “A tino se ma'saki, e se ma'nako ki se tokita, ka ko latou fua kola e ma'saki.

¹³ Olo o salasala ake me se a te uiga o te muna tenei: ‘Au e loto ki te alofa, kae se ko te taulaga.’ Me i a au ne seki vau o kalaga ki tino amiotonu, ka ko tino agasala.”

¹⁴Ne o'mai a soko o Ioane te papatiso o fesili mai ki a Iesu penei: “Se a te mea e fakalikiliki ei matou mo Falesaio mō tapuakiga, kae e se pena ou soko?”

¹⁵Ne tali atu a Iesu penei: “Ko te otou taofi e fanoa'noa pefea a taugasoa o te tagata fatoa fakaipoipo i aso e fakatasi ei latou mo ia? Kae e oko mai eiloa a te aso e fano keatea i ei a te tagata fatoa fakaipoipo mai ona taugasoa; tenei la te pogai ko fakaliki'liki ei latou mō tapuakiga.

¹⁶“E seai se tino e fono ne ia te peleue ko leva ki se laugatu fou, i te mea kafai e masae mai keatea te fono tena mai te peleue, ko te mea eiloa ko gasolo o lasi te masaega.

¹⁷E se utu ne se tino ne uaina fou ki loto i fagu mua e utu ei a uaina. Kafai e fai pena ne se tino, ko fagu ka ma'fa, ko maligi ei te uaina ki tua, ko fagu foki ka ma'sei. Ka ko te mea e fai penei: a te uaina fou e utu ki loto i fagu fou, tela la, ka 'sao 'lei ei a fagu mo te uaina.”

¹⁸I te palelega ne faipati atu a Iesu ki a latou, ne vau a te ofisa Iutaia ki a ia, ne totuli i ona mua kae fai mai, “A taku tama fafine fatoa mate atu nei eiloa, kae vau o fakaeke ake tou lima ki luga i a ia, ko ola ei a ia.”

¹⁹Tela, tu ake ei a Iesu, kae tau'tali atu mo ona soko i a ia.

²⁰Kae e isi se fafine ne tafe tena sua i tausaga e sefulu lua, ne tolotolo mai tua o Iesu; kae fakapatele atu ki te kapa o tena gatu.

²¹Me ne fai pela tena mafaufau, “Ke patele fua au ki tena gatu, ko malosi ei au.”

²²Ne mafuli atu a Iesu, kae ne lavea atu ne ia te fafine, faipati atu ei penei: “Taku tama, ke nui tou manava! Ko tou fakatuanaki ko ola ei koe.” I te taimi eiloa tena, malosi ei te fafine.

²³Ne fano a Iesu ki te fale o te ofisa Iutaia. I te taimi tena, ne lavea atu ne ia a tino e usuusu pese i te mate, mo tino e 'nofo i ei ko se toka olotou loto.

²⁴Ana muna, “Olo keatea tino katoa! A te tamafine nei e seki mate, kae moe fua!” Fakatauemu ei latou ki a Iesu.

²⁵I te taimi ne olo ei a tino keatea, ne ulu atu a Iesu ki loto i te potu o te tamafine, kae puke ki tena lima, nofo ake ei a ia ki luga.

²⁶Tela, salalau atu ei te tala i te koga fenua tena.

²⁷Ne tiakina ne Iesu a te koga tena, ka ko te taimi ne sasale atu ei a ia o fano, e tokolua tagata ne tau'tali mai i a ia. Ne ka'laga mai laua penei: “Te Tama a Tavita, alofa mai ki a maua.”

²⁸Ne ulu atu a Iesu ki loto i te fale, kae ne o'mai a te tokolua tagata 'kivi ki a ia, kae fesili atu a ia ki a laua penei: “E talitonu koulua me mafai ne au o fakalei a koulua?” Ne tali mai laua, “Ao, e te Aliki!”

²⁹Ne fakapatele atu a Iesu ki o la mata kae fai atu: “E pela eiloa mo te mea e talitonu koulua ki ei, ke fai eiloa pena!”

³⁰Toe kite ei laua. Faipati malosi atu ei a Iesu ki a laua penei: “Sa taku atu ne koulua a te mea nei ki so se tino!”

³¹Kae i te la oloatuga, ne fakasalalau atu ne laua a te tala e uiga ki a Iesu i te koga fenua tena.

³²Ko olo atu a te tokolua konei, kae aumai ne nisi tino ki a Iesu a te tagata gūgū, me ne pukea ne te temoni.

³³I te palelega ne afuli keatea te temoni, toe mafai ei o faipati faka'lei a te tagata tena. Ko oko eiloa i te ofo o tino, kae fai ake penei: “E seki lavea eiloa ne tatou se mea penei i Isalaelu!”

³⁴ Ka ko Falesaio ne fai ake latou penei: “Ko te pule sili o temoni ne tuku atu ne ia ki a ia a te mana o afuli keatea a temoni.”

³⁵ Tela, tamilo atu ei a Iesu i fa'kai 'lasi mo fa'kai fo'liki o asiasi ki ei. Ne akoako atu i loto i olotou fale tapuaki; kae folafola atu te Tala 'Lei o te Malo, kae fai ke 'lei a masaki o tino.

³⁶ I te laveatuga ne ia i te tokouke o tino, ne tupu ake ei tena loto alofa mō latou, me ko se toka olotou loto i te seai o se tino e fesoasoani atu, ko pela mo mamoe e seai se lotou tino tausi.

³⁷ Ona ko te mea tena, ne fai atu a ia ki ona soko penei:“Ko oko eiloa i te lasi o te saito e fia kati, ka ko tino ga'lue i te saito e se tokouke!

³⁸Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.”