Read Te Tusi Tapu I Te Gana Tuvalu Lomiga Lua LUKA 15 Bible Online

LUKA 15 - Te Tusi Tapu I Te Gana Tuvalu Lomiga Lua bible

LUKA 15

¹ I te sua aso, e tokouke a tino ao lafoga mo tino agasala ne o'mai o fakalogo'logo ki akoakoga a Iesu.

²A Falesaio mo faiakoga o te Tulafono ne mui'mui penei, “A te tagata tenei e fiafia ki tino agasala, kae 'kai fakatasi foki mo latou!”

³Tela, fai atu ei ne Iesu ki a latou a te tala fakatusa tenei:

⁴“Kafai se tino o koutou e isi ne ana mamoe e lau, kae galo se tasi o latou, se a te mea ka fai ne ia? E tuku ne ia te tinoiva mo te tokoiva mamoe i te vao, kae fano o 'sala te mamoe ne galo ke maua.

⁵Kafai e maua, ko oko eiloa i tena fiafia, kae amo ki ona tuauma.

⁶Ko ave ei ne ia ki tena fale, kae ami ona taugasoa mo ona tuakoi ke o'mai. Ko fai atu ei a ia ki a latou, ‘Ke fiafia ake tatou, me ko oti ne maua ne au taku mamoe ne galo!’

⁷Au e fai atu ki a koutou, me pena foki eiloa te lasi o te fiafia i te lagi i te tino agasala e tokotasi, ko salamo i lo te tinoiva mo te tokoiva tino amiotonu, kola e se aoga ki ei te salamo.”

⁸“E pela foki mo se fafine e isi ne ana tupe siliva e sefulu, kae ne galo e tasi. Se a la tena mea ka fai? Ka fa'ka ne ia se moli kae tuetue ne ia tena fale, kae onoono faka'lei ki koga katoa ke maua ne ia te tupe.

⁹Kafai ko maua ne ia te tupe, ko ami ei ne ia ona taugasoa mo ona tuakoi ke o'mai. Ko fai atu ei a ia penei, ‘Ke fia'fia fakatasi ake tatou, me ko maua ne au taku tupe ne galo!’

¹⁰Au e fai atu ki a koutou, me pena foki eiloa te fia'fia o te kau agelu a te Atua, i te tino agasala e tokotasi ko salamo.”

¹¹Ne toe fai atu a Iesu: “E isi se tagata e tokolua ana tama tagata.

¹²A te toekimuli ne muna atu ki tena tamana, ‘Toku tamana, na tuku mai nei toku vaega mai i a koe.’ Tela, vaelua ei ne te tamana ana mea i ana tama tagata e tokolua.

¹³E fia fua aso mai tua ifo, ko fakatau atu ne te toekimuli a nisi mea o tena vaega, tiaki tena kaiga kae fano mo tupe. Ne fano ki se fenua 'mao, kae fakamaumau ana tupe ki mea se aoga.

¹⁴Ne fakamaumau ne ia ana mea katoa. Ne poko te oge lasi i te fenua tena, palele atu foki eiloa mo ana mea.

¹⁵Ne fano o galue i se tagata e tokotasi i te fenua tena, kae ne uga a ia ne te tino tena ke fano o tausi puaka i tena manafa, ko te toe galuega fatauva eiloa tena.

¹⁶Ana muna eiloa ke kai ne ia meakai a puaka, me seai se tino ne avatu ne meakai ma ia.

¹⁷Fakamuli ake ko o'mai mafaufauga 'lei kae fai ake pela: ‘A tino ga'lue a toku tamana e uke atu olotou meakai, kae se mafai ne latou o kai olotou meakai ke palele, kae tenei au e likiliki faeloa!

¹⁸Au ka tu ki luga o foki ki toku tamana, o fai atu ki a ia penei: “Toku tamana, au ko agasala ki te Atua pela foki ki a koe.

¹⁹Ko se 'tau o taku au ko tau tama, kae ke fai au mo fai se tino o au tino ga'lue.” ’

²⁰Tela, tu ake ei a ia ki luga kae foki ki tena tamana. “Ka koi 'mao eiloa a ia mai te fale, ka ko lavea mai a ia ne tena tamana. Ko fonu te loto o tena tamana i te alofa kae tele atu, 'sai ne ia kae sogi.

²¹Kae muna mai a ia, ‘toku tamana, au ko agasala ki te Atua e pela foki ki a koe. Ko se 'tau au o taku ko tau tama.’

²²Ka ko kalaga te tamana ki ana tavini, ana muna: ‘Fakavave! Aumai te gatu sili i te 'lei o fakapei ki a ia. Faulu se mama ki tena maikao kae fakataka ona vae.

²³Ko olo ei koutou o puke mai te tama pulumakau putaputa o ta mo fai te 'kaiga fiafia a tatou.

²⁴Me ko taku tama tenei ne mate, kae nei ko ola; ne galo, kae nei ko maua.’ Tela la, kamata ei te 'kaiga.

²⁵“A te toekimua i te taimi tena, e i te vao. I tena fokimaiga, ko pili mai ki te fale, ne lagona ne ia a leo o lakau fakatagitagi mo tino e 'saka.

²⁶Ne kalaga atu a ia ki te tavini e tokotasi; kae fesili atu ki ei penei, ‘Se a te mea tena e fai?’

²⁷Ne tali mai te tavini, ‘Ko tou taina ko foki mai, ka ko tou tamana ne ta ne ia te tama pulumakau, me ko toe foki mai a ia e ola.’

²⁸Ko oko eiloa i te makonokono o te toekimua. Ko se mafai ne ia o ulu ki loto i te fale; tela, vau ei ki tua tena tamana kae fakamolemole atu ki a ia, ke vau ki loto i te fale.

²⁹Ne tali atu a ia ki tena tamana, ‘Kiloke, e uke tausaga ne galue ei au mo koe, kae seki soli fakatasi ne au sau fakatonuga. Ne a mea ne aumai ne koe ma aku? Ne seki aumai ne koe se tama kouti mo fakafiafia ei au mo oku taugasoa.

³⁰Ka ko tau tama tena ne fakamaumau ne ia au mea ki fafine fina lalolagi, ko foki mai i te taimi nei, ta ei ne koe tau tama pulumakau putaputa ma ia.’

³¹Ne tali atu tena tamana penei, ‘Taku tama, a taua e 'nofo tasi eiloa i te kaiga, tela la, e a koe aku mea katoa.

³²Ko 'tau foki o fai se 'kaiga e fakafiafia ei tatou, me i tou taina tena ne mate, kae nei ko ola, ne galo, kae nei ko maua.”’