Read Te Tusi Tapu I Te Gana Tuvalu Lomiga Lua LUKA 17 Bible Online

LUKA 17 - Te Tusi Tapu I Te Gana Tuvalu Lomiga Lua bible

LUKA 17

¹Ne fai atu a Iesu ki ona soko: “A fakaosoosoga ki te agasala e oko mai eiloa; kae kalofa eiloa i a ia tela e fakatupu ne ia te agasala.

²E sili atu moi 'sai se fatusolo lasi i tena ua kae pei ki te moana, i lo te fakatupu ne ia ke agasala a tino fo'liki konei.

³Ke tausi faka'lei koutou! “Kafai e agasala sou taina, polopoloki atu, kafai e salamo, fakamagalo atu.

⁴Kafai foki e agasala fakafitu mai ki a koe i te aso, kae foki fakafitu mai foki ki a koe o fai mai, ‘Au ko salamo ki aku agasala,’ e 'tau la mo koe o fakamagalo atu.”

⁵Ne fai mai a soko ki te Aliki, “Fakalasi ake te motou fakatuanaki.”

⁶Ne tali atu a te Aliki, “Kafai e fo'liki otou fakatuanaki e pela mo se fuaga o te sinapi, kae kafai se fakatuanaki tonu eiloa, ko tena uiga e mafai o fai atu koutou ki te lakau lasi penei, ‘Ke maunu nei koe kae fano o tu i te tai; ka fai eiloa pena.”’

⁷“Kafai e isi se tino o koutou, e isi sena tavini fakamalū laukele io me tausi mamoe, e a, e fai atu a ia ki ei i te taimi e foki mai ei i te vao, ‘Vau fakavave o nofo ki lalo o kai’?

⁸E se pena! Kae ka muna atu koe penei, ‘Fakatoka taku 'kaiga ke toka, 'sai tou gatu laulau meakai, kae laulau mai aku meakai, ke kai au kae inu, ka palele ko kai ei koe kae inu.’

⁹E fakafetai atu la a ia ki te tavini, i te mea ne fai ne ia a mea kola ne fakatonu atu ke fai?

¹⁰Ke pena foki koutou, kafai ko oti ne fai ne koutou a mea katoa kola ne fakatonu atu ke fai, fai atu la, ‘A matou nei ne tavini se aoga; ne fai fua ne matou te motou tiute.”’

¹¹I te malagaatuga a Iesu ki Ielusalema, ne tipa atu i te va o Samalia mo Kalilaia.

¹²Ne ulu atu a ia ki se fa'kai e tasi, kae ne fakafetaui ne lepela e tinoagafulu, ne 'tu 'mao mai,

¹³kae ne ka'laga mai penei, “Iesu e te Aliki! a koe ke alofa mai ki a matou!”

¹⁴ Ne lavea ne Iesu latou kae fai atu, “Olo o fakaasi atu ki faitaulaga ke iloilo koutou.” I te lotou ologa, 'lei ei olotou lepela.[19]

¹⁵A te tokotasi o latou, i tena laveaga i a ia ko 'lei, ne toe foki mai ki a Iesu, kae ne 'viki atu ki te Atua mo te leo malosi.

¹⁶Kae ne fakasiga ki vae o Iesu, kae fakafetai atu. A te tagata se tino Samalia.

¹⁷Ne fai atu ei a Iesu penei, “E tinoagafulu a tino ne faka'lei olotou lepela: ko fea la te tokoiva?

¹⁸Ai a ne vau tokotasi ei te tino o fenua fakaatea o fakafetai ki te Atua?”

¹⁹Ne fai atu a Iesu ki a ia, “Tu ki luga kae fano; ko tou fakatuanaki ko 'lei ei koe.”

²⁰Ne fesili mai ki a Iesu a nisi Falesaio me ka oko mai afea te Malo o te Atua. Ne tali atu a ia, “A te Malo o te Atua e se oko mai mo ni fakailoga ke lavea atu;

²¹e seai se tino e fai ake, ‘Kiloke, tenei i konei!’ io me ‘Tela i ko!’ kae kiloke, a te Malo o te Atua tena eiloa i loto i a koutou.”[20]

²²Ne fai atu ei a ia ki soko, “Ka oko mai se taimi ka ma'nako ei koutou o fia 'kilo ki se aso e tasi o te Tama a te Tagata ko au tena, kae ka se lavea eiloa ne koutou.

²³Kae ka muna mai foki latou ki a koutou, ‘Kiloke, tela i ko!’ io me ‘Kiloke, tenei i konei!’ Sa olo koutou ki ei, sa tau'tali atu foki ki ei.

²⁴Me e pela mo te 'lapa mai o te uila, kae maina ei te lagi mai te sua feitu ke oko atu ki te sua feitu, ka pena foki eiloa te Tama a te Tagata i tena aso.

²⁵Kae 'tau eiloa mo ia o logo'mae muamua i mea e uke, kae ka se talia foki ne te kautama tenei.

²⁶ E pela foki mo te faiga i aso o Noa, ka pena foki eiloa mo te faiga i aso o te Tama a te Tagata.

²⁷ Ne 'kai latou kae inu, ne a'vaga latou kae ne fakatau a'vaga foki fakapouliuli, ke oko eiloa ki te aso ne ulu atu ei a Noa ki te vaka, ne oko mai ei te lofiaga kae ne 'mate katoa ei latou.

²⁸Ka pela foki eiloa mo aso o Lota; ne 'kai kae inu latou, ne fakatau mai kae fakatau atu, ne 'toki lakau kae faite fale foki;

²⁹ka ko te aso ne fano keatea ei Lota mai Sotoma, ne 'to ifo a te afi mo te teio e pela mo ne vaiua mai te lagi, kae ne 'mate katoa ei latou.

³⁰Ka pena eiloa i te aso e fakaasi mai ei te Tama a te Tagata.

³¹ “I te aso tena, a ia tela i luga o te tuafale, mo a eiloa mana fanaifo o ave keatea ana mea kola i loto i te fale; pela foki mo ia tela i te vao, mo a mana toe foki mai.

³² Ke masaua ne koutou te avaga a Lota.

³³ So se tino e taumafai o fakasaosao tena ola ka maumau eiloa; so se tino foki e se manatu 'mafa ki tena ola ka sao a ia.

³⁴Au e fai atu ki a koutou, i te po tena e tokolua a tino ka 'moe i te moega e tasi; e tokotasi ka ave keatea, ka ko te sua tino ka tuku.

³⁵E tokolua fafine ka solo saito fakatasi; e tokotasi ka ave keatea, kae ka tuku te sua tino.

³⁶E tokolua tagata ka ga'lue i te fatoaga: e tokotasi ka ave keatea, kae ka tuku te sua tino.”

³⁷Ne fai mai a soko ki a ia, “Te Aliki, e fai i fea?” Ne tali atu a Iesu, “Ko te koga e takato i ei se foitino mate, e 'luku ki ei aeto.”