Read Te Tusi Tapu I Te Gana Tuvalu Lomiga Lua LUKA 12 Bible Online

LUKA 12 - Te Tusi Tapu I Te Gana Tuvalu Lomiga Lua bible

LUKA 12

¹ I kona foki eiloa, i te mumumaiga o tino e tokouke, ko fakatau fetekeaki ei latou, kae ne muamua o fai atu a Iesu ki ona soko penei: “Ke fakaeteete koutou mai te mea faka'fete a Falesaio, tela ko te fia amiotonu.

² E seai se mea e 'tao ke galo e se fakaasi, e seai foki se mea 'funa e se fakailoa.

³Tela la, so se mea ne fai'pati koutou ki ei i te pouliga, ka lagona i te ao; mo so se mea foki ne musumusu malie atu ne koutou ki taliga o tino i olotou potu, ka faipatigina atu i luga i tua o fale.”

⁴“Oku taugasoa, au e fai atu ki a koutou, sa ma'taku ki tino kola e tamate ne latou te foitino, me ka oti ake, ko se toe mafai ei ne latou o fai se mea.

⁵Kae ka fakailoa atu ne au a ia tela e 'tau o ma'taku koutou ki ei: ma'taku ki te Atua, me ka oti atu te tamatega, e a ia te pule o pei atu ki loto i Kena. E tonu, au e fai atu ki a koutou, ke ma'taku koutou ki a ia!

⁶“A tama manu fo'liki ki a koutou, e se taua malosi kae 'togi mama foki, kae e se puli eiloa se manu e tasi pena i mua o te Atua.

⁷E oko eiloa ki laulu i otou ulu, ko oti katoa ne lau. Tela la, sa ma'taku, me e sili atu eiloa te taua o koutou i manu foliki e uke!”

⁸“Au e fai atu ki a koutou, so se tino e takutaku atu ne ia au i mua o tino, ka ko au te Tama a te Tagata ka takutaku foki ne au a te tino tena i mua o agelu a te Atua.

⁹Ka ko te tino tela e fakafiti ne ia au i mua o tino, ka fakafitigina foki a ia i mua o agelu a te Atua.

¹⁰ “So se tino e faifai muna 'teke ki te Tama a te Tagata, ka fakamagalogina eiloa a ia; ka ko te tino e muna masei ki te Agaga Tapu, e se fakamagalogina.

¹¹ “Kae kafai e aumai ne latou koutou o fakamasino i fale tapuaki, io me i mua o kovana, io me ko tino pule, sa manava'se me ne a otou fakamasakoga io me ko pati ka fai atu.

¹²I te mea a te Agaga Tapu, ka akoako atu ki a koutou i te itula eiloa tena, ki muna kola ka fai atu ne koutou.”

¹³Ne fai atu ki a ia se tokotasi mai te vaitino, “Te Faiakoga, fai ake ki toku taina ke vaevae ake te ma tofi mai i te ma tamana.”

¹⁴Ka ko Iesu ne tali atu ki a ia penei: “Ko oi eiloa ne fai ne ia au ke fai mo famasino, io me o tufa a mea a koulua?”

¹⁵Ne fai atu a ia ki a latou katoa, “Ke matapula'pula koutou, kae fakaeteete i te matakanokano, me i te olaga tonu o te tino e se fakavae i luga i te uke o ana mea!”

¹⁶Tela la, fai atu ei ne Iesu a te tala fakatusa ki a latou, ana muna: “E isi se maukoloa, mo tena manafa fua 'lei.

¹⁷Ne mafaufau ifo i tena loto penei: ‘Se a te mea ka fai ne au, i te mea e seai se koga e teu ki ei aku fuaga lakau?’

¹⁸Ana muna ki a ia eiloa, tenei te mea ka fai ne au, ‘Ka ofa ne au oku fale saito, kae faka'tu ake a nisi fale 'lasi, mo fakaputu ki ei aku saito mo aku mea katoa.

¹⁹Ka palele, ko muna ifo ei au ki a au eiloa: Te tagata manuia, ko maua ne koe a mea 'lei katoa eiloa e manako koe ki ei mo tausaga e uke. Sagasaga fua la, kai, inu, kae fakafiafia!’

²⁰Ka ko te Atua ne fai atu pela ki a ia, ‘Te tagata valea! I te po eiloa tenei, a tou agaga ka ave keatea mai i a koe, ka ko mea la ne fakatoka ne koe, ko oi ka fai ma ia?”’

²¹Tela la, “ko te tino e uke ana koloa kae fakaaoga eiloa ne ia mo ia ake eiloa, e se maukoloa a ia i mua o te Atua.”

²²Ne fai atu a Iesu ki ona soko, “Tenei la, au e fai atu ki a koutou, sa manava'se ki otou ola, ki mea e 'kai koutou ki ei, io me ko mea e pei koutou ki ei.

²³Me sili atu eiloa a te ola i meakai, e sili atu foki te foitino i gatu.

²⁴Mafaufau ake koutou ki manulele; e se 'toki lakau, e se fakaputuputu mea, e seai foki ne olotou fale koloa mo fale saito. Kae fagai eiloa latou ne te Atua! Ka ko koutou e sili fakafia atu eiloa te otou taua i manu!

²⁵Ko oi eiloa te tino ia koutou ka mafai o ola leva atu[17] mafai e manavase ki tena ola?

²⁶Kafai la e seai se tino i a koutou, e mafai ne ia o fai se mea foliki penei, ai a la e manava'se ei koutou ki nisi mea?

²⁷ Mafaufau ake koutou ki talotalo me ola pefea: e se ga'lue, e se 'tui gatu; kae fai atu au ki a koutou, a Solomona i tena 'malu katoa, e seki pei eiloa ki se gatu gali, e pela mo se pula o pula konei.

²⁸Kae kafai la ko te Atua, ne fai ne ia te mouku ke ola mai pena i te aso nei, taeao ko 'sunu ki te afi, kae ai a la ka se fakalavalava ei ne ia koutou? Ko foki la i te fo'liki o otou fakatuanaki!

²⁹“Tela la, sa manava'se, o salasala faeloa ki meakai mo mea e inu ei koutou.

³⁰I te mea, a mea katoa penei, e salasala ki ei te lalolagi. Kae e iloa ne te otou Tamana, me ma'nako foki koutou ki mea konei.

³¹Kae ke 'sala ake ne koutou tena Malo, ko fakaopoopo atu ei ki a koutou a mea katoa.”

³²“Taku lafu foliki ko apositolo, ke se ma'taku koutou i te mea ko loto fiafia eiloa te otou Tamana o tuku atu ki a koutou a te Malo.

³³Fakatau atu otou mea, kae avatu a tupe mo fai meaalofa. Fakatoka ne taga fui ma'sei ma koutou, kae tausi te otou maumea i te lagi, ko te koga tela e se mafai o 'galo i ei, e seai foki ne tino kaisoa i ei, e seai foki se mogamoga e fakamasei ne ia.

³⁴Me ko te koga e tuku i ei otou koloa, e 'nofo foki i ei otou loto.”

³⁵ “Sai ke 'mau otou sulu, kae ke 'ka foki mo otou moli.

³⁶ Ke fai koutou pela mo tavini kola e toka faeloa i so se taimi manafai e foki mai te lotou pule mai i te 'kaiga o te fakaipoipoga; ko te mea ke vave 'tala te mataloa ne latou, manafai e vau kae tukituki mai.

³⁷Amutia tavini kola e maua mai ne te pule ka koi ala atu. E tonu, au e muna atu ki a koutou, me ka 'sai ne ia tena fusi, kae faka'nofo latou ne ia i te laulau, kae laulau atu ne ia olotou meakai.

³⁸Kae kafai e vau i te valuapo, io me mai tua ifo, kae maua atu ne ia latou e ala, amutia eiloa a tavini kona.

³⁹ Kafai a te tino e o ia te fale e iloa ne ia a te taimi e o'mai sale i ei a tino kai'soa, ka taumafai eiloa o alamati latou kona ke mo a ma ulu ki loto i tena fale.

⁴⁰Ke toka koutou me i a au te Tama a te Tagata, ka vau i se itula e seki fakamoemoegina ne koutou.”

⁴¹Ne fai mai Petelu, “Te Aliki, tau tala fakatusa tenei e mo matou fua, io me mo tino katoa?”

⁴²Kae ne tali atu te Aliki penei, “Ko oi la te tavini fakamaoni kae poto, tela ka 'tofi ne tena pule ke fai mo ulu o te fale katoa, kae ka fakasoa atu foki ne ia ki nisi tavini olotou meakai, i taimi e 'kai ei latou?

⁴³Amutia a te tavini tena, manafai e maua mai ne tena pule, me galue eiloa.

⁴⁴E tonu, au e fai atu ki a koutou, i te pule ka fai ne ia a te tavini tena, ke pule i ana mea katoa.

⁴⁵Kae kafai e mafaufau te tavini tena, penei: ‘A toku pule koi tuai o vau,’ tela kamata ei o kini ne ia tavini tagata mo tavini fafine. Oti fano ei a ia o kai kae inu ke konā.

⁴⁶Ka oko mai a te pule o te tavini tena i se taimi ne seki fakamoemoe a ia ki ei, ko te mea ke tuku a ia ne tena pule ke 'nofo tasi mo tavini se fakamaoni. A te matai ka kati faka likiliki ne ia a ia, kae ka maua ne ia te ikuga fakamataku o te se fakalogo.

⁴⁷“A te tavini tela e iloa ne ia a te mea e manako ki ei tena pule o fai, kae se toka a ia o fai, ka fakasala 'mafa;

⁴⁸ka ko te tavini tela e se iloa ne ia te loto o tena pule, kae fai eiloa ne ia a mea kola e 'tau ki ei te fakasala, ka mama fua tena sala. Ko te tino tela e uke a mea ne tuku ki a ia, ka uke atu foki a mea e fia maua mai i a ia; ka ko te tino tela e tai uke atu a mea ne tuku atu ki a ia, e tai uke foki a mea e fia maua mai i a ia.”

⁴⁹“Au ne vau o fa'ka a loto o tino ki te tala 'lei, kae aku muna eiloa me ko oti ne fai te mea nei!

⁵⁰ E se mafai o fai a te galuega tena seiloga ko oti ne maua ne au a te papatisoga o oku puapuaga, tenei ko kufaki atu au ki ei ke oti 'lei eiloa.

⁵¹E a, e taofi koutou pela i a au ne vau o aumai a te filemu ki te lalolagi? Ikai, e se ko te filemu ka ko te mavaevae.

⁵²Mai i te taimi nei, se kaiga e tokolima tino i ei ka mavae'vae. A te sua tokotolu ka ita ki te sua tokolua, ko te sua tokolua ki te sua tokotolu.

⁵³ A te tamana ka taua mo tena tama tagata, pela foki a te tama tagata ki tena tamana, pena foki a te matua ki tena tama fafine, pela foki te tama fafine ki tena matua, a te matua ki te avaga a tena tama tagata, pela foki mo te matua o tena avaga, ka faitaua ki a ia.”

⁵⁴Ne fai atu foki a Iesu ki te vaitino, “Kafai e lavea ne koutou se kaumana, ko fanake i te togala, se mea vave eiloa koutou o fai mai penei, ‘Ka to te vaiua,’ ko te mea eiloa ko tō.

⁵⁵Kae kafai ko matea ne koutou me ko agi mai te matagi mai saute ko fai mai koutou, ‘Ka 'kasa te la,’ ko te mea eiloa ko 'kasa mai te la.

⁵⁶A koutou ne tino 'loi! E iloa ne koutou o fakamatala a mafulifuliga o te lalolagi mo te lagi; kae ai a la e se iloa ei ne koutou o fakamatala a te taimi nei?”

⁵⁷“Ai a e se iloa ei ne koutou o fakamasino te mea tonu i a koutou eiloa?

⁵⁸Kafai e olo koulua mo te tino ne ave ne ia koe ki te famasino, taumafai o fai se faka'leiga ma koulua i te alatu, i te mea ma toso ne ia koe ki te famasino maluga, ko te famasino maluga ka tuku atu ne ia koe ki te pulisimani, ka ko te pulisimani ka pei ne ia koe ki te fale puipui.

⁵⁹Au e fai atu ki a koe, me e se mafai eiloa koe o 'tala ki tua, seiloga ke 'togi muamua tau sala.”