Read Te Tusi Tapu I Te Gana Tuvalu Lomiga Lua MALEKO 13 Bible Online

MALEKO 13 - Te Tusi Tapu I Te Gana Tuvalu Lomiga Lua bible

MALEKO 13

¹Ka koi sasale o fano ki tua a Iesu mai i te Fale Tapu, e tokotasi mai ona soko ne kalaga atu ki a ia penei, “Te Faiakoga, onoono ake i te gali o fatu mo fale!”

²Ne tali atu a Iesu, “E matea ne koutou a fale 'lasi konei? E seai eiloa se fatu o fatu konei e 'toe; e ma'lepe katoa ki lalo.”

³Ne sagasaga a Iesu i luga i te Mauga o Olive, e feagai tonu mo te Fale Tapu, kae o'mai a Petelu, Iakopo, Ioane mo Anitelea ki a ia, ka ko latou ake eiloa,

⁴olotou muna, “E 'tupu mafea a mea konei? Se a foki a te fakailoga ka iloa ei ne matou a te aso ka 'tupu ei a mea konei?”

⁵Ko akoako atu a Iesu ki a latou, “Ke fakaeteete koutou, kae mo a ma fakavalea koutou ne se tino.

⁶E tokouke a tino ka o'mai i toku igoa kae fai ake penei, ‘Au ko ia!’ ko faka'segina ei a tino e tokouke.

⁷Ke se manava'se koutou, manafai ko lagona ne koutou a leo o tino taua ko pili mai io me ko tala o taua i koga 'mao. E 'tau o 'tupu a mea pena, kae se ko tona uiga me ko oko mai a te gataga.

⁸E taua te sua fenua mo te sua fenua, te sua malo mo te sua malo. Ka isi ne mafuie i koga valevale, pela foki mo oge. A mea konei, e fakatusa eiloa ki te 'mae o te fafine ka fai o fanau.

⁹“E tau mo koutou o fakaeteete. Me ka puke koutou ne tino o 'moli ki te fono. Ka kini foki koutou i loto i fale tapuaki; ka 'tu foki koutou i mua o pule, tupu ona ko toku igoa, i te folafola atu ne koutou ki a latou te Tala 'Lei.

¹⁰E 'tau o folafola atu muamua te Tala 'Lei ki tino katoa.

¹¹Kae kafai ko puke koutou ne latou o 'moli ki te fono, sa muamua o manava'se me ne a otou pati ka fai; me kafai e oko mai te taimi, fai'pati fua ki muna e tuku atu ki a koutou. Me i muna e faipati atu ne koutou, e se e a koutou; ne muna e vau mai i te Agaga Tapu.

¹²Ka tuku atu ne tino olotou taina tonu ke tamate, e pena foki tamana ki olotou tama; ka 'teke foki a fanau ki olotou matua, kae tamate foki ne latou.

¹³ Ka ita tino ki a koutou ona ko au. Ka ko te tino tela e taofi mau ne ia au ki te ikuga, e ola a ia.”

¹⁴ “Ka matea ne koutou ‘A te Mea Fakamataku Faigata’ e tu i te koga e se 'tau o tu i ei.” E 'tau mo te tino faitau o malamalama i te uiga o te mea nei! “A tino kola e 'nofo i Iutaia e 'tau o 'tele ki koga maluga'luga.

¹⁵ A te tino e nofo i luga i te tuafale, e se 'tau mo ia o toe fanaifo ki lalo i te fale o puke se mea i ei ke fano mo ia.

¹⁶A te tino e nofo i te fatoaga, e se 'tau o foki ki te fale o puke mai tona gatu.

¹⁷Ko seai la se faigata pela ki fafine fai'tama, mo failele mo olotou pepe manafai e oko mai aso kona!

¹⁸'Talo ki te Atua ko te mea ke se 'tupu a mea konei i aso o te tau 'moko.

¹⁹ Me i te fakalavelave faigata tena, ko te toe fakalavelave faigata eiloa fatoa iloa ne te lalolagi, talu mai te kamataga o faite te lalolagi ne te Atua ke oko mai eiloa ki te aso tenei. Kati e seai ake foki eiloa se mea fakamataku pena e toe tupu.

²⁰Ka ko te Aliki, ko oti ne fakamu'tana ne ia te aofaki o aso fakama'taku kona; moi se fai ne ia pena, e seai lele eiloa se tino e ola. Kae ne ala o fakamu'tana ne ia aso kona ona ko tino filifilia.

²¹“Tela la, kafai se tino e fai mai ki a koutou, ‘Kiloke, tenei te Keliso!’ io, ‘Kiloke, tela te Keliso!’ sa talitonu ki ei.

²²Me ka 'sae mai a Keliso mo pelofeta 'loi. E fai ne latou ne fakailoga mo mea fakaofoofogina o fakaloiloi a tino filifilia, ki te mea e mafai ne latou.

²³Ke matapula koutou! Ko taku atu ne au a mea konei, ka koi tuai o oko mai a aso kona.”

²⁴ “A te la ka pouli faeloa mai tua o aso kona, kae se toe 'pula te masina.

²⁵A fetu e tatela ifo mai te lagi, ka ko mea ma'losi i te lagi ka gasue'sue foki.

²⁶ Ko vau ei au te Tama a te Tagata, e vau i kaumana i te 'mana mo te 'malu.

²⁷Ko uga ei ne au agelu ki feitu e fa o te lalolagi o fakamaopoopo mai a tino filifilia a te Atua, mai te sua feitu ki te sua feitu o te lalolagi.”

²⁸“Ke fai a te lakau ko te mati mo akoakoga ki a koutou. Kafai ko lanu launiu ona kaula kae malu'lu, kae 'tupu ake foki ona lau, ko iloa ei ne koutou me ko pili mai te tau 'vela.

²⁹E pena foki eiloa manafai ko kamata o 'tupu a mea fakama'taku kona, ko iloa ei ne koutou, me ko pili o oko mai aso kona.[21]

³⁰Ke masaua a te mea nei! E 'tupu katoa a mea konei ka koi tuai o 'mate a tino konei e ola.

³¹E palele atu te lagi mo te lalolagi; kae e se mafai eiloa o palele atu aku muna.”

³² “E seai se tino e iloa ne ia a te oko mai o te aso tena mo te itula tena. E oko ki agelu e se iloa foki ne latou. E pena foki te Tama; ka ko te Tamana fua e iloa ne ia.

³³Ke matapula koutou, kae ke toka foki, me e se iloa ne koutou me ko afea e taunu ei a mea kona.

³⁴ E fakatusa a aso kona ki se tino ko faimalaga keatea mai tona fenua ki se isi fenua, kae tuku ne ia ana tavini ke tausi ana mea, kae tofu eiloa a te tavini mo tena galuega e fai; kae fakatonu atu foki te tino tausi te mataloa ke matapulapula a ia.

³⁵Tela la, ke matapula koutou, me e se iloa ne koutou a te taimi e oko mai ei a te pule o te fale. E mafai o oko mai i te afiafi, i te valuapo, mai mua o te vaveao io me ko te taeao pogipogi.

³⁶Kafai e oko fakavave mai, ke se maua mai koutou ne ia e 'moe.

³⁷Ko te muna e fai atu ne au ki a koutou, e tena foki taku muna e fai atu ki tino katoa: Ke matapula koutou!”