Read Te Tusi Tapu I Te Gana Tuvalu Lomiga Lua MALEKO 16 Bible Online

MALEKO 16 - Te Tusi Tapu I Te Gana Tuvalu Lomiga Lua bible

MALEKO 16

¹Mai tua ifo o te Sapati, a Malia te Makatala, Malia te matua o Iakopo mo Salome, ne 'togi olotou sinu ma'nogi o olo o 'mili te foitino o Iesu.

²I te taeao pogipogi eiloa i te Aso Tapu o te vaiaso, i te saega o te la, ne olo latou ki te tanuga.

³I te lotou ologa, ne fai ake olotou muna penei, “Ko oi ka fakatakafili ne ia te fatu mai te gutu o te tanuga mō tatou?”

⁴Se fatu lasi eiloa. Ne fakapela ake olotou mata, matea atu ei ne latou i te fatu ko oti ne fakatakafili keatea mai te tanuga.

⁵Ulu atu ei latou ki loto i te tanuga, matea atu ei ne latou te tamataene e sagasaga mai i te feitu fakaatamai, kae pei mai ki gatu kena, ka ko oko eiloa i te ma'taku.

⁶Ne fai mai a te tino tena ki a latou, ana muna, “Sa ma'taku. A koutou e 'sala ki a Iesu te Nasaleta tela ne fakasataulo. E se i konei a ia, ko oti ne toetu! Kiloke, tenei te koga ne fakatakato ei ne latou tena foitino.

⁷Olo nei o taku atu ki ona soko pela foki mo Petelu, a te fekau tenei: ‘Ko mua atu a ia i a koutou ki Kalilaia; ka fetaui koutou mo ia i kona, e pela eiloa mo ana muna ne fai atu.”’

⁸Olo ei ki tua latou mai te tanuga kae 'tele keatea, i te mea ko oko eiloa i te lotou ma'taku. E seai eiloa se tino e faipati ki te sua tino ona ko te ma'taku.

⁹[26] I te tafataeao eiloa i te aso muamua o te vaiaso, i te otiga ne toetu a Iesu mai te mate, ne muamua eiloa a ia o fakaasi atu ki a Malia te Makatala, ko ia tena ne tuli ne Iesu keatea a temoni e tokofitu mai i a ia.

¹⁰Ne fanatu a ia o taku atu ki ona takaga, kola e 'tagi kae fanoa'noa;

¹¹kae i te lotou lagonaga i a Iesu ko toe ola, ka ko oti foki ne matea ne ia, ne se tali'tonu ki a ia.

¹²Mai tua ifo, ne fakaasi atu a Iesu i se tulaga 'kese ki te tokolua soko, i te la auala i te vao.

¹³Ne 'foki mai laua kae tala atu ki nisi tino, kae ne se tali'tonu a latou ki ei.

¹⁴Fakamuli ifo, ne fakaasi atu a Iesu ki te tinoagafulu mo te tokotasi soko ka koi 'kai latou. Ne kote ne ia latou ona ko te se fakatuanaki, mo te loto make'ke o se talitonu ki tala a tino kola ne matea ne latou a ia ko toetu.

¹⁵Ana muna ki a latou: “Olo ki te lalolagi katoa, kae folafola atu te tala 'lei ki tino katoa.

¹⁶So se tino e talitonu kae papatisogina a ia, e fakaolagina; ko te tino e se talitonu e se fakaolagina.

¹⁷A tino talitonu, e tuku atu ki a latou a te fakailoga tenei o te mana: e 'tuli ne latou keatea a temoni i toku igoa; e fai'pati foki latou ki 'gana kesekese kola e se iloa ne latou;

¹⁸kafai e puke ki gata io me inu ki se mea poisini, e seai ne fakalavelave e 'tupu ki a latou; e tuku olotou lima i luga i tino masaki kae 'lei mo tino ma'saki.”

¹⁹I te otiga a te Aliki ko Iesu ne fai'pati mo latou, avake ei a ia ki te lagi, kae fakanofo i te feitu taua o te Atua, tela ko te feitu fakaatamai.

²⁰Ne olo sale a soko o folafola i so se koga a te tala 'lei, kae ne ga'lue eiloa latou mo te Aliki, kae ne fakamaonia foki ne ia me tonu te lotou folafolaga, i te tuku atu ne ia ki a latou a fakailoga o te mana.)[27]