Read Te Tusi Tapu I Te Gana Tuvalu Lomiga Lua LUKA 10 Bible Online

LUKA 10 - Te Tusi Tapu I Te Gana Tuvalu Lomiga Lua bible

LUKA 10

¹Fakamuli ifo, ne filifili ne te Aliki te isi tinofitu mo te tokolua tagata,[12] kae ne uga atu ke olo takitokolua, ke 'mua i a ia ki fa'kai mo koga katoa kola ka fano a ia ki ei.

² Ana muna ki a latou: “Ko foki te lasi o te saito ko 'tau o 'kati, ka ko te mea e se lava a tino faigaluega mo 'kati te saito. Fakamolemole ki te tino e o ia te toga saito, ke toe uga mai ne tino faigaluega o fakaputu tena saito.

³ Olo! Ko uga atu ne au koutou pela me ne tama mamoe i va o luko.

⁴ Sa 'kavegina se pausi tupe, io me se pausi, io me ne taka; sa 'tu o fakafetaui ki se tino e tokotasi i te alatu.

⁵So se fale e ulu atu koutou ki ei, te pati muamua e fai atu ne koutou, ‘Ke manuia te fale tenei!’

⁶Kafai e nofo i kona te tama o te filemu, ko te fakamanuiaga a koutou ka tumau i luga i a ia; kae kafai e seai, ka toe fakafoki mai ki a koutou.

⁷'Nofo i te fale tena, 'kai kae inu i mea e tuku atu ne latou; me e 'tau i te tino faigaluega o maua tena 'togi. Sa ulu valevale ki so se fale.

⁸So se fa'kai e olo koutou ki ei kae talia i ei koutou, 'kai i mea e laulau atu ne latou,

⁹fai ke 'lei a tino ma'saki i te fa'kai tena, kae muna atu ki tino i te fa'kai tena, ‘A te Malo o te Atua ko pili mai ki a koutou.’

¹⁰ So se fa'kai foki e olo koutou ki ei, kae se talia ne ia koutou; olo ki alatu o fai'pati atu penei:

¹¹‘A pefu mai te otou fa'kai kola e 'piki ki omotou vae, e tuetue atu ne matou ki a koutou; kae masaua a te mea tenei: a te Malo o te Atua ko pili mai ki a koutou!’

¹² Au e fai atu ki a koutou, me e tai alofa atu a te Atua ki a Sotoma i lo te fa'kai tena i te Aso Fakamasino!”

¹³ “Kalofa eiloa i a koe Koasini! Kalofa foki eiloa i a koe Petesaita! I te mea moi fai ne fai i Tulo mo Saitonu a vavega kola ne fai ki a koutou, e penei ko leva loa a tino i kona ne 'nofo ki lalo, kae fakaaoga gatu ma'sei, kae tuku ake a lefu ki olotou ulu, e fakaasi mai ei i a latou ko sala'mo.

¹⁴Kafai e oko mai a te Aso Fakamasino, ka iloa ei i te Atua e tai alofa atu ki a Tulo mo Saitonu i lo koutou.

¹⁵ Ka ko koe e Kapanaumi! A koe ne manako ke siki ake koe ki luga i te lagi! A koe ka pei ki lalo i Seoli!”

¹⁶ Ne fai atu a Iesu ki ona soko: “A te tino e fakalogo ki a koutou, e fakalogo mai foki ki a au; a te tino e se talia ne ia koutou, e se talia foki ne ia au; ka ko te tino tela e se talia ne ia au, e se talia foki ne ia a te tino tela ne uga mai ne ia au.”

¹⁷A te tinofitu mo te tokolua[13] ne 'foki mai mo te fiafia, olotou muna, “Te Aliki, a temoni ne faka'logo foki ki omotou fakatonuga kola ne fai i tou igoa!”

¹⁸Ne tali atu a Iesu ki a latou: “Ne lavea ne au Satani e to ifo pela me se uila mai i luga i te lagi.

¹⁹ Faka'logo mai! Ko oti ne tuku atu ne au ki a koutou a te pule, ko te mea ke mafai ne koutou o sasale i luga i gata mo akalava, pela foki te malosi katoatoa o te Fili, kae e seai se mea ka faka'mae ne ia koutou.

²⁰Sa fia'fia ona ko agaga ma'sei ko fakalogo ki a koutou; kae fia'fia i te mea ko tusi otou igoa i te lagi.”

²¹I te taimi eiloa tena, ne fakafonu a Iesu i te fiafia ne te Agaga Tapu,[14] kae fai ake: “Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kola ne 'funa ne koe mai tino 'poto mo tino kola ne a'koga. Tamana, e tonu ne fai ne koe a te mea tenei ki tau filifiliga mō te mea ko loto malie koe ki ei.

²² “Ko oti ne tuku mai ne toku Tamana a mea katoa ki a au: e seai se tino e tokotasi e iloa ne ia me ko oi te Tama, na ko te Tamana fua, kae seai foki se tino e tokotasi e iloa ne ia me ko oi te Tamana, na ko te Tama fua, mo tino ei kola e manako te Tama o fakaasi a ia ki ei.”

²³Tela, fuli atu ei a Iesu ki ona soko kae faipati malie atu ki a latou: “Amutia a mata kola e 'kilo ki mea kola e lavea ne koutou.

²⁴Au e muna atu ki a koutou, me e tokouke pelofeta mo tupu ne ma'nako o lavea a mea ko 'kilo nei koutou ki ei, kae ne seki mafai ne latou, kae ne fia faka'logo foki ki mea ko lagona nei ne koutou, kae ne seki mafai ne latou.”

²⁵E isi se faiakoga o te Tulafono ne vau, kae ne taumafai o tofotofo a Iesu, ana muna: “Te Faiakoga, se a te mea e 'tau o fai ne au, ko te mea ke maua ne au a te ola se gata mai?”

²⁶Ne tali atu a Iesu ki a ia, “Ne a muna e tusi i te Tulafono? Se a tou iloa i ei?”

²⁷ Ne tali mai a te tagata tena penei: “‘E 'tau mo koe o alofa ki te Aliki tou Atua mo tou loto katoa, mo tou agaga katoa, mo tou malosi katoa, mo tou mafaufau katoa,’ kae ‘E 'tau foki mo koe o alofa ki tou tuakoi, e pela eiloa mo koe ki a koe.’ ”

²⁸ Ne tali atu a Iesu, “E tonu tau tali, ke fai la ne koe a te mea tenei, ke ola ei koe.”

²⁹Ka ko te faiakoga o te Tulafono ne manako ke tonu a ia, tela ne toe fesili mai ei ki a Iesu, “Ko oi la toku tuakoi?”

³⁰Ne tali atu a Iesu penei, “E isi se tagata ne vau mai i Ielusalema o fano ki Ieliko, kae ne puke ne tino faomea: Ne 'tala ne latou ona gatu kae ta, tiakina ei me ko tai mate.

³¹I mo taimi eiloa kona, ne livaliva ifo a te faitaulaga i te alatu tena. I te laveaga ne ia a te tagata tena, ne fakasili eiloa o fano i te isi feitu o te alatu.

³²I te alatu foki tena, ne livaliva ifo i ei se tagata mai te matakaiga o Levi, ne fanatu o kilokilo ki te tagata tena, kae ne toe fakasili foki o fano i te isi feitu o te alatu.

³³ Kae isi se tagata Samalia ne malaga atu i te alatu tena, ne oko atu ki te tagata tena, kae i te laveaga ne ia, ko oko eiloa i tena alofa ki a ia.

³⁴Ne fanatu ei ki te tagata tena, 'ligi ne ia te sinu mo te uaina ki luga i ona pa'kiaga kae fusi, fakamuli ake fakasopo ei ne ia ki luga i tena manu, ave ei ne ia ki se fale talimalo, o tausi ne ia i ei.

³⁵Taeao ake, ne tapale ne ia te fa sefulu sene, kae tuku atu ki te pule o te fale, kae fai atu, ‘Tausi ne koe, kafai e foki mai au i te ala tenei, ka 'togi atu ne au ki a koe so se mea ne fakaaoga ne koe mo ia.”’

³⁶Muna a Iesu, “Ko oi la te tino i te tokotolu konei i tau faka'tau, ko te tuakoi o te tagata tela ne ta ne tino faomea?”

³⁷Muna a te faiakoga o te Tulafono, “Ko te tino tela ne alofa ki a ia.” Muna a Iesu ki a ia, “Fano la koe, kae ke fai foki ne koe pena.”

³⁸ I te ologa a Iesu mo ona soko, oko atu ei latou ki se fa'kai e tasi. E isi se fafine i kona e igoa ki a Maleta, kae ne fakaafe ne ia a Iesu ki tena fale.

³⁹E isi sona taina e igoa ki a Malia, tela ne nofo i vae o te Aliki kae ne fakalogologo ki tena akoakoga.

⁴⁰Ne seki toka te mafaufau o Maleta i te uke o galuega e 'tau o fai, tela vau ei o fai atu ki a Iesu, “Te Aliki, a koe e se manatu mai ki a au i toku taina ko tiaki mai au tokotasi, ke fai ne au a galuega katoa? Fai ki ei ke vau o fesoasoani ki a au!”

⁴¹Ne tali atu a te Aliki ki a ia penei: “Maleta, Maleta! A koe ko manavase ka ko fakalavelavegina ou manatu i mea e uke,

⁴²kae tasi faeloa a te mea e fia maua. Ko oti ne filifili ne Malia a te mea tonu, kae ka se ave keatea a te mea tena mai i a ia.”