Read Te Tusi Tapu I Te Gana Tuvalu Lomiga Lua LUKA 18 Bible Online

LUKA 18 - Te Tusi Tapu I Te Gana Tuvalu Lomiga Lua bible

LUKA 18

¹Ne taku atu foki ne Iesu a te tala fakatusa, e akoako atu ki a latou ko te mea ke 'tau mo latou o 'talo sale, kae ke se fakavaivai.

²“Ne i te fa'kai e tasi se famasino maluga e se mataku ki te Atua, kae se ava foki ki tino.

³Ne i te fa'kai foki tena se fafine ko mate tena avaga, e vau sale eiloa ki a ia kae fai atu ki ei, ‘Fesoasoani mai o fakamasino toku fili!’

⁴Ne se talia ne ia i mo aso, kae fakamuli ake ko fai ifo ei a ia ki a ia eiloa, ‘E ui eiloa i toku se mataku ki te Atua mo te se ava ki tino,

⁵kae ona ko te fakalavelave mai ki a au o te fafine tenei ko mate tena avaga, ka fakamasino ei ne au ana mea, i te mea ma fakafi'ta au ne ia i tena vau sale.”’

⁶Ne fai atu foki te Aliki, “Faka'logo ki muna ne fai atu ne te famasino se amiotonu.

⁷E a, e se fakamasino ne te Atua ke 'sao ona tino filifilia, kola e fakatagi atu ki a ia mo se fesoasoani i te ao mo te po? Me fakatuai la a ia o fesoasoani ki a latou?

⁸Au e fai atu ki a koutou, ka vave fakamasino ne ia olotou mea. E a, e maua ne au tela ko te Tama a te Tagata a te fakatuanaki i te lalolagi ma vau au?”

⁹Ne taku atu foki ne Iesu a te tala fakatusa tenei ki tino kola e leake eiloa me amiotonu latou, kae fakaseaoga nisi.

¹⁰“E tokolua tino ne olo ake ki te Fale Tapu o 'talo; a te tokotasi se Falesaio, ka ko te sua tino se tagata ao lafoga.

¹¹A te Falesaio ne tu ake i a ia eiloa kae 'talo atu penei:[21] ‘Te Atua, au e fakafetai atu ki a koe, i a au e se pela mo nisi tino fiafai mea, se fakamaoni, mulilua, e pela mo te tokoukega. Au e fakafetai i a au e se pau mo te tagata ao lafoga tela.

¹²Au e fakalikiliki fakalua i te vaiaso, e fai taulaga foki au ki te tasi vae sefulu o mea katoa e maua ne au.’

¹³Ka ko te tagata ao lafoga, ne tu pili mai, e se mafai o kilo ake ona mata ki te lagi, kae papa ki tena fatafata, ana muna: ‘Te Atua, a koe ke alofa mai ki a au te tagata agasala!’

¹⁴ Au e fai atu ki a koutou, ne fanaifo a te tagata tenei ki tena fale ko takuamiotonugina, kae se pena te sua tino; me so se tino e fakamaluga a ia ne ia eiloa, e fakamalalogina, ka ko te tino e fakamalalo a ia ne ia eiloa, ka fakamalugagina.”

¹⁵Ne avatu ne nisi tino ki a Iesu olotou tama'liki, ke fakaeke atu ona lima ki a latou. Ka ko te laveaga ne soko ne 'vao atu ki a latou.

¹⁶Ka ko Iesu ne kalaga atu ki tama'liki ke o'mai ki a ia kae fai atu penei, “Tuku tama'liki ke o'mai ki a au! Sa vaogina latou, i te mea e o tino penei a te Malo o te Atua.

¹⁷E tonu, au e fai atu ki a koutou, so se tino e se talia ne ia te Malo o te Atua e pela mo se tamaliki, e se sao eiloa a ia ki ei.”

¹⁸Ne fesili mai foki ki a ia se aliki pule, “Te Faiakoga 'lei, se a te mea e 'tau o fai ne au, ke maua ne au a te ola se gata mai?”

¹⁹Kae ne fai atu a Iesu ki a ia, “Ai a e taku mai ei ne koe au e 'lei? E seai se tino e 'lei, na ko te Atua eiloa.

²⁰ Ko iloa ne koe a tulafono: ‘Sa mulilua; sa tatino; sa kaisoa; sa patiloi; ava ki tou tamana mo tou matua.”’

²¹Kae ne tali mai a ia, “Ko oti ne tausi ne au a mea katoa kona mai taku folikiga.”

²²I te lagonaga ne Iesu, fai atu ei ki a ia, “E toe tasi te mea e 'tau o fai ne koe. Fakatau atu au mea katoa, kae avatu ki tino ma'tiva, kae ka maua ne koe te koloa i te lagi; ko vau ei koe o tautali mai i a au.”

²³I te lagonaga ne te tagata a te mea tena, ne lasi tena fanoanoa; i te mea e uke ana koloa.

²⁴Ne lavea ne Iesu me ko fanoanoa a ia, kae fai atu ki ei, “Ko oko eiloa i te faigata i tino maumea o ulu atu ki te Malo o te Atua!

²⁵Me faigata i te kamela o ulu i loto i te pu o te nila, kae sili atu i te faigata i te maukoloa o ulu atu ki te Malo o te Atua!”

²⁶Ko latou kola ne faka'logo ki ei ne fai mai, “Kafai la e pena, ko oi la te tino e mafai o ola?”

²⁷Kae ne fai atu a Iesu, “A mea kola e se mafai i tino, kae mafai i te Atua.”

²⁸Kae ne fai mai Petelu, “Kiloke, ko oti ne tuku ne matou omotou kaiga, kae tau'tali atu i a koe.”

²⁹Kae ne fai atu a ia ki a latou, “E tonu, au e fai atu ki a koutou, so se tino ko tuku ne ia tena kaiga, te avaga, taina, matua, mo tama'liki ona ko te Malo o te Atua,

³⁰ka maua ne ia a mea e uke i aso nei, ka maua foki ne ia te ola se gata mai i aso mai mua.”

³¹Ne ave ne Iesu a te tinoagafulu mo te tokolua, kae fai atu ki a latou, “Kiloke, tatou ka olo ki Ielusalema, ka fakaoko ei mea katoa kola ne tusi ne pelofeta e uiga ki te Tama a te Tagata.

³²Ka tuku atu a ia ki fenua fakaatea, ka fakatauemugina, ka fakamaseigina, ka puapuakigina foki ne latou,

³³e kini kae tamate foki ne latou; ka ko te tolu o aso ka toetu mai ei a ia.”

³⁴Kae seki lagona eiloa ne latou a mea kona; a te uiga o muna e se maina i a latou, e se iloa foki ne latou a mea ne faipati atu ei Iesu ki a latou.

³⁵Ko pili atu a ia ki Ieliko, kae nofo mai i te auala a te tagata kivi kae akai mea.

³⁶I te lagonaga ne ia te vaitino e sasale ake, fai atu ei, “Se a te mea tenei?”

³⁷Ne fai atu latou ki a ia, “Ko Iesu te Nasaleta tena e sasale ake.”

³⁸Ne pakalaga atu a ia, “Iesu te Tama a Tavita! Alofa mai ki a au!”

³⁹Ne 'vao atu ki ei tino kola ne muamua atu, kae fai atu ki ei ke sa ua; ka ko ia, ko na gasolo ake ei o kalaga, “Te Tama a Tavita, alofa mai ki a au!”

⁴⁰Ne tu Iesu, kae fakatonu atu ke aumai te tino kivi ki a ia. Ko pili mai a ia, kae fesili atu a Iesu ki ei:

⁴¹“Se a te mea e manako koe ki ei ke fai ne au mo koe?” Kae ne tali mai, “Te Aliki, au e manako ke 'pula oku mata.”

⁴²Tela, fai atu ei a Iesu, “Ke ile ou mata! Ko tou fakatuanaki ko 'lei ei koe.”

⁴³I te taimi eiloa tena, ko ile ona mata, kae tautali atu ki a ia, kae 'viki atu ki te Atua. I te laveaga ne tino a te mea tena, 'viki atu ei foki latou ki te Atua.