Read Te Tusi Tapu I Te Gana Tuvalu Lomiga Lua MALEKO 14 Bible Online

MALEKO 14 - Te Tusi Tapu I Te Gana Tuvalu Lomiga Lua bible

MALEKO 14

¹ Toe lua mai aso kae oko ki te 'Kaiga o te Paseka mo Falaoa e se Fakafete. Ne taumafai a faitaulaga sili mo faiakoga o te Tulafono ki se auala o puke 'funa ne latou a Iesu o tamate.

²Ne fai ake olotou muna penei, “E se 'tau mo tatou o fai a te mea nei i te taimi o te 'kaiga, i te mea mana ua'te valevale a tino.”

³ Ko nofo nei a Iesu i loto i te fale o Simona te lepela i Petania. Ka koi kai a ia, ne ulu mai te fafine mo te fagu alapasa e fonu i sinu manogi e faite mai te lakau ko te nato. Ne 'fo ne ia te fagu kae ligi te sinu manogi i luga i te ulu o Iesu.

⁴E isi ne tino ne 'tu i kona ko oko eiloa i te ita, kae fai ake olotou pati penei, “Se a te mea ka fakamaumau ei fua a te sinu manogi tenei?

⁵Ne 'tau o 'togi atu a te sinu tenei e silia atu mo te tolu selau tupe siliva,[22] kae tuku atu te tupe mō tino ma'tiva!” Ne faifai muna se 'tau latou ki te fafine tena.

⁶Kae ne fai atu a Iesu: “Sa fakalavelave ki a ia! Ai a e fia 'saga fua ei koutou ki a ia? Ko oti ne fai ne ia te mea sili i te gali kae 'lei mō oku.

⁷ A koutou e 'nofo tasi eiloa mo tino ma'tiva, kae e mafai ne koutou o fesoasoani ki a latou i so se taimi e ma'nako koutou ki ei. Ka ko au e se nofo mau i a koutou i aso katoa.

⁸Ko fai ne ia te mea e mafai ne ia o fai: ne 'ligi ne ia te sinu manogi i luga i toku foitino o fakatoka ne ia au mo toku tanuga mai mua nei.

⁹Ke masaua a te mea nei! So se koga e folafola atu ki ei te tala 'lei i te lalolagi katoa, ka salalau atu foki a te mea ne fai ne ia, e fakamasaua ei a tena mea ne fai.”

¹⁰Ka ko Iuta te Isikaliota tela ko ia se tokotasi o te kau soko, ne fano a ia ki faitaulaga sili ki se auala e tuku atu ei ne ia a Iesu ki olotou lima.

¹¹Ko oko eiloa i te lotou fia'fia ki ana fakamatalaga, tauto ei latou me avatu ne latou a tupe ki a ia. Tela, mafaufau ei a Iuta ki se taimi 'lei o fakalata ne ia a Iesu.

¹²I te aso muamua o te 'Kaiga o Falaoa e se Faka'fete, ko te aso tela e ta ei a tama mamoe mo te Paseka, ne fesili mai a soko o Iesu ki a ia: “Tefea te koga e manako koe ki ei, ke olo matou o fakatoka tau 'Kaiga o te Paseka?”

¹³Uga atu ei ne Iesu a te tokolua soko ke olo o fakatoka mo tena fakatonuga penei: “Olo ki te fa'kai, kae ka fetaui koulua mo te tino e amo ne ia te tia vai.

¹⁴Tautali i ona tua ki te fale e ulu ki ei, kae fai atu ki te tino e o ia te fale: ‘Muna a te Faiakoga, Tefea toku potu tela ka 'kai ei au mo oku soko i te 'kaiga o te Paseka?’

¹⁵Ka fakaasi atu ne ia a te potu lasi tafa ki luga, ko oti ne fai faka'lei kae fakatoka. Ko fakatoka la ne koulua a mea katoa ke toka 'lei mō tatou.”

¹⁶Ne olo te tokolua soko kona ki te fa'kai, kae ne maua atu katoa ne laua a mea e pela eiloa mo pati a Iesu ne fai; fakatoka ei ne laua a te 'kaiga o te Paseka.

¹⁷I te okoga ki te afiafi, oko mai ei a Iesu mo te tinoagafulu mo te tokolua soko.

¹⁸ Ka koi 'kai latou, fai ake ei a muna a Iesu penei: “Au e fai atu, e tokotasi o koutou e fakalata ne ia a au. Ko ia tenei e 'kai tasi maua.”

¹⁹Ne se toka te kau soko, fesilisili atu ei latou taki tokotasi ki a Iesu, “E a, mata ko au e fakauiga ki ei tau pati?”

²⁰Ne tali atu a Iesu, “Se tino e tokotasi mai i a koutou o te tinoagafulu mo te tokolua, ko ia tela e 'fui tasi a ma falaoa ki te ipu e tasi.

²¹Ka ko au te Tama a te Tagata, e mate eiloa, e pela eiloa mo muna a te Tusi; kae kalofa eiloa i a ia tela e fakalata ne ia te Tama a te Tagata! E sili atu manafai e se fanau mai a te tino tena ki te lalolagi!”

²²Ka koi 'kai latou, ne puke a Iesu ki te falaoa, kae fai tena 'talo fakafetai, ko tofitofi ne ia, kae tufatufa atu ki ona soko, ana muna, “Puke, ko toku foitino tenei.”

²³Ne puke foki ki te ipu, ko fakafetai ki te Atua, kae tuku atu ne ia ki a latou, kae ne inu katoa ki ei.

²⁴Muna a Iesu, “Ko toku toto tenei ko fakamaligi mo te tokoukega. A toku toto e fakamau fakailoga ki ei te feagaiga a te Atua.

²⁵Au e fai atu ki a koutou, e se toe inu eiloa au ki te uaina, ke oko ki te aso e inu ei au ki te uaina fou i te Malo o te Atua.”

²⁶Tela, usu ei te lotou pese, ulu ei ki tua o olo ki te Mauga o Olive.

²⁷ Kae i te lotou ologa tena, ne fai atu a Iesu ki a latou: “A koutou e 'tele katoa keatea kae tiaki au, me ne fai mai te Tusi, ‘E tamate ne te Atua a tausi mamoe, ko mafuta valevale ei a mamoe. ’

²⁸ Kae kafai ko oti ne toetu au mai te mate, ka mua atu au i a koutou ki Kalilaia.”

²⁹Ne fai atu a Petelu ki a Iesu, “Kafai e tiakina koe ne latou nei, kae e se tiaki eiloa ne au koe!”

³⁰Muna a Iesu ki a Petelu, “Ke masaua ne koe a te mea nei, ka koi tuai o tagi fakalua a te moa i te po nei, ka ko fakafiti fakatolu mai koe me se ke iloagina au.”

³¹Kae ne tali mai fakapatonutonu a Petelu ki a Iesu, ana muna: “E se mafai lele eiloa o fakafiti au me se iloa ne au koe, ke oko foki eiloa manafai ka fai o 'mate tasi taua, e se mafai lele o fakafiti ne au koe!” Ne pena katoa a pati a te kau soko.

³²I te lotou okoga ki Ketesemane i te Mauga o Olive, fai atu ei a Iesu ki ona soko penei, “'Nofo mua i konei ke fano au o 'talo.”

³³Puke ei ne ia a Petelu, Iakopo mo Ioane ke olo latou. Ko oko mai te manavase mo te se toka ki a ia,

³⁴fai atu ei a ia ki a latou: “Ko oko eiloa i te fanoanoa o toku loto, toe itiiti eiloa ko malukuluku valevale toku loto. 'Nofo i konei ka ke matapula'pula koutou.”

³⁵Ne momea atu ke tai 'mao malie mo latou, fakasiga ifo ei a ia ki lalo o talo, me e a, e mafai ke se oko ifo ki a ia a te faigata o te itula o puapuaga.

³⁶Ne 'talo atu a ia penei, “Tamana! Toku Tamana! E mafai a mea katoa i a koe. Ave keatea a te ipu tenei mai i a au. Ke se fai te mea e loto au ki ei, ka ko tou loto.”

³⁷Ne toe foki mai ki te koga tena, kae ne maua atu ne ia a te tokotolu soko e 'moe, tela fai atu ei a ia ki a Petelu, “Simona a koe e moe? E se mafai eiloa ne koe o 'pula i se itula?”

³⁸Tela, fai atu ei a Iesu ki a latou, “Ke matapula'pula koutou kae 'talo, ke mo a e pa'ku atu koutou ki te fakaosoosoga. E malosi te agaga, ka ko vaivai te foitino.”

³⁹Ne toe fano keatea o 'talo, kae ne fai foki eiloa ne ia ana pati ko oti ne fai i tena 'talo muamua.

⁴⁰Ne toe foki ki soko kae toe maua ake foki ne ia me 'moe; ko se mafai eiloa ne latou o 'pula olotou mata. Ko se iloa ne latou me ne a olotou pati ka fai atu ki a ia.

⁴¹I te fokimaiga a Iesu i te fakatolu ki ona soko, ne fai atu a ia ki a latou: “E a, koi 'moe kae malo'lo eiloa koutou? Ko lava te 'moe! Ko oko mai te taimi! Kilo mai ki a au te Tama a te Tagata, ko pili o tuku atu nei ki te pulega a tino agasala.

⁴²'Tu ki luga i a tatou ka olo. Kiloke, tenei te tino tela e fakalata ne ia au!”

⁴³Ka koi faipati a ia, kae oko mai a Iuta, ko ia se tokotasi o te tinoagafulu mo te tokolua soko, ne o'mai fakatasi mo te vaitino, e puke mai i olotou lima a pelu mo pago. Ne uga mai latou ne faitaulaga sili, faiakoga o te Tulafono mo toeaina.

⁴⁴Ne fai ne te fakalata a te fakailoga ki te vaitino: “A te tino e sogi au ki ei, ko ia tena e ma'nako koutou ki ei. Puke ne koutou a ia o ave, kae ke leoleo faka'lei ne sotia.”

⁴⁵I te taimi ne oko mai ei a Iuta, ne fanatu a ia ki a Iesu, kae fai atu, “Te Faiakoga!” kae sogi ki ei.

⁴⁶Puke fakapagota ei ne latou a Iesu, kae taofi mau ne latou.

⁴⁷Kae e tokotasi te tino e tu pili mai i kona, ne tata ake ne ia tena pelu, kae kati ne ia te taliga o te tavini a te Faitaulaga Pule ke to keatea.

⁴⁸Ne faipati ki luga a Iesu, kae fai atu ki a latou: “Ne o'mai koutou mo pelu mo pago o puke fakapagota au e pela mo se tino ofa tulafono?

⁴⁹ 49 I aso katoa e nofo faeloa au i a koutou i loto i te Fale Tapu o akoako, kae ne se puke fakapagota au ne koutou. Kae e 'tau o fakataunu a muna a te Tusi.”

⁵⁰Tiaki ei a ia ne soko katoa kae 'tele keatea.

⁵¹E isi se tamatane, e pei ki gatu lino ne tautali ia Iesu. Ne taumafai latou o puke a ia,

⁵²kae ne tele fuafua a ia keatea, kae tiakina te gatu lino.

⁵³Ne ave ne latou a Iesu ki te fale o te Faitaulaga Pule, kola e potopoto mai ei a Faitaulaga Sili, toeaina mo faiakoga o te Tulafono.

⁵⁴Ne tautali 'mao mai a Petelu i olotou tua, ulu atu ei foki ki loto i te lotoa o te fale o te Faitaulaga Pule. Sagasaga ifo ei i kona fakatasi mo leoleo, e fakavelavela i tafa o te afi.

⁵⁵A Faitaulaga Sili mo te Fono katoa, ko taumafai o fai ne mau ke tamate ei a Iesu, kae e seai eiloa se lotou mau ne maua.

⁵⁶E tokouke a tino molimau ne fai olotou mau 'loi e uiga ki a Iesu, kae e kesekese katoa olotou mau.

⁵⁷E isi ne tino ne 'tu ake ki luga kae fai te lotou mau loi tenei e uiga ki a Iesu:

⁵⁸ “Ne lagona ne matou tena muna, ‘Ka ofa ne au a te Fale Tapu tenei ne faite ne tino, kae i aso e tolu, ka toe faite ake ne au se isi Fale Tapu tela e se faite ne tino.”’

⁵⁹E se mafai foki ne latou kona o fai ke pau olotou mau.

⁶⁰Ne tu ake a te Faitaulaga Pule i mua o latou katoa, kae fesili mai ki a Iesu: “E a, e seai sau tali ki mau e uiga ki a koe?”

⁶¹Ne se mu eiloa a Iesu. Ne toe fesili mai foki a te Faitaulaga Pule: “A koe ko te Keliso, te Tama a te Atua e ona vikiga!”

⁶² Ne tali atu a Iesu, “Ao, kae ka matea ne koutou au te Tama a te Tagata e nofo i te feitu fakaatamai, tela ko te feitu taua o te Atua 'Malu, e vau i kaumana o te lagi!”

⁶³Ne 'sae ne te Faitaulaga Pule tena gatu kae fai ake penei, “Ko se toe ma'nako tatou ki nisi tino molimau ake!

⁶⁴ Ko lagona mai ne koutou ana muna se 'lei. Se a la te otou taofi ki ei?” Ne sisi katoa olotou lima me sala a ia, kae 'tau o tamate.

⁶⁵E isi ne tino ne puapuaki ki a Iesu, kae fakapulou ona mata kae kini, kae fai atu ki ei, “Mate mai ake me ko oi ne kini ne ia koe?” Ne puke atu ki ei a leoleo kae laupapa a ia.

⁶⁶A Petelu koi nofo eiloa i loto i te lotoa o te fale o te Faitaulaga Pule, i te ulumaiga ki loto a te tavini tamafine a te Faitaulaga Pule.

⁶⁷I te mateaga ne ia Petelu e fakavelavela tena foitino, kilo tonu atu ei ki a ia, kae fai atu, “A koe foki ne fakatasi mo Iesu te Nasaleta.”

⁶⁸Kae ne fakafiti a Petelu, ana muna, “E se iloa eiloa ne au au muna kona e fai mai.” Fano ei a Petelu i te ala ki tua. I kona foki eiloa kae tagi mo te moa.[23]

⁶⁹Ne toe matea foki a ia ne te tavini tamafine i kona, kae toe faipati ake ki tino e tu'tu pili mai penei, “A ia foki se tokotasi o latou!”

⁷⁰Ne toe fakafiti foki a Petelu. E seki leva, kae fai atu a tino ne tu'tu pili i kona ki a Petelu penei, “E se mafai ne koe o fakafiti ia koe se tino Kalilaia.”

⁷¹Tauto ei a Petelu, ana muna, “Ke fakasala au ne te Atua manafai e se tonu taku mau! E se iloa ne au a ia tena e fai'pati mai ei koutou!”

⁷²I kona foki eiloa kae tagi te moa i te fakalua, masaua ei ne Petelu a muna a Iesu ne fai ki a ia, “Ka koi tuai o tagi fakalua te moa, ka ko fakafiti fakatolu koe me se ke iloagina Au.” Ne tagi mautuutu ei a ia.