Read Te Tusi Tapu I Te Gana Tuvalu Lomiga Lua MALEKO 8 Bible Online

MALEKO 8 - Te Tusi Tapu I Te Gana Tuvalu Lomiga Lua bible

MALEKO 8

¹E se leva mai tua ifo o te mea nei, kae toe o'mai ki a ia a te vaitino e tokouke. Ko seai ne mea e 'kai ei latou, tela kalaga atu ei a Iesu ki ona soko ke o'mai ki a ia, ana muna:

²“Au ko oko i te alofa ki tino konei, i te mea ne 'nofo tasi nei tatou i aso e tolu kae e seai ne meakai mo olotou 'kai.

³Kafai e uga atu ne au ke olo kae se fagai ne au latou, ka mata'po, i te mea a nisi o latou e 'mao a koga ne o'mai ei.”

⁴Ne fai mai ona soko ki a ia, “Ko fea mo koga i te koga lavaki tenei e mafai ei ne se tino o maua ne meakai, e lava 'lei mo fagai a tino konei?”

⁵Ne fesili atu a Iesu, “E fia otou falaoa?” Ne tali mai latou, “E fitu falaoa.”

⁶Ne fakatonu atu ne ia tino ke 'nofo ki lalo. Tela, puke atu ei a ia ki falaoa e fitu, ko fakafetai ki te Atua, ko tofitofi ne ia kae tuku atu ki ona soko ke tufatufa atu ki te vaitino. Ne fai eiloa pena ne te kau soko.

⁷E isi foki ne olotou tama ika mu'tana. Ne fakafetai atu foki Iesu ki te Atua mō mea konei, kae fakatonu foki ki soko ke tufatufa atu.

⁸Ne 'kai a tino katoa kae ne ma'kona 'lei eiloa. A te aofaki o tino ne i kona, kaati e tusa mo te fa afe.

⁹Ne 'fao ne te kau soko a tapola e fitu mai toega meakai. Ne uga atu ne Iesu a tino ke olo,

¹⁰kae sopo fakavave eiloa ki luga i te poti mo ona soko, kae olo ki te fenua ko Talamanuta.

¹¹Ne o'mai nisi Falesaio, kamata eiloa o fakakinau latou ki a Iesu. Ne ma'nako o malei a ia, tela fakamolemole atu ei latou ki a ia ke fai ake se vavega o tofotofo a ia.

¹²Ne manava fi'ta Iesu kae fai atu ki a latou, “Ai a kautama o aso nei e ma'nako ei ki se vavega? E tonu, au e fai atu ki a koutou, e seai lele se vavega e fai mo te kautama tenei!”

¹³Ne tuku ne ia latou, toe sopo ki luga i te poti, kae toe foki atu ki te sua feitu o te namo.

¹⁴Ne puli i soko o aumai ke tai uke olotou falaoa, kae tasi faeloa te lotou falaoa ne ave ne latou i te poti.

¹⁵Muna a Iesu, “Ke fakaeteete koutou mai te mea faka'fete a Falesaio mo Helota.”

¹⁶Ne fai'pati ia latou ake eiloa, olotou muna: “Ne fai ana pati kona i te mea e seai ne o'tou falaoa.”

¹⁷Ne iloa ne Iesu olotou muna ne fai, tela fai atu ei ki a latou, “Ai a e fai'pati ei koutou e uiga ki te seai ne otou falaoa? E seki malamalama eiloa koutou? E pena eiloa te 'numi otou mafaufau?

¹⁸E isi ne otou mata, tela la, e 'tau o matea ne koutou. E isi ne otou taliga, tela la, e 'tau o lagona ne koutou. E se masaua ne koutou

¹⁹i te tofitofiga ne au a te lima falaoa mō te lima afe tino? E fia a tapola ne 'fao ne koutou ki toega meakai?” Ne tali mai latou, “E sefululua.”

²⁰Ne toe fai atu a Iesu, “I taku tofitofiga o falaoa e fitu mō tino e fa afe, e fia la tapola ne 'fao ne koutou ki toega meakai?” Ne tali mai latou, “E fitu.”

²¹Ne toe tali atu a Iesu, “E a, e seki malama'lama eiloa koutou?”

²²Ne o'mai latou ki Petesaita, kae aumai ne nisi tino a te tino kivi ki a Iesu, kae fakamolemole atu ke puke atu a ia ki ei.

²³Ne puke atu a Iesu ki te lima o te tino kivi kae takitaki atu ki tua o te fa'kai. I te otiga ne savale atu ki mata o te tino kivi, fakaeke atu ei a ona lima ki luga i a ia kae fai atu penei, “E matea ne koe se mea?”

²⁴Ne kilokilo saale a te tino tena kae fai ake, “E matea ne au a tino, kae e pela eiloa me ne lakau e sasale saale.”

²⁵Ne toe fakapatele atu ona lima ki luga i mata o te kivi. Ne kilokilo saale a te tino tena, ko matea 'lei ne ia a mea.

²⁶Ne uga atu ne Iesu ke foki ki tona fale mo te fakatonuga tenei, “Sa toe foki atu ki te fa'kai.”

²⁷Ne olo Iesu mo ona soko ki fa'kai ko Kaisaleia Filipi. I te lotou auala, ne fesili atu a Iesu ki a latou, “Taku mai me se a te manatu o tino me ko oi au?”

²⁸ Ne tali mai latou, “A nisi tino ne fai mai me ia koe ko Ioane te Papatiso, ka ko nisi ne fai mai me ko Elia, ka ko nisi ne fai mai me se tino mai te kau pelofeta.”

²⁹ Kae ne fesili atu ki ona soko, “Kae pefea koutou? Se a te otou mau me ko oi au?” Ne tali mai Petelu, “A koe ko te Keliso.”

³⁰Tela, fakatonu atu ne Iesu latou ke se taku atu ki se tino me ko oi a ia.

³¹Tela, kamata eiloa a Iesu o akoako atu ki ona soko: “Ka ko au te Tama a te Tagata e puapuagatia masei, kae 'teke foki ne toeaina, faitaulaga sili mo faiakoga o te Tulafono. Ka tamate au, kae ka toetu mai au i te mate i te tolu o aso.”

³²Ne fakamalamalama faka'lei ne ia a te mea nei ki a latou. Tela, takitaki ei a ia ne Petelu ke tai 'mao mai te kau soko, kae 'vao atu ne ia ke mo a e fai'pati pena.

³³Ne kilo Iesu ki tua i ona soko kae 'vao ne ia Petelu, ana muna, “Fano keatea e Satani mai i a au. A ou mafaufauga ne mafaufauga faka-te-tagata, kae se ne mafaufauga faka-te-Atua!”

³⁴ Ne kalaga atu Iesu ki te vaitino mo ona soko ke o'mai ki a ia, kae fai atu, “So se tino e manako o tautali mai ia au, e 'tau o se mafaufau ki a ia, kae amo tena sataulo ko tautali mai ei i a au.

³⁵Ko te tino e fia fakasao ne ia a tona ola mo ia ake eiloa, e se maua ne ia; ka ko te tino e fakamaumau ne ia a tona ola ona ko au, mo te tala 'lei, e maua ne ia.

³⁶E isi se aoga ki te tino manafai e maua ne ia te lalolagi katoa, kae tela la e maumau fua i ei a tona ola? E seai lele eiloa!

³⁷E seai se mea e avatu ne se tino ke toe maua mai tona ola.

³⁸Tela la, kafai ko te tino e taema i a au mo aku akoakoga i te kautama se talitonu mo te masei tenei, ka taema foki au te Tama a te Tagata manafai e vau au i te 'malu o toku Tamana mo agelu tapu.”