Read Te Tusi Tapu I Te Gana Tuvalu Lomiga Lua MALEKO 10 Bible Online

MALEKO 10 - Te Tusi Tapu I Te Gana Tuvalu Lomiga Lua bible

MALEKO 10

¹Ne tiakina ne Iesu a te koga tena kae fano ki te koga fenua o Iutaia, kae ne ui i te Iolitana o fano ki te sua feitu o te vaitafe tena. Ne mumu mai foki a vaitino ki a ia, kae ne akoako ne ia a latou e pela mo tena masani.

²Ne o'mai a nisi Falesaio ki a ia kae ne taumafai o malei a ia, olotou muna, “Taku mai ki a matou, me e fakasaoloto ne te motou Tulafono ke 'tala ne se tagata tena avaga?”

³Ne tali atu ki a latou a Iesu i se fesili, ana muna: “Se a te fakatonuga a Mose ne tuku atu ki a koutou?”

⁴ Ne tali mai latou, “Ne fakasaoloto ne Mose a te tino ke tusi se pepa mavae ko tuli ei tena avaga ke fano.”

⁵Ne fai atu a Iesu ki a latou: “Ne tusi ne Mose a te fakatonuga tenei me e faigata te talia ne koutou a te mea tonu.

⁶ Kae mai i te kamataga o te faitega o te lalolagi, ne fai mai te muna penei, ‘Ne faite ne te Atua te tagata mo te fafine.

⁷Tenei te pogai e tuku ei ne te tagata ona matua kae fano o 'nofo mo tena avaga,[17]

⁸ko fai ei laua mo foitino e tasi.’ Ko se toe fai laua mo tino e tokolua, ka ko tasi.

⁹Tela la, e se 'tau mo te tagata o toe fakamavae ne ia keatea a te mea ko oti ne tuku fakatasi ne te Atua.”

¹⁰I te ologa a Iesu mo ona soko ki loto i te fale, fesili mai ei ona soko ki a ia, e uiga mo te mea tena.

¹¹ Ne fai atu a Iesu ki a latou, “A te tagata e 'tala tena avaga kae avaga ki te sua fafine, ko mulilua a ia ki tena avaga;

¹²e pena foki a te fafine manafai e 'tala tena avaga kae toe avaga ki te sua tagata, ko mulilua a ia ki tena avaga.”

¹³Ne aumai ne nisi tino a tama'liki ki a Iesu ke puke atu a ia ki ei, kae ne 'vao ne ona soko a tino kona.

¹⁴Ne iloa ne Iesu a te mea ne fai ne ona soko, ko oko eiloa i tena ita, fai atu ei ki ona soko: “Tuku tamaliki ke o'mai ki a au! Sa taofigina latou, me e o tino penei a te Malo o te Atua.

¹⁵ Ke masaua ne koutou, me ko so se tino e se talia ne ia a te Malo o te Atua e pela mo se tamaliki, e se mafai lele eiloa o ulu atu ki ei.”

¹⁶Ne kopi ne ia a tama'liki, kae puke atu ona lima ki a latou takitokotasi o fakamanuia atu latou.

¹⁷Ne sasale a Iesu i te auala, kae tele mai te sua tino kae totuli i ona mua kae fai mai: “Te Faiakoga 'lei, se a taku mea ka fai ke maua ei ne au a te ola se gata mai?”

¹⁸Ne tali atu a Iesu, “Ai a ne fai mai ei koe i a au se tino 'lei?” E seai se tino 'lei vagana te Atua.

¹⁹E iloa ne koutou aku fakatonuga: ‘Sa tatino; sa mulilua; sa kaisoa; sa pati loi; sa fai tala fakaloiloi; ava ki tou tamana mo tou matua. ”’

²⁰Ne tali mai a te tagata tena, “Te Faiakoga, ne tausi ne au a mea katoa mai i taku folikiga.”

²¹Ne kilo alofa atu a Iesu ki a ia, kae fai atu: “E tasi te mea e 'tau o fai ne koe. Fano o 'togi atu au mea katoa kae tufa atu a tupe ki tino ma'tiva, kae ka maua ne koe a te koloa i te lagi; ko vau ei koe o tautali mai i a au.”

²²I te lagonaga ne te tino tenei a te mea nei, ko oko eiloa i tona mata se fiafia, fano ei mo te loto fanoanoa, i te mea i a ia se tino maukoloa.

²³Ne kilokilo saale a Iesu ki ona soko kae fai atu, “Ko oko eiloa i te faigata i tino mauko'loa o ulu atu ki te Malo o te Atua!”

²⁴Ne 'poi a te kau soko i muna konei, kae ne toe fai atu a muna a Iesu: “Aku fanau, ko oko eiloa i te faigata te ulu atu ki te Malo o te Atua!

²⁵E faigata o ulu atu a te kamela ki te pu o te nila, kae sili atu i te faigata i te tino maukoloa o ulu atu ki te Malo o te Atua.”

²⁶Ne ofo masei a te kau soko i te mea tenei, fakatau fesilisili ei latou ia latou eiloa, “Ko oi la e mafai o fakaolagina?”

²⁷Ne kilo tonu a Iesu ki a latou kae fai atu, “Se mea faigata tenei ki tino, kae ki te Atua se mea faigofie; e faigofie a mea katoa ki te Atua.”

²⁸Ne faipati malosi ake a Petelu, ana muna: “Ko oti ne tiakina ne matou a mea katoa kae tautali atu ia koe.”

²⁹Ne tali atu a Iesu ki a latou, “E tonu, kae fai atu au: so se tino e tiakina ne ia tena fale, taina, tuagane, te matua mo te tamana, fanau mo ona manafa ona ko au mo te tala 'lei,

³⁰ka uke atu ana mea e maua i te kautama tenei. Ka fakafia selau ona fale e maua, taina, tuagane, matua, fanau, manafa pela foki mo fakasauaga. Ka maua ne ia i aso konei e o'mai a te ola se gata mai.

³¹ E tokouke a tino ne 'mua ka fakamuli, kae e tokouke a tino ne fakamuli ka 'mua.”

³²Ko sasale ake nei latou i te auala e tau atu ki Ielusalema. Ne mua a Iesu i ona soko, ka ko ona soko i te taimi tena ko 'poi, ka ko tino kola ne tautali i olotou tua ko ma'taku. Ne ave ne Iesu ona soko keatea mo te auala, kae faipati atu ki a latou e uiga ki mea ka 'tupu ki a ia.

³³Muna a Iesu, “Kiloke, a tatou nei e olo ki Ielusalema, ko te koga tela ka tuku atu ei au te Tama a te Tagata ki lima o faitaulaga sili mo faiakoga o te Tulafono. Ka tamate ne latou au kae tuku atu ki tino o fenua fakaatea.

³⁴Ka fakatauemu ki a au kae puapuaki, e kini kae tamate foki ne latou. Kae mai i tua o te tolu o aso ka toetu ake au mai te mate.”

³⁵Ne o'mai a tama a Sepetaio ko Iakopo mo Ioane ki a Iesu kae fai mai ki a ia, “Te Faiakoga, e isi se mea e ma'nako maua ke fai ne koe mō maua.”

³⁶Ne tali atu a Iesu, “Se a te mea e ma'nako koulua ke fai ne au mō koulua.”

³⁷Ne tali mai laua: “Kafai ko nofo koe i tou Malo 'malu, a maua e ma'nako ke 'nofo tasi tatou, e tokotasi i tou feitu fakaatamai, kae tokotasi i tou feitu fakamaui.”

³⁸ Ne tali atu a Iesu ki a laua, “E se iloa ne koulua a te mea ne fakamolemole mai ei koulua. E a, e mafai ne koulua o inu ki te ipu ka inu au i ei? E mafai ke papatisogina koulua i te papatisoga ka papatiso ei au?”

³⁹Ne tali mai laua, “E mafai!” Ne toe tali atu a Iesu ki a laua, “Ka inu eiloa koulua ki te ipu ka inu au i ei, ka papatisogina foki koulua i te papatisoga ka papatiso au i ei.

⁴⁰Kae e seai la saku pule ki te tofiga me ko oi ka nofo i toku feitu fakaatamai mo toku feitu fakamaui. E a te Atua eiloa a te pule o tuku atu a koga konei ki a latou kola ko oti ne fakatoka mō latou.”

⁴¹Ne ita te sua tinoagafulu soko ki a Iakopo mo Ioane i te lagonaga ne latou te fakatagi a laua.

⁴² Ne kalaga atu a Iesu ki ona soko ke maopoopo tasi ki a ia kae fai atu: “Ko iloa ne koutou me ia latou kola e taku ko pule mo takitaki o tino, ko tona uiga e pule latou i luga i tino.

⁴³ E se tena la te auala e 'tau o fai ne koutou. Kafai se tino e manako a ia ke fai mo tino sili, e 'tau a ia o fai mo tavini a koutou.

⁴⁴Kafai foki ko te tino e fia muamua i mea katoa, e 'tau o fai a ia mo pologa a tino katoa.

⁴⁵Me i a au te Tama a te Tagata ne seki vau ko te mea ke tavini mai tino; kae ne vau au o tavini atu, kae tuku atu foki a toku ola o fakasaoloto ei a tino e tokouke.”

⁴⁶Ne oko mai latou ki Ieliko. I te tiakinaga ne Iesu mo ona soko pela foki mo te vaitino a te koga tena, e isi se tagata kivi e igoa ki a Patimaio te tama a Timaio, e sagasaga i tafa o te auala o akai mea a tino.

⁴⁷I te lagonaga ne ia me ko Iesu te Nasaleta ko sasale ake, kalaga ake ei a ia penei, “Iesu te Tama a Tavita! A koe ke alofa mai ki a au!”

⁴⁸E tokouke a tino ne ita ki a Patimaio kae fai atu ki ei ke filemu. Ka ko na pakalaga ei a ia penei, “Te Tama a Tavita, a koe ke alofa mai ki a au!”

⁴⁹Ne tu a Iesu kae fai ake, “Kalaga atu ke vau a ia.” Tela, ka'laga atu ei latou ki te tino kivi, “Fakamalosi! Tu ki luga, me tena ko kalaga mai ki a koe.”

⁵⁰Ne pei tena gatu keatea kae tafuke ake ki luga kae fanatu ki a Iesu.

⁵¹Ne fai atu a Iesu ki a ia, “Se a te mea e manako koe ki ei ke fai ne au mō koe?” Ne tali mai a te tino kivi, “Te Faiakoga, au e manako ke 'kite oku mata.”

⁵²Muna a Iesu ki a ia, “Fano, ko tou fakatuanaki ko ala ei o 'lei ou mata.” I kona foki eiloa 'lei ei a mata o Patimaio, tautali atu ei i a Iesu i te auala.