Read Te Tusi Tapu I Te Gana Tuvalu Lomiga Lua LUKA 16 Bible Online

LUKA 16 - Te Tusi Tapu I Te Gana Tuvalu Lomiga Lua bible

LUKA 16

¹Ne fai atu foki a Iesu ki ona soko, “E isi se maukoloa mo tena tavini pule, kae ne 'moli a ia ki te pule me ne fakamaumau ne ia tupe a tena pule.

²Ne ami a ia ne te pule kae fai atu ki ei, ‘Se a te mea tenei ko logo ei au e uiga ki a koe? Na aumai te tala katoa o tau galuega, me ko se toe fai nei koe mo tavini pule.’

³Ne fai ifo te tavini ki a ia eiloa, ‘Ko pili au o fakapalele ne toku pule mai taku galuega. Se a te mea ka fai ne au? Au nei e se na loa ko malosi o keli lua, e ma foki au o akai atu.

⁴Ko iloa nei ne au taku mea ka fai, ko te mea ke talia au ne tino i olotou fale, manafai ko fakateka au mai taku galuega.’

⁵Tena, ami ei ne ia tino takitokotasi kola ne kaitalafu i tena pule. Ne fai atu a ia ki te tino muamua, ‘E fia tau kaitalafu i toku pule?’

⁶Ne tali mai a ia, ‘E selau paelo sinu olive.’ Ne fai atu a ia ki ei, ‘Puke ki tau tusi kaitalafu, kae nofo fakavave ki lalo o tusi e lima sefulu.’

⁷Ne fai atu foki a ia ki te sua tino, ‘Ka ko koe, e fia tau kaitalafu?’ Ne tali mai a ia, ‘E selau taga saito.’ Ne fai atu a ia ki ei, ‘Puke ki tau tusi kaitalafu o tusi e valu sefulu.’

⁸Ne tavae atu te pule ki te tavini amio setonu ona ko tena faitogafiti poto; me i tino o te lalolagi nei e sili atu te lotou 'poto i olotou kautama, i lo tino o te mainaga.

⁹“Tela la, au e fai atu ki a koutou: Ke fai ne taugasoa mo koutou i koloa faka te lalolagi, ke talia ei koutou ne latou i fale e se gata mai, manafai ko se toe aoga.

¹⁰A ia tela e fakamaoni i mea fo'liki, e fakamaoni foki i mea 'lasi. Ka ko ia tela e se fakamaoni i mea fo'liki, e se fakamaoni foki i mea 'lasi.

¹¹Kafai foki e se fakamaoni koutou i koloa faka te lalolagi, ko oi la te tino ka tuku atu ne ia ki a koutou te tina koloa tonu ke tausi?

¹²Kafai foki e seki fakamaoni koutou i mea a se isi tino, ko oi la se tino ka tuku atu ne ia a mea totino a koutou?

¹³“E seai se tavini e mafai o tavini atu ki pule e tokolua; i te mea ka takalialia ki te sua tino kae alofa ki te sua tino; io me galue fakamaoni ki te sua tino kae fakaseaoga ne ia te sua tino. E se mafai ne koutou o tavini fakatasi ki te Atua pela foki mo koloa faka te lalolagi.”

¹⁴Ne lagona ne Falesaio a mea katoa konei, kae ne fakatauemu latou ki a ia, me ko latou ko tino e matatupe.

¹⁵Kae ne fai atu a Iesu ki a latou, “A koutou ko tino kola e fia amiotonu i mua o tino, ka ko te Atua e iloa ne ia otou loto; me ko te mea e sili i te 'lei i tino, se mea se aoga tena i te kilokiloga a te Atua.

¹⁶“A Tulafono a Mose mo Tusitusiga a pelofeta ne oko eiloa te lotou aoga ki a Ioane te Papatiso; mai i te taimi tena, a te Tala 'Lei o te Malo o te Atua ko folafola atu, a tino katoa foki ko ulu atu mo te fakamalosi ki ei.

¹⁷ E faigofie atu o gata te lagi mo te lalolagi, i lo te fakaseaoga o se mataimanu foliki e tasi o te Tulafono.

¹⁸ “So se tagata e fakateka tena avaga kae avaga ki te sua fafine, ko mulilua; so se tagata foki e avaga ki te fafine ko mavae mo tena avaga, ko mulilua foki a ia.”

¹⁹“E isi se tagata maukoloa, tela ne pei ki gatu tafasili i te 'togi 'mafa, kae ne ola i te olaga sili i te fiafia i aso katoa.

²⁰Kae e isi foki se tagata mativa e igoa ki a Lasalo, ne takato i tena mataloa, kae soko eiloa tena foitino i matakili,

²¹tela ne manako o kai i matutuga meakai kola ne matutu ifo i te laulau a te tagata maukoloa; a kuli foki ne o'mai o seposepo ona matakili.

²²Ne mate te tagata mativa kae ne ave ne agelu ki te fatafata o Apelaamo. Ne mate foki te tagata maukoloa, kae tanu;

²³ne i Seoli[18] foki, ko fakapuapuagatia, ne kilo ake ona mata kae lavea ne ia Lasalo i te feitu o Apelaamo, e tai 'mao mo ia.

²⁴Ne kalaga atu a ia, ‘Tamana Apelaamo, a koe ke alofa mai ki a au, uga mai Lasalo ke faka'siu tena maikao ki te vai, e faka'moko ei toku alelo; me ko oko eiloa i toku fi'ta i te 'vela o te afi nei.’

²⁵Kae ne fai mai Apelaamo, ‘Taku tama, masaua me ne maua ne koe au mea 'lei i tou olaga, ka ko Lasalo, ne maua ne ia mea ma'sei; kae nei ko manuia Lasalo ka ko fi'ta koe.

²⁶E se gata foki i mea kona, e isi te vanu lasi i te va o tatou, e se mafai ne se tino mai konei o sopo atu ki kona, e se mafai foki se tino mai kona o sopo mai ki konei.’

²⁷Ne fai atu a te tagata maukoloa, ‘Ko 'lei e tamana, kae fakamolemole atu au ke uga atu ne koe a ia ki te kaiga o toku tamana,

²⁸me tokolima oku taina; ko te mea ke polopoloki ne ia latou ke se o'mai foki latou ki te koga puapuagatia tenei.’

²⁹Kae ne fai mai Apelaamo, ‘Kola e i a latou a Mose mo pelofeta, ka faka'logo la latou ki ei.’

³⁰Kae ne fai atu a ia, ‘Ikai e toku tamana ko Apelaamo; kafai e fanatu ki a latou se tino mai tino 'mate, ka salamo ki olotou agasala.’

³¹Kae ne fai mai a ia, ‘Kafai e se faka'logo latou ki a Mose mo pelofeta, e se talitonu foki eiloa latou, manafai e toetu mai se tino mai tino 'mate.’ ”