Read Te Tusi Tapu I Te Gana Tuvalu Lomiga Lua MALEKO 3 Bible Online

MALEKO 3 - Te Tusi Tapu I Te Gana Tuvalu Lomiga Lua bible

MALEKO 3

¹Ne toe ulu atu a ia ki te fale tapuaki, kae ne nofo i kona te tagata e 'mate tona lima.

²Nisi tino ne 'nofo i kona ne fia 'moli ne latou a Iesu i sena mea 'se e fai; tela alamati ei ne latou a ia manafai e faka'lei ne ia se tino masaki i te Sapati.

³Ne fai atu a Iesu ki te tagata lima 'mate, “Vau ki mua nei.”

⁴Tela, fesili atu ei a ia ki tino:“Se a te mea e fakataga mai ne te Tulafono a tatou ke fai i te Sapati? Ko te fesoasoani, io me ko te fakamasei? Ko te fakaola o se tino, io me ko te tamate?” Ko seai eiloa se tino e faipati i te taimi tena.

⁵Ne fekilofaki mata o Iesu ki a latou mo te ita, kae fanoanoa foki ona ko te lotou loto make'ke mo te 'se olotou mafaufauga. Ne fai atu ei a ia ki te tagata, “'Fola ake tou lima.” Ne 'fola atu ne ia tona lima ko te mea eiloa ko 'lei.

⁶Tela la, ne olo ki tua te kau Falesaio o fai te lotou fono fakatasi mo te kau a Helota, ki se ala e mafai ei ne latou o tamate a Iesu.

⁷Ne olo atu a Iesu mo ona soko ki te Namo o Kalilaia, kae ne ualolo atu i a ia a te vaitino e tokouke. Ko tino mai Kalilaia mo Iutaia,

⁸mai Ielusalema, mai te itumalo o Itumaia, mai te feitu atu o te Iolitana, mo nisi tino mai fa'kai pili ki Tulo mo Saitonu. A te vaitino konei ne o'mai ki a Iesu i te 'logoga a latou i mea ne fai ne ia.

⁹Ne fai atu a ia ki ona soko ke fakatoka mai se poti mo ona sopo, ona ko te vaitino ko to tokouke, i te mea ma fakatau 'teke mai a tino ki a ia.

¹⁰Ona ko te faka'leiga ne ia a tino ma'saki e tokouke, tena fakatau 'teke mai ei a tino ma'saki, ko te mea ke pa'tele katoa mai latou ki a ia.

¹¹I so se taimi foki e lavea ei a ia ne tino e ulufia ne agaga ma'sei; ne faka'siga ifo latou i ona mua kae ka'laga penei, “A koe ko te Tama a te Atua!”

¹²Ne 'vao malosi atu a Iesu ki agaga ma'sei ke sa fakailoa atu ki se tino me ko oi a ia.

¹³Ne fanake a Iesu ki te mauga, kae kalaga atu a ia ki tino kola e loto a ia ki ei. Ne o'mai ki a ia,

¹⁴filifili ei ne ia a te tinoagafulu mo te tokolua, kae fakaigoa ne ia ki apositolo, kae fai atu penei, “Ko oti ne filifili ne au koutou ke 'nofo tasi tatou, ka uga atu foki ne au koutou ke olo o folafola atu te tala 'lei,

¹⁵kae ka maua foki ne koutou te pule o afuli keatea temoni.”

¹⁶Konei la igoa o te tinoagafulu mo te tokolua: Simona tela ne fakaigoa ne ia ki a Petelu;

¹⁷Iakopo mo tena taina ko Ioane, ko tama a Sepetaio, kae ne fakaigoa ne Iesu a laua ki a Poaneki, ko tona uiga “Tama a te Fatili”;

¹⁸Anitelea, Filipo, Patolomaio, Mataio, Toma, Iakopo te tama Alefaio, Tataio, Simona te Kanana,

¹⁹mo Iuta te Isikaliota, tela ne fai mo tino fakalata.

²⁰Fakamuli ifo, ne fano a Iesu ki te fale ne nofo ei a ia, kae ne toe 'luku atu foki ki a ia te vaitino e tokouke, ko se maua ei se taimi avanoa e 'kai ei Iesu mo ona soko.

²¹Ne 'logo tena kaiga i te mea tenei, olo atu ei latou o puke mai a ia me i tino ko fai ake pela, “A ia ko fakavalevale!”

²² A nisi faiakoga o te Tulafono ne o'mai mai Ielusalema ne fai ake pela, “Ko ulufia a ia ne Pelesipulo!” Kae muna mai nisi tino, “A Pelesipulo ko te aliki o temoni, tela ne tuku atu ne ia ki a Iesu a te pule e afuli ei keatea a temoni.”

²³Tela, kalaga atu ei a ia ki tino ke o'mai ki a ia kae fai atu ne ia ki a latou nisi tala fakatusa, “E mafai pefea ne Satani o afuli Satani?

²⁴Kafai e mavaevae se malo ki vaega fo'liki kae taua, te malo tena e se tumau.

²⁵Kafai foki e mavaevae se kaiga ki vaega fo'liki kae taua, te kaiga tena e se tumau.

²⁶Kafai e mavaevae ki vaega fo'liki te malo o Satani, e se mafai o tumau, kae ka malepelepe, ko tona ikuga foki eiloa tena.

²⁷“E seai se tino e mafai o ulu atu ki te fale o te tagata mafi o puke ana mea, seiloga ke mua o saisai ne ia a te mafi, ko fatoa mafai ei ne ia o puke a mea a te tagata mafi.

²⁸“E tonu au e fai atu ki a koutou, e mafai o fakamagalogina agasala katoa a tino pela foki mo muna ma'sei e fai ne latou.[6]

²⁹ Ka ko te tino tela e muna masei ki te Agaga Tapu, e se mafai lele eiloa o fakamagalogina ke oko ki te se gata mai.”

³⁰Ne fai atu ne Iesu te muna tenei me ne fai ake pela nisi tino, “E i a ia te agaga masei.”

³¹Fakamuli ifo, ko oko mai te matua mo taina o Iesu. Ne 'tu mai latou i tua, kae fai mai te fekau ke fanatu ke fai'pati latou.

³²Ne 'nofo mai i ona tafa te vaitino, ne fai mai foki ki a ia, “Iesu, a tou matua mo ou taina kola e 'tu mai i tua, e ma'nako mai ki a koe.”

³³Kae ne tali atu a Iesu ki a latou penei: “Ko oi toku matua? Ko oi foki oku taina?”

³⁴Ne kilokilo saale ona mata ki tino kola e 'nofo fakapukupuku i ona tafa, kae fai atu a ia ki a latou, “Kiloke, konei e saga'saga mai toku matua mo oku taina.

³⁵Ko te tino tela e fai ne ia te loto o te Atua ko toku taina tena mo toku tuagane mo toku matua.”