Read Te Tusi Tapu I Te Gana Tuvalu Lomiga Lua MALEKO 5 Bible Online

MALEKO 5 - Te Tusi Tapu I Te Gana Tuvalu Lomiga Lua bible

MALEKO 5

¹Ne oko atu latou ki te sua feitu o te Namo, ki te fenua o tino Kelesene.

²Ne fanake a Iesu mai te poti, kae ne fakafetaui atu te tagata ne vau mai tanuga.

³A te tagata tenei ne ulufia ne te agaga masei, kae ne nofo a ia i tanuga. Ne seai eiloa se tino ne mafai o saisai a ia ki seni;

⁴i te mea ko uke taimi ne saisai ei ona vae mo ona lima; kae motumotu faeloa ne ia a seni, kae ofa ne ia a pikifao i ona vae. A te tagata tenei ko to malosi, tela ko se mafai ei ne se tino o puke a ia!

⁵I ao mo po e fano sale faeloa a ia i tanuga mo mauga, e pakalaga kae selesele foki a ia ne ia eiloa ki fatu.

⁶Ne lavea 'mao atu ne ia a Iesu, kae ne tele atu o ifo ki a ia.

⁷Ne kalaga atu foki a ia mo te leo lasi penei, “Iesu te Tama a te Atua tafa sili i te Maluga! Se a te mea e manako ei koe ki a au? I te igoa o te Atua, ko fai atu ei au ki a koe, sa fakasalagina au!”

⁸Ne fai mai a ia pena ona ko Iesu ne faipati atu ki a ia penei, “Te Agaga masei, fano keatea!”

⁹Tela fesili atu ei a Iesu ki a ia, “Ko oi tou igoa?” Ne tali mai a ia penei, “Toku igoa ko Lekeono, ko tona uiga e tokouke matou!”

¹⁰Fakatagi atu ei a ia ki a Iesu, ke sa afuligina latou mai te fenua.

¹¹E isi foki se lafu puaka e kai'kai pili mai i tafa o te mauga.

¹²Ne fakatagi mai foki agaga masei ki a Iesu, “Uga atu matou ki puaka ke ulu matou ki ei.”

¹³Tela, tuku atu ei latou ke olo ki puaka. Olo ei keatea agaga masei mai te tagata, kae ulu atu ki puaka. A te lafu puaka, e tai katoa te lua afe ne 'tele ifo i kautafa o te mauga, eva ki loto i te vai ma'lemu katoa ei.

¹⁴A tino tausi puaka ne 'tele ki te fa'kai, kae tala atu ne latou a te mea ne tupu, tela o'mai ei a tino o onoono ki ei.

¹⁵Ne o'mai latou ki a Iesu, matea ei ne latou te tagata ne ulufia ne temoni, e sagasaga atu, ko fai ona gatu, ka ko atamai foki, tela, ma'taku ei latou.

¹⁶A tino ne lavea ne latou, ne fakamatala atu ne latou a te mea ne tupu ki te tagata ne ulufia ne temoni, mo te mea ne tupu ki puaka.

¹⁷Tela, fakatagi mai ei latou ki a Iesu, ke fano keatea mai te lotou fenua.

¹⁸I te taimi ne sopo ei Iesu ki te poti, ne fakamolemole mai te tagata ne ulufia, “Ke olo tasi taua!”

¹⁹Ne seki talia ne Iesu, kae ne fai atu ki a ia, “Foki ki tou fale i tou kaiga, kae taku atu ki a latou a mea e uke ne fai ne te Aliki mō koe, mo tena alofa lasi mō koe!”

²⁰Tela, fanatu ei a ia ki fa'kai e sefulu e igoa ki a Tekapoli, o tala atu a mea ko oti ne fai ne Iesu mō ia; ka ko tino ne lagona ne latou ko oko eiloa i te ofo.

²¹Ne toe foki atu a Iesu ki te sua feitu o te namo. Ne oko atu a ia ki ei, kae mumu atu a te vaitino ki a ia.

²²I te taimi tena ne vau ki a ia se tino pule i te fale tapuaki i kona, ko Iailo tena igoa, ne totuli kae ifo atu ki a ia,

²³kae fakatagi atu mo te loto katoatoa penei: “A taku tamaliki fafine ko oko eiloa i te masaki. Au e fakatagi ki a koe me a, e mafai o fanatu koe o fakaeke ake ou lima ki luga i a ia, ko te mea ke ola!”

²⁴Tela, olo ei laua; kae ualolo atu te vaitino i ona tafa ko i takitaki eiloa.

²⁵E isi se fafine i kona e tafe tena sua i tausaga e sefulu lua,

²⁶e uke a mea ne fi'ta ei a ia i tokita, palele ana koloa ne fakamaumau, kae seai eiloa se 'lei ne maua ne ia, ka ko na gasolo ake ei o masei.

²⁷Ne logo a ia i tala e uiga ki a Iesu, tela fakatōtō atu ei a ia i te vaitino i tua o Iesu.

²⁸I tena manatu, “Ko au fua ke patele atu ki te gatu o Iesu, ko 'lei ei au.”

²⁹I te patelega a ia ki te gatu o Iesu, 'lei ei tona masaki, ka ko lagona ifo foki eiloa ne ia i tena foitino ko 'lei.

³⁰I taimi eiloa tena, ne lagona ne Iesu a te mana ko fano keatea mai i a ia. Tela, saga atu ei a ia ki te vaitino, kae fai atu, “Ko oi te tino ne fakapatele mai ki toku gatu?”

³¹Kae tali atu ona soko, “E matea eiloa ne koe te i takitaki atu o tino ki a koe, kae fesili mai faeloa koe, me ko oi ne patele atu ki a koe?”

³²Ka ko Iesu ne kilokilo sale ona mata, me ko oi ne fakapatele atu ki a ia.

³³Ka ko te fafine ko polepole eiloa i te mataku i te mea ko tupu ki a ia; tela, fakapaku ifo ei ki vae o Iesu; kae fakaasi tonu atu me ko ia.

³⁴Ko Iesu eiloa ko fai atu ki a ia, “Taku tama, ko tou fakatuanaki ko ola ei koe. Na fano la mo te manuia, i a koe ko 'lei.”

³⁵Ka koi faipati atu a Iesu ki ei; kae oko mai a tino mo te fekau mai te fale o Iailo penei, “Tau tama fafine ko mate. Sa toe fakalavelave koe ki te Faiakoga.”

³⁶Ka ko Iesu ne seki saga atu ki olotou pati,[7] kae ne fai atu ki a Iailo, “Sa mataku, talitonu fua mai.”

³⁷I te taimi tena ne seki talia ne ia se tino ke olo tasi mo ia, kae na ko Petelu fua mo Iakopo mo tena taina ko Ioane.

³⁸Ne oko atu latou ki te fale o Iailo, ne lavea ne Iesu te fakalavelave ko tupu, kae lagona ne ia a leo o tino e 'tagi paka'laga.

³⁹Ne ulu atu a ia ki loto kae fai atu, “Se a te mea ko tupu? Kae 'tagi ai a koutou? E seki mate te tamaliki. E moe fua!”

⁴⁰Ka ko latou ne 'kata fakatauemu ki a ia, tela afuli ei ne Iesu a latou ki tua, kae olo ei mo matua o te tamaliki mo ona soko e tokotolu ki loto i te potu tela e moe i ei te tamaliki.

⁴¹Ne puke a ia ki te lima o te tamaliki, kae fai atu penei, “Talita kumi,” ko tena uiga, “Au e fai atu ki a koe e taku tamaliki fafine, tu ki luga!”

⁴²I te taimi eiloa tena, ne tu ake te tamaliki kae sasale i olotou mua, me ko sefulu lua ona tausaga. Ko oko eiloa i te ofo o latou.

⁴³Ka ko Iesu ne fakatonu malosi atu eiloa ki a latou, ke sa taku atu ki se tino a te mea ne tupu, kae toe fai atu ei, “Fagai ake la.”