Read Te Tusi Tapu I Te Gana Tuvalu Lomiga Lua MALEKO 7 Bible Online

MALEKO 7 - Te Tusi Tapu I Te Gana Tuvalu Lomiga Lua bible

MALEKO 7

¹Ne fakapotopoto mai ki a Iesu a Falesaio mo faiakoga o te Tulafono kola ne o'mai mai i Ielusalema.

²Ne matea ne latou a nisi soko o Iesu e 'kai, kae e seki 'fano olotou lima.

³A Falesaio pela foki mo tino Iutaia katoa, e tausi eiloa latou ki akoakoga ne maua ne latou mai i olotou tupuga: e se mafai eiloa o 'kai seiloga ko oti ne 'fano faka'lei olotou lima,

⁴io e se mafai foki o 'kai ki so se meakai e aumai i te maketi seiloga ko oti ne 'fulu faka'lei.[12] E se gata fua i feitu pena, kae e tausi foki latou ki tulafono i te 'muluga o ipu, ulo, pesini mo mea 'moe.[13]

⁵Tela, fesili atu ei a Falesaio mo faiakoga o te Tulafono ki a Iesu penei, “Ai a e se tau'tali i ei ou soko i akoakoga ne tuku mai ne o'tou tupuga ki a tatou, i te 'kai o latou mo lima se 'fano?”

⁶ Ne tali atu a Iesu, “Ko tonu ei te valoaga a Isaia ne fai e uiga mō koutou! Ne tusi ne ia i a koutou ne tino fia amiotonu: ‘Muna a te Atua i tino konei e faka'malu io me ava mai ki a au i olotou pati, Ka ko olotou loto ko oko eiloa i te 'mao mai i a au.

⁷E se aoga te lotou tapuaki mai ki a au, I te mea e akoako a fakatonuga a tino e pela me ne tulafono a te Atua!”’

⁸Muna a Iesu, “Ko tuku fakaatea ne koutou a fakatonuga a te Atua, kae faka'logo koutou ki akoakoga a tino.”

⁹Ne toe fai atu foki a Iesu: “Ko oko eiloa i te 'poto o koutou mo te otou auala e 'teke atu ei koutou ki tulafono a te Atua, ko te mea ke mautu ei otou akoakoga!

¹⁰Ne fakatonu mai ne Mose, ‘Ava ki ou matua,’ ka ko ‘So se tino e fai ne ana muna se 'tau e uiga ki ona matua, e 'tau o tamate.’

¹¹Kae ne akoako ne koutou me kafai se tino e isi sena mea e fesoasoani ei a ia ki ona matua, kae fai ake pela, ‘A te mea nei se Kopani’ ko tona uiga se mea ko tuku atu mo te Atua,

¹²ko kalo keatea a ia mai tena tiute ko te fesoasoani ki ona matua.

¹³Mai se vaega faiga penei, ko fakaseaoga ei ne koutou a te muna a te Atua mo akoakoga e taku atu ne koutou ki nisi tino. Kae e uke ake foki a nisi vaega mea penei e fai ne koutou.”

¹⁴Ne toe kalaga atu a Iesu ki te vaitino ke o'mai ki a ia, ana muna: “Faka'logo mai koutou katoa, kae e 'tau foki o malamalama ia koutou.

¹⁵E se fakamasei a te tino ne mea kola e kai ne ia, ka ko mea kola e mafaufau ki ei kae faipati ne ia.[14]

¹⁶(Tela la, kafai e isi ne otou taliga, na faka'logo mai ki muna e fai atu ne au!)”

¹⁷Ko tuku ne ia te vaitino kae fano ki loto i te fale, kae ne fesili atu ona soko ki a ia e uiga mō te tala fakatusa tenei.

¹⁸Muna a Iesu, “A koutou ko oko eiloa i te va'lea. E seki malamalama eiloa ia koutou me se mafai o masei te tino i so se mea e kai ne ia,

¹⁹i te mea e se fano ki loto i tona loto kae fano ki loto i te tinae, ko fano ei i tena fanoga.” Mai muna konei a Iesu, ko fakaasi mai ne ia me i meakai katoa e 'lei faeloa te kai ki ei.

²⁰Ne toe 'soko atu ana muna ki a latou, “Ko mea kola e mafaufau ki ei te tino kae faipati ne ia, ko mea kona e fakamasei ne ia te tino.

²¹Me ko te loto o te tino, e 'tupu mai ei a mafaufauga ma'sei, e takitaki ei a ia ke fai amioga fina lalolagi, te puke malo a mea a tino, te tatino,

²²te mulilua, te kaimanako mo vaega amioga ma'sei valevale; te fakaloiloi, te amio se ava, te kaisanosano, te fakaloiloi, te fakamatamata mo te fakavalevale.

²³A mea kona e o'mai mai loto i te tino, e fai ne ia a te tino ke masei.”

²⁴Ne tiaki ne Iesu a te koga tena kae fano ki te fenua e tu pili ki te fa'kai ko Tulo. Ne fano ki loto i te fale, kae seki manako ke iloa a ia ne se tino i a ia e nofo i kona; ka ko se mafai eiloa o fai sena togafiti ke lafi a ia.

²⁵E isi se fafine tela e pukea tena tama fafine ne te agaga masei, ne logotala a ia i a Iesu, vau ei ki a ia i mu taimi kona, fakapaku ifo ei i ona vae.

²⁶A te fafine tenei, se fafine o fenua fakaatea, kae ne fanau i Foinikia i Sulia. Ne fakamolemole mai ki a Iesu ke tuli keatea te temoni mai tena tama.

²⁷Kae ne tali atu a Iesu, “Ke fagai muamua ne tatou te fanau; e se 'tau o puke atu tatou ki meakai a te fanau o pei ki kuli.”

²⁸Ne tali mai te fafine, “Te Aliki, e oko ki kuli i lalo i te taipola, e 'kai foki ki matutuga meakai a te fanau!”

²⁹Ne tali atu a Iesu ki a ia, “Ona ko tau tali tena, vau la o fano ki tou fale; a te temoni ko oti ne fano keatea mai tau tama!”

³⁰Ne foki atu ki tona fale, maua atu ei ne ia tena tama e moe mai i te moega; ko seai eiloa se temoni e nofo i a ia.

³¹Ko tuku ne Iesu a te fa'kai ko Tulo o fano ki Saitonu. Mai kona ne toe fano ki te Namo o Kalilaia, kae ne ui i fa'kai e sefulu e igoa ki a Tekapoli.

³²E isi ne tino ne aumai ne latou ki a ia a te tagata tuli kae gūgū, kae fakamolemole mai ki a Iesu ke fakaeke ona lima ki luga i a ia.

³³Tela, puke atu ei a Iesu o ave ki se koga na ko laua ake eiloa, ke tai 'mao laua mai te vaitino, tuku ei ona matikao ki loto i taliga o te tagata, savale atu ki ei kae puke ki te alelo.

³⁴Ne kilo ake a Iesu ki te lagi, kae ne manava fi'ta kae fai atu ki te tagata tenei penei, “Efata,” ko tona uiga, “Ko 'logo ou taliga!”

³⁵I kona foki eiloa ko te mea eiloa ko 'logo ona taliga, ka ko mafai foki ne ia o faipati.

³⁶Tela, fakatonu atu ei latou katoa ne Iesu ke mo a eiloa e faipati ne latou ki se tino a te mea nei. Kafai e fakatonu malosi atu a ia ke mo a e tala atu ne latou a te mea nei, ka ko na gasolo ei latou o tala atu ki tino a te mea nei.

³⁷Ka ko tino katoa ne faka'logo ki te mea nei, ne ofo masei latou. Ne fai ake olotou muna penei, “Ko oko eiloa i te 'lei ana galuega ne fai. Ko fai ne ia tino 'tuli ke 'logo olotou taliga, mo tino gūgū ke fai'pati!”