Read Te Tusi Tapu I Te Gana Tuvalu Lomiga Lua LUKA 1 Bible Online

LUKA 1 - Te Tusi Tapu I Te Gana Tuvalu Lomiga Lua bible

LUKA 1

¹Ki taku pele ko Teofilo. E tokouke a tino ne taumafai o tusi a tala e uiga ki mea ne 'tupu ki a tatou.

²Ne tusi ne latou a tala kola ko oti ne tala mai ki a tatou, ne latou kola ne 'kilo ki mea konei mai te kamataga, kae ne folafola atu ne latou te muna.

³Ki tou 'malu, ko oti ne sukesuke ne au faka'lei a mea katoa mo olotou mafuaga; tela la, ne manatu au me se mea 'lei ke tusi atu ne au se tala tukufakasolo mō koe.

⁴Ko fai ne au te mea tenei, ko te mea ke iloa ne koe te tonuga katoatoa o mea katoa kola ko oti ne akoako koe ki ei.

⁵I te taimi o Helota te tupu o Iutaia,[1] e isi te faitaulaga e igoa ki a Sakalia, ne tupu mai i te kaiga faitaulaga o Avia. Ka ko Elisapeta te igoa o tena avaga; kae ne tupu mai foki i te kaiga faitaulaga.

⁶Ne amiotonu laua i mua o te Atua, kae ne tausi ki tulafono mo fakatonuga a te Aliki.

⁷Ne seai ne tama'liki a laua i te mea e se fanau Elisapeta, ka ko ma'tua foki laua.

⁸I te aso e tasi ne fai a te galuega a Sakalia fakafaitaulaga i mua o te Atua, e tusa mo te fakasologa o lotu i aso takitasi.

⁹E pela mo te tu e masani ei a faitaulaga, ne maua ne Sakalia te tofiga i te mea ko tu tonu te vili ki a ia, ke fa'ka ne ia te taulaga 'sunu i loto i te Fale Tapu o te Aliki.

¹⁰Ne 'luku i tua te vaitino, e fai olotou tinoga i te itula e fai ei te taulaga 'sunu.

¹¹Ne fakasae mai te agelu a te Aliki ki a ia, e tu mai i te feitu fakaatamai o te fata-fai-taulaga, i te koga tela e fa'ka i ei taulaga 'sunu.

¹²I te laveaga ne Sakalia, ne mataku kae polepole.

¹³Ne fai mai te agelu ki a ia: “Sa mataku e Sakalia! Ko oti ne lagona ne te Atua tau tinoga, ka ko tau avaga ko Elisapeta ka fanau ne ia se tamaliki tagata ma koe, ke fakaigoa ne koe ki a Ioane.

¹⁴Ka lasi tou fiafia, kae ka tokouke foki ka fia'fia ki tena fanau mai!

¹⁵ Me i a ia e taua i mua o te Aliki. E se 'tau mo ia o inu ki te uaina io me ne mea inu malosi. Mai i te taimi e fanau mai ei a ia e fonu tena olaga i te Agaga Tapu.

¹⁶Ka fakafoki mai ne ia te tokoukega o Isalaelu ki te Aliki te lotou Atua.

¹⁷ Ka muamua atu a ia i te agaga mo te malosi o Elia, ke 'fuli ne ia loto o tamana ki fanau, mo tino fakalogoga'ta ki te poto o tino fai mea tonu, o fakatoka tino mō te Aliki.”

¹⁸Muna a Sakalia ki te agelu, “E mafai pefea o iloa ne au manafai e tonu? Au ko matua, e pela foki taku avaga.”

¹⁹Ne tali mai te agelu, “Au ko Kapilielu. Au e tu atu i mua o te Atua, tela ne uga mai ne ia au ke vau ki a koe, o fakailoa atu te tala fiafia tenei.

²⁰Kiloke, ona ko tou se talitonu, a koe ka gūgū; ka se toe faipati eiloa koe, ke oko ki te aso e fakataunu ei te tonuga o taku feagaiga ki a koe.”

²¹Ka ko tino ne faka'tali mai eiloa ki a Sakalia, kae ne ōfo latou me ai a ko leva ei a ia i loto i te Fale Tapu.

²²I tena vauga ki tua, ne se mafai ne ia o faipati ki a latou. Ne iloa ake ei ne latou me isi se fakaasiga ne matea ne Sakalia i loto i te Fale Tapu; i te mea ne faipati ki fakailoga, mo ko gūgū eiloa a ia.

²³I te otiga o tena tiute i te Fale Tapu, ne toe foki atu Sakalia ki tena fale.

²⁴E se leva foki aso mai tua ifo, ne faitama tena avaga ko Elisapeta, kae tusa mo te lima masina ne se fakasaesae ki tino, kae fai ana pati penei:

²⁵“Ko oko mai aso e fesoasoani mai ei te Aliki, a te Aliki ko oti ne fesoasoani ki a au o ave keatea toku luma mai i tino.”

²⁶I te ono masina o te faitamaga a Elisapeta, ne uga mai ne te Atua te agelu ko Kapilielu, ki te fa'kai o Kalilaia e igoa ki a Nasaleta.

²⁷ Me isi se fekau mō te tamafine ne fai feagaiga ke avaga mo te tagata e igoa ki a Iosefa, tela ne tupu mai i te matakaiga o Tavita, ka ko te igoa o te tamafine ko Malia.

²⁸Ne vau te agelu ki a ia kae fai mai, “Ke i a koe te filemu! A te Aliki e fakatasi mo koe, me ko oti ne fakamanuia atu ki a koe!”

²⁹Ne se toka te mafaufau o Malia ona ko te fekau ne aumai ne te agelu, kae ne mafaufau 'mafa me se a te uiga o ana pati.

³⁰Muna a te agelu ki a ia, “Sa mataku e Malia, me i te Atua ko oti ne fakamanuia atu ki a koe.

³¹Kiloke, a koe ka faitama, ka fanau ne koe se tama tagata, kae ka fakaigoa ne koe a ia, ko Iesu.

³²E sili a ia, kae ka fakaigoa foki ko te Tama a te Atua Tafasili i te Maluga. A ia ka fai ne te Aliki te Atua mo tupu, e pela eiloa mo tena tupuna ko Tavita.

³³Ka fai a ia mo tupu tumau o te fanauga a Iakopo, ko tena malo foki e seai se gatamaiga.”

³⁴Muna a Malia ki te agelu, “Au se tamafine fua e seki avaga, kae ka mafai pefea o tupu te mea nei?”

³⁵Ne tali mai te agelu, “Ka oko atu ki a koe te Agaga Tapu, ka nofo foki i a koe te mana o te Atua. Ona ko te feitu tenei, ka fakaigoa te tamaliki tapu tena, ko te Tama a te Atua.

³⁶Kae kiloke, masaua tou tino ko Elisapeta. Ko iloa 'lei me se afu, ko matua foki, kae i te taimi nei ko faitama, ko ono ona masina.

³⁷Me e seai se mea e se mafai ne te Atua o fai.”

³⁸Muna a Malia, “Ko au ko te tavini a te Aliki. Ke oko eiloa te mea tena ki a au, e pela mo au pati.”Ne fano ei keatea te agelu mai i a ia.

³⁹Mai tua ifo i kona, ne asiasi atu Malia ki a Elisapeta, ne fakatokatoka Malia o fakavave atu ki te koga e uke mauga, ki te fa'kai e tasi o Iuta.

⁴⁰Ne ulu atu ki loto i te fale o Sakalia, kae fakatalofa atu ki a Elisapeta.

⁴¹I te itula ne lagona ei ne Elisapeta te fakatalofa a Malia, kae gasue mo te tamaliki i loto i tena tinae. Ne pukea ei Elisapeta ne te Agaga Tapu,

⁴²faipati malosi atu ei ki a Malia: “Amutia koe i fafine katoa! Ke amutia foki te tamaliki tela ka fanau ne koe.

⁴³Ai a ko ala ei o tupu se mea sili penei ki a au, i te matua o toku Aliki ko vau o asiasi mai ki a au?

⁴⁴I taku lagonaga tau fakatalofa, kae gasue mo te fiafia te tamaliki i loto i toku tinae.

⁴⁵E manuia foki a te fafine tela e talitonu, me oko eiloa a mea kola ne faipati mai ei te Aliki ki a ia.”

⁴⁶Muna a Malia: “Ko tavae atu toku loto ki te Aliki,

⁴⁷Ko fiafia foki toku agaga ki te Atua toku Fakaola.

⁴⁸I te mea ne manatua ne ia au ko tena tavini se aoga! Kae kiloke, mai i te itula nei o fano ki mua, ka fakaamutia mai kautama katoa ki a au.

⁴⁹Ona ko mea 'lasi ne fai ne te Atua Malosi mo oku; A tena igoa foki e tapu.

⁵⁰E alofa foki ki a latou katoa kola e ma'taku ki a ia, i kautama katoa.

⁵¹Ne 'fola tena lima malosi. Kae ne fakamaofa ne ia tino fakamata'mata mo olotou aofaga.

⁵²Kae tuku ifo foki ne ia ki lalo tino sili mai i olotou nofoga aliki. Kae siki ake ki luga tino ma'lalo.

⁵³Ne fagai ne ia tino fia 'kai ki mea 'lei. Kae afuli tino maumea ke olo loa o mativa.

⁵⁴Ne tausi ki tena feagaiga ne fai mo tupuga o tatou; Ne vau foki o fesoasoani ki tena tavini ko Isalaelu.

⁵⁵Kae ne masaua foki ne ia o alofa ki a Apelaamo mo ana fanau katoa, ke oko ki te se gata mai!”

⁵⁶Ne 'nofo Malia mo Elisapeta i masina e tolu, toe foki ei ki tena fale.

⁵⁷Ko oko nei ki te itula tonu ko 'tau ei o fanau Elisapeta, kae ne fanau ne ia se tamaliki tagata.

⁵⁸Ne 'logo ona tuakoi pela foki ona kaiga i te gali o te mea a te Aliki ne fai ki a ia, tela ne fakatau fia'fia ei latou mo ia.

⁵⁹I te valu o aso o te tamaliki, ne o'mai latou o pilitome kae ke fakaigoa foki ki a Sakalia, te igoa o tena tamana.

⁶⁰Kae ne fai atu tena matua, “Ikai! A tena igoa ko Ioane.”

⁶¹Kae muna mai latou ki a ia, “E seai eiloa se tino o tou kaiga e tokotasi e igoa pena.”

⁶²Ne fai ne latou ne fakailoga ki tena tamana, e fai atu ei ki a ia me ko oi a te igoa o te tamaliki e manako ei a ia.

⁶³Ne fai atu Sakalia ki se ma tusitusi ke aumai, kae ne tusi ne ia penei, “A tena igoa ko Ioane.” Ne ofo ei latou.

⁶⁴I te itula eiloa tena ne toe mafai ei ne Sakalia o faipati, kamata eiloa o 'viki ki te Atua.

⁶⁵Ne ma'taku katoa ona tuakoi, ka ko te tala e uiga ki mea konei ne pa ki fa'kai katoa o Iutaia.

⁶⁶A tino katoa kola ne 'logo i te tala tenei, ne mafaufau ki ei kae fai ake penei, “Kae ka pefea nei a uiga o te tamaliki tenei? Me ko iloa 'lei nei, ko nofo i a ia te mana o te Aliki.”

⁶⁷Ne pukea tena tamana ko Sakalia ne te Agaga Tapu, kae ne 'valo penei:

⁶⁸“Ke tavae ne tatou te Aliki te Atua o Isalaelu! Me ne vau o fesoasoani kae fakasaoloto ona tino.

⁶⁹Ne fakatu ake ne ia te Fakaola mō tatou, Mai te kaiga o tena tavini ko Tavita.

⁷⁰Tenei te mea tela ko leva ne 'valogina ne ana pelofeta 'malu:

⁷¹Ne tauto me ka fakaola ne ia tatou mai i o'tou fili, Fakatasi mo latou kola e kaitaua mai ki a tatou.

⁷²Ne fai mai ana muna me ka alofa a ia ki tamana o tatou, Kae manatua faeloa ne ia tena feagaiga tapu.

⁷³Ne fai tena feagaiga mautakitaki ki te tou tamana ko Apelaamo,

⁷⁴Kae ne tauto me ka fakaola ne ia tatou mai i o'tou fili, Kae fakasaoloto foki tatou ke tavini atu ki a ia mo te se ma'taku.

⁷⁵Ke tapu kae ke amiotonu foki tatou i ona mata, I aso katoa o te tou olaga.

⁷⁶Ka ko koe e taku tama, ka fakaigoa ki te pelofeta a te Atua Tafasili i te Maluga; Ka mua koe i te Aliki o fakatoka te alatu mō ia.

⁷⁷O folafola atu ki ona tino me ka fakaolagina latou, I te fakamagaloga o agasala a latou.

⁷⁸E alatu i te alofa 'nau o te tou Atua, Kae ka fakatu ake ne ia se mainaga ke oko mai ki a tatou.

⁷⁹O fakamaina atu ei latou kola e 'nofo i te pouliga mo te ata o te mate, Kae takitaki o'tou vae ki te auala o te filemu.”

⁸⁰Ne tupu ake te tamaliki i te foitino malosi mo te agaga; ne nofo i te vao, ke oko eiloa ki te aso ko 'tau ei o fakaasi atu a ia ki tino Isalaelu.