Read Te Tusi Tapu I Te Gana Tuvalu Lomiga Lua MALEKO 11 Bible Online

MALEKO 11 - Te Tusi Tapu I Te Gana Tuvalu Lomiga Lua bible

MALEKO 11

¹Ko pili latou ki Petefake mo Petania ko fakai 'tu pili ki Ielusalema, oko atu ei latou ki te Mauga o Olive, tela uga atu ei ne Iesu ona soko e tokolua ke 'mua i a ia,

²mo tena fakatonuga penei: “Olo ki te fa'kai tena i olua mua. Kafai e oko koulua ki kona, e maua atu ne koulua a te tamā asini e tukau, kae e seki sopo eiloa i ei se tino. ‘Tala ne koulua kae aumai ki konei.

³Kae kafai e isi se tino e fesili atu ki a koulua penei, ‘Ai a e fai ei ne koulua a te mea tena?’ Fai la ki ei penei. E manako ki ei te Aliki,[18] e manako ki ei kae ka fakafoki fakavave mai ne ia ki a koe.”

⁴Ne olo a te tokolua soko kona, kae maua ne laua a te tamā asini i tafa o te auala e tukau ki te mataloa o te fale. Ka koi 'tala ne laua,

⁵e isi ne tino ne 'tu pili mai ne fesili atu penei ki a laua, “Ai a e 'tala ei ne koulua a te tamā asini tena?”

⁶Ne tali atu laua e pela eiloa mo muna a Iesu ne fai atu ki a laua, talia mai ei ne tino kona ke ave te asini.

⁷Ne aumai ne laua a te tamā asini ki a Iesu kae laku olotou gatu ki luga i te tua o te manu, sopo ake ei a Iesu ki luga.

⁸E tokouke a tino ne 'fola olotou gatu i te auala, ka ko nisi tino ne fati a kaula o lakau ne kati mai i fatoaga kae 'fola a lau i te auala.

⁹ A tino kola e olo i mua o Iesu mo tino foki kola e o'mai i ona tua ko kamata o ka'laga ake penei, “Ke vikia te Atua! Ke manuia a ia tela e vau i te igoa o te Aliki!

¹⁰Ke amutia foki a te malo tela ka oko mai o te tou tamana ko Tavita. Ke vikia te Atua!”

¹¹Ko oko atu a Iesu ki Ielusalema fano ei ki loto i te Fale Tapu, kae kilokilo sale ki mea katoa. Kae ona ko te mea ko pili o po, toe olo ei mo ona soko e tinoagafulu mo te tokolua ki Petania.

¹²I te sua aso i te lotou 'fokimaiga mai i Petania, ko fia kai a Iesu.

¹³Ne matea 'mao atu ne ia a te lakau ko te mati ko se atafaia i te uke ona lau mo te ola 'lei. Tela, fanatu ei a ia o onoono me e isi ne ana fuaga e maua; kae i tena okoatuga ki ei, ne lau fua e maua atu me seki oko eiloa ki te taimi e 'tau ei o fua.

¹⁴Ne fai atu a Iesu ki te mati: “Ka se toe fua eiloa koe!” Ne lagona ne ona soko ana pati kona.

¹⁵I te lotou toe 'fokiga ki Ielusalema, ne fano a Iesu ki loto i te Fale Tapu, kae kamata o atuli ne ia ki tua a latou kola e fakatau atu mea i loto i te Fale Tapu. Ne 'fuli ne ia ki lalo a taipola a tino 'fulitupe mo nofoga o tino fakatau lupe,

¹⁶ne se talia foki ne ia so se tino ke fano mo se amoga i loto i te Fale Tapu.

¹⁷Tela, akoako atu ei ne ia a tino penei, “Muna a te Tusi, ‘Ka fakaigoa a toku fale se fale 'talo mō tino o fenua katoa.’ Kae nei ko oti ne 'fuli ne koutou ke fai mo ana o tino faomea!”

¹⁸Ne lagona ne faitaulaga sili mo faiakoga o te Tulafono ana muna konei, tela salasala ei ne latou se auala o tamate a Iesu. Ne ma'taku ki a ia i te mea ko ofo a te vaitino i ana akoakoga.

¹⁹I te okoga ki te afiafi, tuku ei ne Iesu mo ona soko a te fa'kai.

²⁰I te taeao pogipogi, ka koi sasale latou i te auala, ne matea ne latou te mati. Ko mate katoa eiloa e kamata mai i te taulu i ki lalo i ona aka.

²¹Masaua ake ei ne Petelu a te mea a Iesu ne fai ki te mati, tela fai mai ei a ia ki a Iesu, “Te Faiakoga, kiloke ko mate te mati ne fetu ne koe!”

²²Ne tali atu a Iesu ki a latou: “Ke masaua a te mea nei! Kafai e isi sou fakatuanaki ki te Atua,

²³e mafai ne koe o fai atu ki te mauga tenei, ‘Masiki mai i konei, ke pei 'tuki koe ki te tai.’ Kafai e se fakalotoloto lua koe, kae talitonu me i muna kola ne faipati ne koe e taunu eiloa, e fai eiloa pena mō koe.

²⁴Ona ko te mea nei, ko fai atu ei au penei: Kafai e 'talo koutou o fakatagi atu mō so se mea, e 'tau o talitonu koutou me e maua eiloa ne koutou, kae ka tuku atu a mea katoa ki a koutou.

²⁵ Kafai e 'tu koutou o 'talo, fakamagalo so se mea masei a koutou ne fai ki so se tino, ko te mea ke fakamagalo foki ne te otou Tamana i te lagi otou agasala.[19]

²⁶(Kafai e se fakamagalo ne koutou a nisi tino, e se fakamagalo foki ne te otou Tamana i te lagi otou agasala.)”

²⁷Ko 'foki mai latou ki Ielusalema. Ka koi sasale a Iesu i loto i te Fale Tapu, kae o'mai ki a ia a faitaulaga sili, faiakoga o te Tulafono mo toeaina,

²⁸kae fai mai ki ei: “E a ai te pule e fai ei ne koe a mea konei?”

²⁹Ne tali atu a Iesu ki a latou: “Ke taku atu mua ne au te fesili tenei ki a koutou, kafai e tonu te tali a koutou, ko taku atu ei ne au me e a ai te pule e fai ei ne au a mea konei.

³⁰Taku mai, e maifea te pule a Ioane o papatiso: mai te Atua io me e mai tino?”

³¹Ne kamata latou o fakakinau i a latou eiloa, olotou muna: “Se a te tou tali ka fai? Kafai e tali atu tatou, ‘Mai te Atua,’ ka fai mai a ia penei, ‘Ai a la e se talitonu ei koutou ki a Ioane?’

³²Kae kafai e fai ake tatou pela, ‘Mai tino.”’ Ko ma'taku latou i te mea ko talitonu a tino katoa i a Ioane se pelofeta.

³³Tela, tali atu ei latou penei ki a Iesu, “E se iloa ne matou.” Muna a Iesu ki a latou, “E se taku atu foki ne au ki a koutou, me e a ai te pule e fai ei ne au a mea konei.”