Read Te Tusi Tapu I Te Gana Tuvalu Lomiga Lua LUKA 19 Bible Online

LUKA 19 - Te Tusi Tapu I Te Gana Tuvalu Lomiga Lua bible

LUKA 19

¹Ne fanatu a Iesu ki Ieliko kae sasale i loto i te fa'kai.

²Kae e isi se tagata e igoa ki a Sakaio, tela ko te ao lafoga sili kae maukoloa.

³Ne fia lavea ne ia me ko oi Iesu, i a ia se tagata toetoe fua kae se mafai ne ia o lavea a Iesu ona ko te vaitino.

⁴Ne tele ei a ia i mua o te vaitino, kae kake ake i te lakau ko te sukamolo ke lavea ne ia a Iesu, tela e vau i tena auala.

⁵I te okoatuga a Iesu ki te koga tena, ne kilo ake a ia ki luga kae fai atu, “Sakaio vave ifo ki lalo, me e 'tau au o nofo i tou fale i te aso nei.”

⁶Ne fakavave ifo ki lalo Sakaio kae ne talia ne ia a Iesu mo te fiafia lasi.

⁷A tino katoa ne matea ne latou a te mea tena, ne kamata o mui'mui kae fai ake. “Kiloke ko fanatu a ia o fai mo malo i te fale o te tagata agasala.”

⁸Ne tu ake ki luga Sakaio kae fai atu ki te Aliki, “Te Aliki, kiloke! Ka tuku atu ne au a te afā o aku mea ki tino mativa; kafai foki ne ave ne au se mea a se tino i te auala fakaloiloi, ka taui atu ne au ki ei fakafa.”

⁹Ne fai atu a Iesu ki a ia, “Ko oko mai te fakaolataga ki te kaiga nei i te aso nei; a te tagata nei foki, se mokopuna o Apelaamo.

¹⁰ Me i a au te Tama a te Tagata, ne vau o 'sala kae fakaola a tino ko 'galo.”

¹¹ I te lagonaga ne latou a mea kona, ne toe faipati atu a Iesu ki a latou ki te tala fakatusa, me ko pilipili atu latou ki Ielusalema, me ne fai ake foki latou pela i te Malo o te Atua ka vave oko mai.

¹²Tela, fai atu ei a ia, “Ne fano te sua tagata sili ki se fenua 'mao atu ke fai a ia mo tupu, ko toe foki mai ei ki tena fenua.

¹³Ka koi tuai o fano, ne kalaga ki ana tavini e tinoagafulu, kae tuku atu ki a latou tupe aulo e sefulu, kae fai atu ki a latou, ‘Taumafai o fakagalue ne koutou ke oko ki te taimi e foki mai ei au.’

¹⁴Ka ko tino tonu o tena fenua ne ita ki a ia, uga atu ei ne latou ne avefekau o fai atu ki ei, ‘E se ma'nako matou ke fai te tagata nei mo tupu o matou.’

¹⁵“I tena fokimaiga, ko maua ne ia te 'malu fakatupu, ne fakatonu ne ia ana tavini kola ne tuku atu ki ei tupe, ke o'mai ki a ia, ko te mea ke iloa ne ia te mea ne maua mai i te fakagaluegaga o te tupe.

¹⁶Ne vau ki ona mua te tavini muamua kae fai mai, ‘Te aliki, ko maua ne au a tupe aulo e sefulu, i te fakagaluegaga o te tupe aulo e tasi tela ne tuku mai ne koe ki a au.’

¹⁷Ne fai atu a ia, ‘Ko oko eiloa i te 'lei, a koe se tavini 'lei! Ona ko tou fakamaoni i mea fo'liki, ka tuku atu ei ne au fa'kai e sefulu ke pule ne koe.’

¹⁸Ne vau te tokolua o tavini kae fai mai, ‘Te aliki, ko maua ne au a tupe aulo e lima i te fakagaluegaga o te tupe aulo e tasi tela ne tuku mai ne koe ki a au.’

¹⁹Ne fai atu a ia, ‘Ka pule ne koe fa'kai e lima.’

²⁰Ne vau ki a ia te sua tavini kae fai mai, ‘Te aliki, tenei tau tupe aulo; ne kofukofu kae ne tausi ne au i te solosolo;

²¹i te mea i a au ne mataku i a koe se tagata faigata; e ave ne koe a mea kola e se ne mea a koe, kae tau foki ne koe a fuaga o lakau e seki toki ne koe.’

²²Ne fai atu a ia, ‘A koe se tavini masei! Ko au muna eiloa ka fakasala ei ne au a koe! E iloa ne koe i a au se tagata faigata, e ave ne au a mea e se ne aku mea, kae tau foki ne au a fuaga o lakau e seki toki ne au.

²³Ai a ne seki tuku atu ei ne koe taku tupe ki te fale teutupe? E penei la e foki mai au, ko maua ne au te tupe tena fakatasi mo tena pasene.’

²⁴Ne fai atu ei a ia ki a latou kola ne tu mai i kona, ‘'Fao keatea te tupe aulo mai i a ia, kae avatu ki te tavini tela e i a ia te sefulu tupe aulo.’

²⁵Ne fai mai latou ki a ia, ‘Te aliki, e i a ia nei tupe aulo e sefulu.’

²⁶ ‘Au e fai atu ki a koutou, so se tino tela e isi ana mea, ka fakaopoopo atu ana mea ke uke, ka ko ia tela e seai ne ana mea, e tusa eiloa me mu'tana te mea e i a ia, kae ka ave eiloa keatea mai i a ia.

²⁷Tenei la, ko oku fili kola ne seki manako ke fai au mo tupu o latou; aumai latou ki konei ke tamate i oku mua!’ ”

²⁸I te otiga ne faipati a Iesu ki te mea tenei, ne mua atu ei a ia i a latou ki Ielusalema.

²⁹I tena piliatuga ki Petefake mo Petania, i te mauga o Olive, ne uga atu ne ia ona soko e tokolua ke mua atu,

³⁰kae fai atu, “Olo ki te fa'kai tena i mua atu o koulua; ka ulu koulua ki loto, e maua ne koulua se tama asini e tukau, e seki sopo eiloa i ei se tino. 'Tala kae aumai ki konei.

³¹Kafai e fesili atu se tino ki a koulua, ‘Ai a e 'tala ei ne koulua?’ Fai ki ei, ‘E manako ki ei te Aliki.’ ”[22]

³²Ne olo atu a laua kae ne maua katoa mea kola ne taku atu ne Iesu.

³³Ka koi 'tala ne laua te tama asini, kae fai mai tino kola e a latou te manu, “Ai a e 'tala ei ne koulua?”

³⁴Ne tali atu laua, “E manako ki ei te Aliki.”

³⁵Ne aumai ne laua ki a Iesu; kae ne 'fola olotou gatu ki te tua o te manu, kae fakasopo ne latou a Iesu ki luga.

³⁶I tena fanoga i luga i te asini, ne 'fola olotou gatu i luga o te alatu.

³⁷I te piliatuga ki Ielusalema ki te koga tela e masifo ei te auala ki lalo i te mauga o Olive, e tokouke ona soko ne kamata o fakafetai kae 'viki atu ki te Atua i te leo lasi, ona ko galuega 'lasi fakaofoofogina ne lavea ne latou,

³⁸ kae fai mai, “Ke manuia te Tupu tela e vau i te igoa o te Aliki! Ko te filemu i te lagi mo te vikiga i mea tautafa ki luga!”

³⁹Ne fai mai nisi o Falesaio mai loto i te vaitino ki a Iesu penei. “Te Faiakoga, 'liko atu ki ou soko.”

⁴⁰Ne tali atu a ia, “Au e fai atu ki a koutou, kafai e se kalaga latou, ko fatu ka ka'laga.”

⁴¹I tena piliatuga ki Ielusalema, ne lavea ne ia te fa'kai, tagi ei a ia penei,

⁴²“Moi iloa ne koe i te aso nei a mea e manakogina ne koe mō tou manuia i aso mai mua, kae nei ko se mafai o matea ne koe.

⁴³Me ka oko mai eiloa ki a koe aso e ati ake ei te olo e nikoi ei koe ne ou fili, e alai foki eiloa koe ne latou, ko tolo mai ei koe ki loto i feitu katoa.

⁴⁴Ka tukipalapala ne latou koe, pela foki mo tino kola i loto i ou 'pui. E seai eiloa se fuafatu e tasi ka 'toe i te koga ne iai, me ne se iloa ne koe a te aso ne oko mai ei te Atua o fakaola koe!”

⁴⁵Ne ulu atu a Iesu ki loto i te Fale Tapu, kae ne afuli ne ia ki tua tino fakatau koloa,

⁴⁶ ne fai atu a ia ki a latou, “Ko oti ne tusi i toku fale se fale 'talo. Kae tenei ko fuli ne koutou mo fai te ana o tino kai'soa!”

⁴⁷ Ne akoako atu a Iesu i te Fale Tapu i aso takitasi. Ka ko faitaulaga sili, mo faiakoga o te Tulafono, mo takitaki o te fenua, ne manako o tamate a ia,

⁴⁸kae se mafai ne latou o maua se ala e fai ei, me i tino katoa ko fia fakalogo'logo ki a ia.