Read Te Tusi Tapu I Te Gana Tuvalu Lomiga Lua MALEKO 15 Bible Online

MALEKO 15 - Te Tusi Tapu I Te Gana Tuvalu Lomiga Lua bible

MALEKO 15

¹I te taeao pogipogi eiloa, ne fono fakavave a faitaulaga sili mo toeaina, pela foki mo faiakoga o te Tulafono, mo te Fono katoa o fai olotou aofaga. Ne saisai ne latou a Iesu ki seni, puke kae takitaki atu ki a Pilato.

²Ne fesili mai a Pilato ki a ia: “A koe ko te Tupu o tino Iutaia?” Ne tali atu a Iesu, “E pena eiloa mo au muna.”

³Ne fai a mau e uke a faitaulaga sili e uiga ki a Iesu,

⁴tela, toe fesili mai ei a Pilato ki a ia: “E seai sau tali ki ei? Kiloke i te uke o mau e 'moli mai ei koe ne latou!”

⁵E seai eiloa se tali a Iesu ne fai ki ei, ka ko ofo masei a Pilato i ei.

⁶I taimi katoa o te 'Kaiga o te Paseka, e masani Pilato o fakasaoloto ne ia a te pagota e ma'nako ki ei a tino.

⁷I te taimi tena, e isi se tino e igoa ki a Palapa e pei i loto i te fale puipui mo tino tatino kola ne tatino i te taimi ne taua ei tino o 'teke ki te malo.

⁸I te taimi ne maopoopo ei a te kau tena, fai atu ei latou ki a Pilato ke fai ake te lotou loto.

⁹Ne fai atu a Pilato ki a latou: “E ma'nako koutou ke fakasaoloto atu ne au ki a koutou a te tupu o tino Iutaia?”

¹⁰E iloa 'lei eiloa ne ia i faitaulaga sili, me ko oti ne tuku atu ne latou a Iesu ki a ia, ona ko te loto masei.

¹¹Ka ko faitaulaga sili ne fakamakosu ne latou a te vaitino ke 'tala mai a Palapa ki a latou, kae se ko Iesu.

¹²Ne faipati atu a Pilato ki te vaitino: “Se a te mea e loto koutou ke fai ne au ki te tino tenei, e fakaigoa ne koutou ko te tupu o tino Iutaia?”

¹³Ne toe ka'laga mai, “Fakasataulogina!”

¹⁴Muna a Pilato, “Kae se a la tena sala?” Ka ko na paka'laga ei latou ki luga, “Fakasataulogina.”

¹⁵Ko manako a Pilato o fakamalie a loto o tino, tela 'tala atu ei ne ia a Palapa ki a latou. Kae tuku atu ne ia ke kini a Iesu kae tuku atu ke fakasataulo.

¹⁶Ne ave ne sotia a Iesu ki loto i te lotoa o te fale o te Kovana, kae fakamaopoopo fakatasi a te kau katoa.

¹⁷Ne fakapei ne latou a Iesu ki te gatu kula, ko te gatu o te tupu, kae fai ne latou a te foualiki mai lakau makai'kai, kae tuku atu ki luga i te ulu o Iesu.

¹⁸Kamata ei latou o faifai muna ki a ia, olotou muna, “Ke manuia te tupu o tino Iutaia!”

¹⁹Kae ne pagopago ne latou a tona ulu ki te lakau, puapuaki ki ei, ne totuli ifo foki o fakaalo ki a ia.

²⁰I te otiga ne fakatauemu ki a ia, toe tapale ei ne latou te gatu kula, kae toe fakapei ona gatu. 'Taki ei ne latou ki tua o te fa'kai o fakasataulo a ia.

²¹ I te lotou ologa, ne fetaui latou mo te tagata e igoa ki a Simona, tela e vau mai te vao o fano ki te fa'kai, fakamalosi ei ne latou ke amo ne ia te sataulo o Iesu. A Simona tenei se tino Kulene, ko te tamana o Alesana mo Lufo.

²²Ne aumai ne latou a Iesu ki Kolokota, ko tona uiga “Ko te Koga o Gatiulupoko.”

²³Ne taumafai latou o tuku atu ki a ia a te uaina e palu mo te vailakau e igoa ki te mulo, ka ko te mea e se inu ki ei a Iesu.

²⁴ Ne fakasataulo ne latou a ia kae tufatufa ona gatu ia latou, kae fai te vili ke iloa me tefea tonu te vaega o te tino e 'tau o maua ne ia.

²⁵Ko te iva i te taeao ne fakasataulo ei ne latou a Iesu.

²⁶Ne tusi foki a muna kola ne ala ei a ia o fakasataulo, “Ko te Tupu o tino Iutaia.”

²⁷Ne fakasataulo foki ne latou a te tokolua tino faomea. E tokotasi i tona feitu fakaatamai kae tokotasi i tona feitu fakamaui.[24]

²⁸(Ko taunu ei a muna a te Tusi penei: “Ko aofia foki a ia ki tino faomea.”)

²⁹ A tino ne 'tipa ake i kona, ne tugakigaki olotou ulu, kae pati fakatauemu ki a Iesu: “Ko koe tela ne fai ke ofa ne koe te Fale Tapu, kae toe faite i aso e tolu!

³⁰Fanaifo ki lalo mai te sataulo o fakasao koe!”

³¹Ne fakatauemu foki a faitaulaga sili mo faiakoga o te Tulafono ki a Iesu, olotou muna i a latou eiloa: “Ne fakaola ne ia a tino, kae se maua ne ia o fakaola a ia!

³²Ke onoono ake tatou ki te Keliso, ko te tupu o Isalaelu, ke fanaifo nei ki lalo mai te sataulo, ko talitonu ei tatou ki a ia!” Ne faifai muna se 'tau foki ki a Iesu a te ava tokolua kola ne fakasataulo fakatasi mo ia.

³³I te tutonu ne pouli katoa te fenua e tusa mo te tolu itula.

³⁴ I te itula e tolu, ne tagi pakalaga a Iesu penei, “Eloi, Eloi, lama sapakatani?” Ko tona uiga, “Toku Atua, toku Atua, ai a ko tiaki mai ei au ne koe?”

³⁵A nisi kola ne i kona ne lagona ne latou ana pati, fai ake ei latou, “Faka'logo ake, ko kalaga ki a Elia!”

³⁶E isi se tino o latou ne tele atu ki ei mo te omomi, faka'siu ki te uaina, kae tuku ki te mata o te lakau, kae tuku atu ki laugutu o Iesu, kae fai ake, “Faka'tali, ke onoono ake tatou me e vau a Elia o aveifo a ia ki lalo mai te sataulo me ikai!”

³⁷Ne tagi pakalaga a Iesu, ko te mea eiloa ko mate.

³⁸ A te laugatu o te 'pui tela e tautau i te Fale Tapu, ne masaelua mai luga i ki lalo.

³⁹A te ofisa o te kautau tela ne tu i mua o te sataulo, ne matea ne ia te tagi pakalaga o Iesu kae mate, kae fai ake ana muna,[25] “A te tagata tenei, ko te Tama eiloa a te Atua!”

⁴⁰ E isi foki ne fafine ne i kona, ne tu'tu mao mai. E iai i a latou kona ko Salome, Malia te Makatala, mo Malia te matua o Iakopo foliki mo Iose.

⁴¹Ne tau'tali latou i a Iesu i tena nofoga i Kalilaia, kae ne fesoasoani malosi ki a ia. E tokouke ake foki a nisi fafine ne i kona, kola ne o'mai fakatasi mo ia ki Ielusalema.

⁴²Ko fano eiloa o po kae oko mai a Iosefa te Alimataia.

⁴³A ia se tino o te Fono kae lasi tona fakaaloalogina, kae nofo fakatalitali ki te oko mai o te Malo o te Atua. A te Aso tenei ko te Aso Fakatoka, ko te aso tena mai mua o te Sapati, fanatu ei a Iosefa ki mua o Pilato, kae fakamolemole ki te foitino o Iesu.

⁴⁴Ne ofo Pilato o fakalogo i a Iesu ko leva ne mate. Ne kalaga atu a ia ki te ofisa o te kautau kae fai atu ki ei, me ko Iesu ko leva ne mate me ikai.

⁴⁵I te otiga a Pilato ne fakalogo ki te lipoti, fai atu ei a ia ki a Iosefa me ko mafai ne ia o puke te foitino o Iesu.

⁴⁶Ne 'togi ne Iosefa te sulukafu lino, tuku ifo ne ia te foitino, kofu ne ia ki te sulukafu, kae tuku ne ia i te tanuga ne tuki i kaupapa. Fakatakapili ei ne ia te fatu lasi ki te gutu o te tanuga.

⁴⁷A Malia te Makatala mo Malia te matua o Iose ne kilo'kilo atu ki a ia, kae ne matea foki ne laua a te koga ne fakatakato ei a te foitino o Iesu.