Read Te Tusi Tapu I Te Gana Tuvalu Lomiga Lua LUKA 11 Bible Online

LUKA 11 - Te Tusi Tapu I Te Gana Tuvalu Lomiga Lua bible

LUKA 11

¹Ne 'talo a Iesu i te sua koga, kae i te otiga; fai mai ei se tokotasi mai ona soko ki a ia penei: “Te Aliki, akoako mai matou ke iloa o 'talo, e pela mo Ioane ne akoako atu foki ki ona soko.”

²Ne tali atu a Iesu ki a latou penei, “Kafai e 'talo koutou, 'talo penei: ‘Te Tamana, Ke tapu tou igoa. Ke oko mai tou Malo.

³Tuku mai ki a matou omotou meakai e 'tau mo te aso.[15]

⁴Kae fakamagalo mai ki omotou agasala, E pela foki mo matou e fakamagalo atu ki tino kola e 'se mai ki a matou, Kae sa takitaki matou ki se tofotofoga.”’

⁵Kae ne fai atu a Iesu ki a latou penei: “Ko oi la se tino i a koutou e isi sona takaga, ko fanatu ki a ia i te valuapo, kae fai atu penei: ‘Takaga, ke kaitalafu ne au ne falaoa e tolu,

⁶i toku taugasoa ko oko mai tena malaga ki a au, kae e seai se mea e tali ei a ia.’

⁷Ka ko ia tela i loto i te fale ka tali penei, ‘Sa fakalavelave mai ki a au! Ko 'pono nei te mataloa, ko 'moe matou mo aku tamaliki. Ko se mafai ne au o tu ki luga o avatu ki a koe se mea.’

⁸Au e fai atu ki a koutou, e se ko te la takaga e tu ei ki luga o avatu ki a ia se mea, kae mai luga o tena fakamolemole 'soko, ka tu eiloa ki luga o tuku atu e tusa mo te mea e manako a ia ki ei.

⁹Tela la, au e fai atu ki a koutou: Akai atu, kae ka tuku mai ki a koutou; salasala atu, kae ka maua ne koutou; tukituki atu, kae ka 'tala mai ki a koutou.

¹⁰So se tino e akai atu, e tuku mai ki a ia; a ia tela e salasala atu, e maua ne ia; a ia foki tela e tukituki atu, ka 'tala mai ki a ia.

¹¹Ko oi se tamana i a koutou na, e mafai o tuku atu se gata ki tena tama manafai e fakamolemole mai ki se ika?

¹²Io, me fakamolemole mai ki se fuamoa, kae tuku atu ki a ia se akalava?

¹³Tela la, kafai koutou e ma'sei, kae e iloa ne koutou o tuku atu a mea 'lei ki otou tama'liki, e se sili atu la te otou Tamana i te lagi, i te fia tuku atu o te Agaga Tapu ki tino kola e fakamolemole atu ki a ia?”

¹⁴A Iesu ne afuli ne ia ki tua a te temoni gugu. I te fanoga o te temoni ki tua, kamata eiloa o faipati a te tagata ne gugu; kae ne ofo i ei a te vaitino.

¹⁵ Ka ko nisi o latou ne fai ake penei: “Ko te mana o Pelesepulo te aliki o temoni, e afuli ei ne ia temoni mai i tino.”

¹⁶ Ka ko nisi ne ma'nako o fakatogafiti a ia, ke maua mai i a ia se fakailoga mai te lagi.

¹⁷Ne iloa ne Iesu olotou mafaufauga, fai atu ei ki a latou, “So se malo e nofo mavaevae, kae fai taua i a latou eiloa e se tumau; mo se kaiga foki e nofo mavaevae, ka maofa valevale.

¹⁸Kafai foki Satani e fai taua i a ia eiloa, ka mafai la pefea o tumau tena malo? Me i otou muna, me ko te mana o Pelesepulo e afuli ei ne au a temoni mai tino.

¹⁹Kafai la ko Pelesepulo e afuli ei ne au a temoni, kae e oi la te mana ka afuli ei ne otou tama a temoni? Tela la, ka fai latou mo famasino ki a koutou.

²⁰Kae kafai ko te mana o te Atua e afuli ei ne au temoni; ko tena uiga ko oko mai ki a koutou te Malo o te Atua.

²¹“Kafai se tagata mafi ko toka 'lei ana mea taua, ka leoleo ne ia eiloa tena fale, ka 'sao foki ana mea katoa.

²²Kae kafai e vau se tino e mafi atu i a ia ke taua laua, kae takavale ei a ia, ko mea taua kola ne faka'na a ia ki ei, ka puke malo ne te tagata mafi, kae tufatufa atu.

²³ “A te tino tela e se kau maua, e 'teke mai ki a au; ka ko te tino foki tela e se fakaputuputu fakatasi maua, e fakamaofa ne ia.”

²⁴“Kafai ko fano ki tua a te agaga masei mai te tino, e fano ki koga e seai ne vai i ei, o salasala se koga mo ona fakamanava, kafai la ko se ana mauagina, ko fai ifo ei penei, ‘Au ka toe foki ki toku fale tela ne vau au i ei.’

²⁵Kae i te fokiatuga, ne matea ne ia me ko oti ne teu, ka ko toka foki.

²⁶Fano ei o aumai a nisi agaga e tokofitu kola e sili atu i te ma'sei i a ia; ko ulu atu, ko 'nofo ei i kona. A uiga la o te tino tena fakamuli, ka sili atu i te masei i lo te kamataga.”

²⁷I te palelega o pati a Iesu ki te mea tenei, ne faipati ake te fafine ki a ia mai loto i te vaitino penei: “Amutia te tinae tela ne fanau mai ei koe, mo ū kola ne ū ei koe.”

²⁸Ka ko Iesu ne tali atu penei, “Ikai, e sili atu te manuia o tino kola e faka'logo ki te muna a te Atua, kae tausi ki ei.”

²⁹ Ko gasolo ake o tokouke a te vaitino i tafa o Iesu, kamata ei o fai atu, “te kautama masei, e salasala latou ki se fakailoga, kae seai se fakailoga ka avatu ki ei, ko te fakailoga fua o Iona.

³⁰ I te mea i a Iona ne fai mo fakailoga ki tino Nineva, ka ko au te Tama a te Tagata ki te kautama tenei.

³¹ A te Tupu fafine mai te feitu ki Saute, ka 'tu fakatasi i te Aso Fakamasino mo tino o te kautama tenei, kae ka takufakamaseigina ne ia a latou; i te mea, ne vau a ia mai te sua kapakapa lagi o fakalogo ki te poto o Solomona; kae kiloke, ko i konei te tino tela e sili atu i a Solomona.

³² A tino Nineva ka 'tu ake fakatasi mo te kautama tenei i te Aso Fakamasino, kae ka takufakamaseigina foki i ei; i te mea ne salamo latou ona ko te talaiga a Iona; kae kiloke, ko i konei a te tino tela e sili atu i a Iona.”

³³“E seai se tino e tutu ne ia se moli, ko 'funa ei ki se koga pouli io me tuku i lalo o te kumete,[16] kae tuku eiloa ki te tugamoli, ko te mea ke matea te mainaga ne tino kola e ulu mai ki loto.

³⁴A te moli o te foitino ko ou mata, kafai ou mata e fia kilokilo faeloa ki mea 'lei, e maina katoa tou olaga; kae kafai la e fia kilokilo ki mea masei, ka pouli katoa tou olaga.

³⁵Tela la, fakaeteete o tausi tou mainaga, i te mea ma pouli.

³⁶Kae kafai e maina katoa tou foitino, e seai lele se koga e pouli i ei, ka katoatoa eiloa tena mainaga, e pela eiloa mo te moli i tena maina ki a koe.”

³⁷Ka koi faipati atu eiloa a Iesu, kae fakamolemole atu te Falesaio ke 'kai laua; ne ulu atu a ia, nofo ei ki lalo o kai,

³⁸ka ko te Falesaio ne ofo, i te mateaga ne ia, me seki 'fulu a lima o Iesu mai mua o te 'kaiga.

³⁹Kae ne fai atu ei te Aliki ki a ia, “A koutou Falesaio, e 'fulu fua i te tua o te ipu mo te tifa; kae i loto i a koutou, e fonu i te puke malo mea mo te masei.

⁴⁰Tino 'supa! E a, a te tino ne fai ne ia te feitu ki tua o te mea, e seki fai foki ne ia te koga i loto?

⁴¹Ke tuku atu a mea kola i otou loto ke fai mo meaalofa, kae kiloke, ko faka'magina a mea katoa mō koutou.

⁴² “Kalofa eiloa i a koutou Falesaio! Ne tuku atu ne koutou ki te Atua te tasi vae sefulu o fuaga lakau valevale, e oko eiloa ki fuaga foliki, kae fakapuli ne koutou te fakamasinoga mo te alofa o te Atua. E 'tau o fai a mea konei, kae mo a foki ma tiakina atu a nisi mea.

⁴³“Kalofa eiloa i a koutou Falesaio! I te mea e manako koutou ki nofoga sili i loto i fale tapuaki, mo te fia fakaaloalogina ne tino i malae.

⁴⁴Kalofa eiloa i a koutou! Me i a koutou ko pela eiloa mo tanuga e se matea, e sasale i ei tino, kae se iloa lele ne latou.”

⁴⁵Ne tali mai ki a ia se tokotasi o faiakoga o te Tulafono penei: “Te Faiakoga, a tau faipatiga ki mea konei, ko fakamasei mai ei foki ne koe matou.”

⁴⁶Kae ne fai atu a Iesu, “Kalofa eiloa i a koutou faiakoga o te Tulafono! I te mea ko fakaeke atu ne koutou ki tagata amoga 'mafa, kola e se mafai ne latou o amo; ka ko koutou, e se mafai lele o fakapatele atu se matikao e tasi ki te amoga.

⁴⁷Kalofa eiloa i a koutou! I te mea ko ati ake ne koutou a tanuga o pelofeta, kola ne tamate ne otou tamana.

⁴⁸Tela la, a koutou ko molimau ki galuega a otou tamana, kae loto foki koutou ki ei; ne tamate ne latou, kae ati ake ne koutou olotou tanuga.

⁴⁹Tela foki la, a te Poto o te Atua ne fai ake, ‘Ka uga atu ne au ki a latou ne pelofeta mo apositolo, ka tamate ne latou nisi o pelofeta mo apositolo, kae fakasaua ki nisi o latou.’

⁵⁰Me i te toto o pelofeta katoa ne maligi mai te kamataga o te lalolagi, ka sui ne te kautama tenei;

⁵¹ mai i te toto o Apelu ke oko ki te toto o Sakalia, tela ne tamate i te va o te fata faitaulaga mo te potu tapu. E tonu, au e fai atu ki a koutou, me ka sui mai te kautama tenei.

⁵²“Kalofa eiloa i a koutou faiakoga o te Tulafono! I te mea ko ave keatea ne koutou te ki o te poto, kae se ulu atu koutou, kae ne taofi foki ne koutou a tino kola ne ulu atu ki ei.”

⁵³Ne fano keatea a Iesu mai kona, ne kamata foki eiloa i kona a faiakoga o te Tulafono mo Falesaio, o fakakinau malosi atu ki a ia ke faipati ki mea e uke,

⁵⁴ke malei ei a ia i se pati e to mai tena gutu.