Read Te Tusi Tapu I Te Gana Tuvalu Lomiga Lua LUKA 14 Bible Online

LUKA 14 - Te Tusi Tapu I Te Gana Tuvalu Lomiga Lua bible

LUKA 14

¹I te sua Sapati, ne fanatu a Iesu o fai 'kaiga i te fale o te sua takitaki o Falesaio, kae ne alamati tino ki a ia.

²Ne vau ki a Iesu se tagata e maua ne te masaki fulafula.

³Ne faipati atu a Iesu kae fesili atu ki faiakoga o te Tulafono mo Falesaio penei: “E taga i te Tulafono a tatou o faka'lei masaki i te Sapati me ikai?”

⁴Ne seai se tino o latou ne tali mai, puke atu ei a Iesu ki te tagata masaki, o fai ke 'lei kae uga atu a ia ke fano.

⁵ Kae ne fai atu foki a ia ki a latou, “Kafai e isi se tino i a koutou e isi sena tamaliki tagata io me se pulumakau ko to ki te lua, e a, e se mafai ne koutou o 'futi ake ki luga i te Sapati?”

⁶Ka ko se mafai ne latou o tali mai ki a ia ki te mea tenei.

⁷I te mateaga ne Iesu a latou kola ne ami, e filifili a nofoga sili mo latou, tala atu ei ne ia ki a latou katoa a te tala fakatusa tenei:

⁸ “Kafai e ami koe ne se tino ki se 'kaiga o te fakaipoipoga, ke se nofo koe i se koga sili. I te mea manafai e isi foki se tino ne ami ne ia e sili ake i a koe;

⁹ka fanatu la a ia tela ne ami ki a koulua o fai atu ki a koe, ‘Tuku mo ia nei te nofoga tenei.’ Ko fano ei koe mo te mavale o nofo i te koga tafasili i te malalo.

¹⁰Kae kafai e ami koe, fano eiloa koe o nofo i te koga tafasili i te malalo, ko te mea ke vau te tino tela ne ami ne ia koe, o fai atu, ‘Vau ki luga nei e toku taugasoa, ki te nofoga e sili atu i te 'lei. ’ Ka 'malu ei koe i mua o tino kola e 'kai fakatasi koutou.

¹¹ So se tino e loto fia sili, ka fakamalalogina. Ka ko ia tela e loto malalo, ka fakamalugagina.”

¹²Tela, fai atu ei Iesu ki te tino e a ia te 'kaiga: “Kafai e fai sau 'kaiga, ke se ami ne koe ou taugasoa, me ko ou taina, me ko ou kaiga, io me ko tino mauko'loa kola e tuakoi mo koe, i te mea ka toe ami ne latou a koe; ko tena uiga la, ka toe maua ne koe te taui o au mea ne fai.

¹³Kae kafai e fai sau 'kaiga, ke ami ne koe tino mativa, vae 'mutu, 'pili mo tino 'kivi ei,

¹⁴e manuia ei koe, me se mafai ne latou o taui mai ki a koe. Kae ka taui mai ne te Atua ki a koe manafai e toetu mai a tino amiotonu mai te mate.”

¹⁵Ko te tagata e tokotasi o latou kola ne 'kai i te laulau, ne lagona ne ia te mea nei, kae ne fai mai ki a Iesu: “Amutia latou kola ka 'kai i te Malo o te Atua!”

¹⁶Ne fai atu a Iesu ki a ia: “E isi se tagata ne fakatoka tena 'kaiga lasi, kae ne ami ne ia a tino e tokouke.

¹⁷Ko pili ki te taimi o te 'kaiga, kae uga atu ne ia tena tavini ke fai atu ki ana tino ami penei: ‘O'mai me ko toka mea katoa!’

¹⁸Kae ne faka'fiti katoa latou takitokotasi, muna a te tino muamua ki te tavini, ‘Ko oti ne 'togi toku manafa kae 'tau au o fano o onoono ki ei, ke talia mai la ne koe taku fakamolemole.’

¹⁹Muna a te sua tino, ‘Ne 'togi ne au e lima vasoa pulumakau, kae ka fano nei au o tofotofo; ke talia mai la taku fakamolemole.’

²⁰Ne fai mai foki te sua tino, ‘Au nei ko oti ne fakaipoipo, tena te mea ko se fanatu ei au!’

²¹Ne foki atu te tavini, kae ne fakamatala atu a mea katoa ki tena pule. Ko oko eiloa i te kaitaua o te pule o te 'kaiga, kae fai atu ki tena tavini, ‘Fano ke vave ki auala 'lasi mo alatu i tua o te fa'kai, kae aumai ki konei a tino ma'tiva, vae 'mutu, 'pili mo tino 'kivi.’

²²E se leva foki ko te tavini eiloa ko fai mai, ‘Te aliki, a tau fakatonuga ko oti eiloa ne fai, kae seki taitai o fonu te fale.’

²³Tela, fai atu ei te pule ki te tavini, ‘Fano ki auala 'lasi mo ala fo'liki i tua o te fa'kai, o fai malo atu ki tino ke o'mai katoa, ko te mea ke fonu toku fale.

²⁴Au e fai atu ki a koutou katoa, e seai eiloa se tino i a latou kola ne ami, e kai i taku 'kaiga!’"

²⁵Ne olo fakatasi mo ia te vaitino. Ne mafuli mai a Iesu kae fai atu ki a latou:

²⁶ “So se tino e vau ki a au, e se mafai o fai mo oku soko, vagana ke tulaga muamua te olotou alofa mai ki a au, i lō olotou tamana, matua, avaga mo tama, taina mo tuagane, mo ia ei.

²⁷ A latou kola e se amo olotou sataulo, kae se tautali mai i a au, e se mafai o fai a latou mo oku soko.

²⁸Kafai foki se tino i a koutou ko mafaufau o faite se olo, e 'tau eiloa o nofo muamua ki lalo o fuafua te 'togi, ke iloa me ko lava ana tupe e fakaoti ei tena galuega.

²⁹Kafai e se fai pena ne ia, ka se mafai o fakapalele te olo tela ko oti ne fakatu te fakavae; kae ka fakatauemu ki a ia tino katoa kola ne lavea ne latou.

³⁰Kae ka fai ake latou penei: ‘A te tino tenei ne kamata o fai te galuega kae se mafai ne ia o fakapalele!’

³¹Kafai foki se tupu e fano mo sena kautau e toko sefulu afe tagata, o taua mo te sua tupu tela e vau mo tena kautau e toko lua sefulu afe tagata, e 'tau mo ia o nofo muamua ki lalo, o mafaufau me lava tena malosi o fakafetaui te sua tupu.

³²Kafai e se mafai ne ia, e 'tau mo ia o uga atu ne ana avefekau o fakafetaui ki te sua tupu, ka koi tuai o oko mai, ko te mea ke fai se feagaiga e maua i ei se filemu.”

³³Ne fakapalele muna a Iesu penei, “E pena foki eiloa mo koutou, e se mafai o fai a se tino mo oku soko seiloga ko tiakina ana mea katoa.”

³⁴“Se mea 'lei te masima, kae kafai e masei, e seai eiloa se auala e mafai ei o fai ke 'lei.

³⁵Ko se aoga mo te laukele, e se aoga foki o fai kaiao i ei, na ko te pei keatea. Kafai e isi ne otou taliga, na faka'logo mai.”