Read Te Tusi Tapu I Te Gana Tuvalu Lomiga Lua MALEKO 9 Bible Online

MALEKO 9 - Te Tusi Tapu I Te Gana Tuvalu Lomiga Lua bible

MALEKO 9

¹Kae ne 'soko atu eiloa a pati a Iesu ki a latou penei: “Ke masaua a te mea nei! E isi ne tino i konei e se 'mate seiloga ko oti ne 'kilo ki te Malo o te Atua ko vau mo te 'mana.”

² E ono aso mai tua ifo, ne ave ne Iesu a Petelu, Iakopo mo Ioane ke olo mo ia, kae ne ave ne ia ki se mauga maluga. Ko latou ake eiloa ne olo. Ka koi kilo'kilo atu latou ki a ia, ko te mea eiloa ko fuli ona foliga,

³ko oko eiloa i te malapulapu ona gatu kae kena pakipaki; kae e seai se tino i te lalolagi nei e mafai ne ia o 'ta se mea ke kena e pela mo te gatu o Iesu.

⁴Tela, matea ei ne soko e tokotolu kona a Elia mo Mose e fai'pati mo Iesu.

⁵Ne faipati ake Petelu kae fai atu ki a Iesu, “Te Faiakoga, e 'lei me ko i konei tatou. Ka faite ne matou ne fakamalumalu e tolu. E tasi mo koe, e tasi mo Mose kae tasi mo Elia.”

⁶A Petelu mo ona takaga ko oko eiloa i te ma'taku, ka ko se iloa foki ne ia me se a tena pati ka fai.

⁷ Ne fanake te kaumana, fakapulougina ei latou, faipati mai ei mo te leo mai te kaumana penei, “Ko taku Tama Fagasele tenei, ke faka'logo koutou ki a ia!”

⁸Ne kilo'kilo fakavave saale latou kae e seai eiloa se tino e matea ne latou; ko Iesu fua e iai mo latou i kona.

⁹I te lotou oloifoga mai te mauga, fakatonu atu ei latou ne Iesu: “Mo a ma taku atu ne koutou ki se tino a te mea ne lavea ne koutou, ke oko ki te toetu mai te Tama a te Tagata mai i te mate.”

¹⁰Ne faka'logo latou ki tena fakatonuga, tela kamata eiloa latou o fai'pati ia latou ake eiloa ki te mea nei: “Se a te uiga o te mea tenei ko te toetu mai te mate?”

¹¹ Ne fesili atu latou ki a Iesu penei, “Ai a ne fai mai ei a faiakoga o te Tulafono me e 'tau o mua mai a Elia?”

¹²Ne tali atu a Iesu, “Ne mua mai a Elia o fakatoka a mea katoa. Kae ai a la e fai mai ei a Tusitusiga Tapu me i te Tama a te Tagata ka puapuagatia masei kae se talia foki ne tino?

¹³Au e fai atu ki a koutou ia Elia ko leva ne vau, ne fai katoa ne tino a mea ma'sei e loto latou ki ei o fai ki a Elia, e pela mo muna a Tusitusiga Tapu e uiga ki a ia.”

¹⁴I te lotou okoatuga ki te kau soko, ne matea ne latou a te vaitino tokouke i kona. E isi nisi faiakoga o te Tulafono ne faka kinau mo ona soko.

¹⁵I te mateaga ne te vaitino a Iesu, ko oko eiloa i te lotou ofo, 'tele atu ei ki a ia kae fakatalofa ki ei.

¹⁶Ne fai atu a Iesu ki ona soko, “Se a te mea e finau ei koutou mo latou?”

¹⁷Ne tali se tokotasi mai i te vaitino: “Te Faiakoga, ne aumai ne au taku tamaliki tagata ki a koe, i te mea e pukea ne te agaga masei, ka ko se mafai ne ia o faipati.

¹⁸Kafai ko pukea a ia ne te agaga, e pei 'tuki a ia ki te laukele, kae takapiaga tona gutu, kae fakagaii ona nifo kae makeke mo tona foitino katoa. Ne fai atu au ki ou soko ke tuli keatea ne latou te agaga mai i a ia, kae e se maua ne latou.”

¹⁹Ne fai atu a Iesu ki a latou, “A koutou ne tino ko oko eiloa i te se talitonu! E manako faeloa koutou ke fakatasi tatou ko te mea ke talitonu koutou? Ka pefea te leva e ma'nako ei koutou ke kufaki faeloa au ki a koutou? Aumai te tamaliki tagata ki a au.”

²⁰Tela, aumai ei ne latou te tamaliki tagata, kae i te mateaga ne ia a Iesu, ne fakapoko ne te agaga a te kiki o te tamaliki, siga ki lalo takafilifili valevale ei, takapiaga ei tona gutu.

²¹Ne fesili a Iesu ki te tamana o te tamaliki tagata, “Ko pefea te leva o te mauaga ne ia a te mea nei?” Ne tali mai te tamana, “Talu mai i tena folikiga.

²²E uke a taimi ne taumafai ei te agaga o tamate te tamaliki, i te 'pei ne ia ki te afi mo te vai. A koe ke alofa kae fesoasoani mai ki a matou, manafai e mafai ne koe!”

²³Muna a Iesu, “Ao, manafai foki e mafai ne koe! E faigofie mea katoa ki te tino e isi sona fakatuanaki.”

²⁴Ne tali atu tona tamana, “E isi soku fakatuanaki, ka ko te mea e se lava. Fesoasoani mai ki a au!”

²⁵Ko iloa ne Iesu me ko pilipili mai te vaitino ki a latou, tela fakatonu atu ei ne ia te agaga masei, “Te Agaga Tuli mo te Gūgū, ko fakatonu atu ne au koe ke fano keatea mai te tamaliki, kae sa toe foki ki a ia!”

²⁶Ne kalaga malosi te agaga kae fakapoko ne ia tena kiki, vau ei ki tua mai i a ia. A te tamaliki ko foliga pela mo se tino mate, tela muna ake ei latou penei: “Ko Mate!”

²⁷Ne puke atu a Iesu ki te tamaliki o fesoasoani o fakatu ki luga, tu ake ei a ia ki luga.

²⁸I te fanoga a Iesu ki loto, ne faipati malie atu ona soko ki a ia: “Ai a e se mafai ei ne matou o tuli agaga masei keatea?”

²⁹Ne tali atu a Iesu, “E seai ake eiloa se isi malosi e mafai ne ia o fai se vaega mea penei, vagana te mana o te 'talo.”

³⁰Ko tiakina ne latou a te koga tena kae faimalaga atu i loto i Kalilaia. A Iesu ko se manako a ia ke iloa ne se tino te koga e nofo a ia i ei,

³¹i te mea ko akoako atu ne ia ona soko penei: “Au ko te Tama a te Tagata, ka tuku atu ki lima o tino ke tamate, kae mai tua o te tolu o aso ka toetu au mai te mate.”

³²E se iloa ne latou me se a te uiga o te akoakoga tenei, kae ne ma'taku foki ma fesili atu ki a ia.

³³Ne o'mai ki Kapanaumi, kae i te lotou uluga ki loto i te fale, ne fesili atu a Iesu ki ona soko: “Se a te mea ne fakakinau ei koutou i te auala?”

³⁴ Kae ne se fia tali ki a Iesu, i te mea ne fakatau finau eiloa latou ia latou, me ko oi e pito sili ia latou.

³⁵ Ne nofo ki lalo Iesu kae kalaga atu ki te tinoagafulu mo te tokolua kae fai atu penei: “Ko te tino tela e manako ke fai a ia mo tino muamua, ke fai a ia mo tino fakaoti, kae ke fai foki mo tavini a tino katoa.”

³⁶Ne puke ne ia te tamaliki kae fakatu ne ia i mua o latou katoa. Ne 'sai mai ne ia, ki ana lima kae fai atu ki a latou,

³⁷ “So se tino e talia ne ia se tamaliki o tama'liki konei, e talia foki ne ia au; so se tino foki e talia ne ia au, e talia foki ne ia a ia tela ne uga mai ne ia au.”

³⁸Muna a Ioane ki a ia, “Te Faiakoga, ne matea ne matou a te tino ne tuli ne ia temoni i tou igoa, kae ne 'vao ne matou ke se fai ne ia, me e se kau tatou.”

³⁹Ne tali atu a Iesu, “Sa taofigina a ia, me ko so se tino e fai ne ia a vavega konei i toku igoa, e faipati faeloa ne ia a mea 'lei e uiga ki a au.

⁴⁰ Me ko te tino e se teke ki a 'tatou e kau mo tatou.

⁴¹Masaua a te mea nei! So se tino e avatu ne ia ki a koe ne mo vai inu ona ko koe e kau ki a Keliso, e maua ne ia te taui.”

⁴²“So se tino e fai ne ia se mea ke agasala a tamaliki konei kola e talitonu ki a au, e sili atu moi fai ne 'sai tena ua ki se fatu solo lasi kae pei ki te moana 'poko.

⁴³Kafai ko tou lima e fai ne ia ke galo tou fakatuanaki, 'kati keatea! E sili atu mafai e ulu atu koe ki te ola mo te seai sou lima, i lo te katoa ou lima, kae iku ei ki tou fano ki kēna, ki te afi se gata mai.[15]

⁴⁴(E isi 'ne ilo i kona e se mafai o 'mate, mo te afi se gata mai.)

⁴⁵Kafai ko tou vae e 'fuli keatea ne ia koe, 'kati keatea! E sili atu manafai e ulu atu koe ki te ola mo te seai sou vae, i lo te katoa ou vae, kae iku ei koe ki te pei ki kēna.

⁴⁶(E isi ne ilo i kona e se mafai o ‘mate, mo te afi se gata mai.’) [16]

⁴⁷Kafai ko tou mata e 'fuli ne ia koe keatea, tapale keatea! E sili manafai e ulu atu koe ki te Malo o te Atua mo tou mata e tasi, i lo te katoa ou mata, kae iku ei koe ki te pei ki kēna.

⁴⁸ E isi ‘ne ilo i kona e se mafai o 'mate, mo te afi se gata mai.’

⁴⁹“Me i tino katoa e 'tau o fakamasima ki te afi.

⁵⁰ E 'lei te masima. Kafai e palele tena aoga; e a, e mafai la pefea ne koutou o toe faka'kona? Ke maua te masima ia koutou, kae ke fakatau ola filemu foki koutou.”