Read Te Tusi Tapu I Te Gana Tuvalu Lomiga Lua MALEKO 2 Bible Online

MALEKO 2 - Te Tusi Tapu I Te Gana Tuvalu Lomiga Lua bible

MALEKO 2

¹I mo aso ki tua ifo ne toe foki atu Iesu ki Kapanaumi, kae ne salalau te tala e uiga ki a ia ko oko mai.

²Ne mumu mai a tino ki a ia, ka ko se ofi te fale ke oko foki eiloa ki te matafale. Ne folafola atu ne ia te muna ki a latou,

³ka ko nisi tino ne o'mai ne aumai ne latou a te tagata e masaki faka'mate, e tokofa latou ne sausau mai a ia.

⁴Ne se mafai ne latou o fakapilipili atu ki a ia ona ko te tokouke o tino. Tela, 'tala ei ne latou a te tuafale mai luga tonu eiloa o te koga e nofo i ei a Iesu. I te otiga ne 'tala ne latou te koga tena, tukutuku ifo ei ne latou te moega e takato i ei te tagata masaki.

⁵Ne iloa ne Iesu te lotou fakatuanaki, fai atu ei a ia ki te tino masaki, “Taku tama, ko magalo au agasala!”

⁶Ne 'nofo mai foki i kona nisi faiakoga o te Tulafono, ne mafaufau ifo foki latou i olotou loto penei:

⁷“Ai a e faipati se ava ei te tagata tenei ki te Atua? E se mafai ne se tino o fakamagalo agasala, na ko te Atua!”

⁸I taimi eiloa tena, iloa ei ne Iesu olotou mafaufauga 'funa, kae fai atu ki a latou: “Ai a e mafaufau ei koutou ki vaega mea kona?

⁹Tefea te mea e faigofie, ko te fai atu ki te tino masaki, ‘Ko magalo au agasala,’ io me ko te fai atu, ‘Tu ki luga puke tou moega kae sasale’?

¹⁰Tela la, ka fakamaoni atu ne au ki a koutou, i te Tama a te Tagata, e i a ia te pule o fakamagalo agasala i te lalolagi.” Tela, fai atu ei a ia ki te tagata masaki,

¹¹“Au e fai atu ki a koe, tu ki luga, puke tou moega kae fano ki tou fale.”

¹²E onoono atu eiloa latou ki te tuakega o te tagata tena, puke tena moega kae fano fakavave keatea. Ko oko eiloa te ofo o latou kae 'viki atu ki te Atua penei, “E seki matea lele eiloa ne tatou se mea penei mai mua!”

¹³Ne toe fanaifo a Iesu ki te tafatai o te namo o Kalilaia. E tokouke a tino ne ualolo atu ki a ia, kamata ei a ia o akoako atu ki a latou.

¹⁴Ka koi sasale ake a ia, lavea atu ei ne ia a Levi te tama a Alefaio te tino ao lafoga e nofo i tena ofisa. Ne fai atu a Iesu ki a ia, “Tautali mai i a au.” Tu ake ki luga a Levi kae tautali atu i a ia.

¹⁵Fakamuli ifo a Iesu ne fai 'kaiga i te fale o Levi.[5] E tokouke foki tino ao lafoga mo tino agasala ne tau'tali atu ia Iesu, a nisi o latou ne fakatasi atu ki a ia mo ona soko i te 'kaiga tena.

¹⁶A nisi faiakoga o te Tulafono ne Falesaio. Ne matea ne latou a Iesu e 'kai fakatasi mo tino agasala pela foki mo tino ao lafoga; fesili atu ei latou ki ona soko, “Ai a e 'kai fakatasi ei a ia mo tino konā?”

¹⁷Ne lagona ne Iesu, tali atu ei a ia ki a latou: “E se aoga te tokita ki tino ma'losi, kae aoga fua ki tino ma'saki. Au e seki vau o kalaga ki tino amiotonu, ka ko tino agasala.”

¹⁸I nisi taimi e masani saale o fakaliki'liki mō tapuakiga a soko o Ioane te Papatiso, pela foki a soko o te kau Falesaio. Tena te mea ne o'mai ei a tino kae fesili mai ki a Iesu, “Se a te mea e fakaliki'liki ei mo tapuakiga a soko o Ioane te papatiso pela foki mo soko o te kau Falesaio, ka ko ou soko e se ti fakaliki'liki mo tapuakiga?”

¹⁹Ka ko Iesu ne tali atu penei: “E mafai ne takaga o te tagata fatoa fakaipoipo o fakalikiliki mō tapuakiga, ka koi fakatasi latou mo te tagata fatoa fakaipoipo? E se mafai o fai pena i aso koi fakatasi ei latou mo te tagata fatoa fakaipoipo.

²⁰E isi eiloa te taimi e fano ei keatea te tagata fatoa fakaipoipo mai i a latou, ko te taimi tonu eiloa tena e fakaliki'liki ei latou mō tapuakiga.

²¹“E seai se tino e fono ne ia te gatu mago ki se kapa laugatu fou; me kafai e fai pena, e masae i ei a te gatu mago i te fono fou, ko na gasolo ei o masae.

²²E se utu foki ne se tino a te uaina fou ki fagu pa'kili manu ko leva; me kafai e fai pena e ma'fa i ei a fagu pa'kili manu i te uaina, ko maumau ei a fagu pa'kili mo te uaina. Tela la, a te uaina fou e 'tau eiloa o utu ki fagu pa'kili manu fou!”

²³ Ne sasale atu a Iesu fakatasi mo ona soko i loto i togasaito i te Sapati, tau ei ne ona soko a kaufui saito.

²⁴Tela, fai mai ei a te kau Falesaio ki a Iesu, “Kiloke, a te mea ko fai ne ou soko i te Sapati, ko te 'teke tena ki te Tulafono a tatou!”

²⁵Ne tali atu a Iesu ki a latou: “Kai faitau eiloa koutou i te mea ne fai ne Tavita i te taimi ne fia'kai ei a ia mo tena kau?

²⁶ Ne ulu atu a Tavita ki loto i te fale o te Atua, kae kai ki falaoa kola ne ofo atu ki te Atua. Ne tupu te mea tena i aso o te Faitaulaga Pule ko Aviata, ka ko te tonuga o te Tulafono a tatou ko faitaulaga fua e 'tau o 'kai ki falaoa kona. Ka ko Tavita ne kai ki ei, tuku atu foki ei ne ia ki tena kau.”

²⁷Ne fai atu foki a ia, “A te Sapati ne fai mō te 'lei o te tino; ka ko te tino seki fai mo te Sapati.

²⁸Tela la, au ko te Tama a te Tagata, ko te Aliki eiloa o te Sapati.”