Read Te Tusi Tapu I Te Gana Tuvalu Lomiga Lua LUKA 2 Bible Online

LUKA 2 - Te Tusi Tapu I Te Gana Tuvalu Lomiga Lua bible

LUKA 2

¹Ko aso tonu eiloa kona ne avatu ei te fakatonuga a te tupu ko Kaisala Aokuso, ki tino katoa ke tusi olotou igoa.

²I te taimi o te tusiga igoa, ko Kulenio te kovana o Sulia.

³Ne olo a tino katoa o tusi olotou igoa i fa'kai o olotou tupuga.

⁴A Iosefa ne vau mai Nasaleta i Kalilaia ki Iutaia, ki te fa'kai e igoa ki a Petelema, tela ne fanau ei te tupu ko Tavita. Ne fano ki kona Iosefa me i a ia se tino ne tupu mai i te gafa o Tavita,

⁵ko te mea ke tusi fakatasi o la igoa mo Malia, tela ne fai feagaiga laua ke fai te la avaga, me i a Malia ko faitama.

⁶I te la 'nofoga i Petelema, ko oko nei ki te taimi tonu ka fanau ei a ia.

⁷Ne fanau mai ne ia tena tama matua, kae ne fakapulupulu ki laugatu kae fakamoe i te tali fagai manu, me ko seai se koga mo latou i te fale talimalo.

⁸E isi ne tausi mamoe ne 'nofo i te koga vao tena i te po, e tausi olotou mamoe.

⁹Ne fakasae mai te agelu a te Aliki ki a latou, kae ne maina atu te 'malu o te Aliki ki luga i a latou. Ko oko eiloa latou i te ma'taku.

¹⁰Kae ne fai atu te agelu ki a latou, “Sa ma'taku, kiloke, ko aumai ne au te tala 'lei mo koutou, ka fakafiafia ei tino katoa!

¹¹I te po eiloa tenei i te fa'kai o Tavita, ko fanau ei te otou fakaola ko Keliso te Aliki!

¹²Tenei te fakailoga e fakamaoni ei a te mea nei ki a koutou: Ka maua atu ne koutou se tamaliki e fakapulupulu ki laugatu e moe i te tali fagai manu!”

¹³I kona foki eiloa, ne lavea atu ne latou te kau o te lagi e 'tu fakatasi mo te agelu, kae 'viki ki te Atua penei:

¹⁴“Ko te vikiga o te Atua i koga tafasili i te maluga. Ke i te lalolagi te filemu, mō tino katoa kola e fiafia ki ei te Atua!”

¹⁵Ne olo keatea agelu mai i a latou, ko 'foki atu ki te lagi, kae ne faipati ake te sua tino ki te sua tino, “Tou olo ki Petelema o kilo ki te mea tenei ko oti ne tupu, tela ne fakailoa mai ne te Aliki.”

¹⁶Ne olo fakavave latou kae ne maua atu ne latou a Malia mo Iosefa, kae ne lavea foki ne latou a te tamaliki e takato i te tali fagai manu.

¹⁷I te laveaga ne tausi mamoe te tamaliki, ne tala atu ne latou ki a laua fakamatalaga a te agelu e uiga mo te tamaliki tenei.

¹⁸Ka ko tino katoa kola ne 'logo i te tala tenei, ne ofo latou i mea katoa ne tala atu ne tausi mamoe.

¹⁹Ne masaua katoa ne Malia a mea konei, kae ne mafaufau malosi ki ei.

²⁰Ne 'foki atu tausi mamoe, ne 'viki kae fakafetai ki te Atua mo mea katoa ne lagona kae lavea ne latou; me ko mea tonu eiloa kona ne fai atu ei te agelu ki a latou.

²¹ I te valu o aso, ko te taimi tena ko 'tau ei o pilitome te tamaliki, ne fakaigoa ki a Iesu, te igoa ne taku mai ne te agelu, ka koi tuai o fakafua i te tinae o tena matua.

²² Ko oko ki te taimi ko 'tau ei Iosefa mo Malia o fai te mea tela e fakatonu mai ne te Tulafono a Mose, ke fai te faka'maga, tela ne 'kave ei ne laua te tamaliki ki Ielusalema o tuku atu ki te Aliki.

²³Tenei te mea e tusi i te tulafono a te Aliki: “A toekimua tagata katoa, ke fakatapu latou mo te Aliki.”

²⁴Ne olo foki laua o avatu te taulaga, e pela mo te mea e fakatonu mai ne te tulafono a te Aliki, “Ke avatu se ava lupe io me se ava punua lupe.”

²⁵E isi se tagata ne nofo i Ielusalema, a tena igoa ko Simeona. Se tagata e 'lei kae mataku ki te Atua, kae ne nofo eiloa o fakatalitali mo te fakaolaga o Isalaelu. Ne nofo i a ia te Agaga Tapu.

²⁶Ne fakaasi tonu ne te Agaga Tapu ki a ia, me ka lavea ne ia te Keliso a te Aliki ka koi tuai o mate.

²⁷Ne takitaki Simeona ne te Agaga Tapu ki loto i te Fale Tapu. I te taimi ne aumai ei te tamaliki ko Iesu ne ona matua ki loto i te Fale Tapu, o fai fakailoga e pela mo te mea ne fakatonu mai ne te Tulafono,

²⁸ne apai ake ne Simeona te tamaliki i ona lima, kae ne fakafetai ki te Atua penei:

²⁹“Te Aliki, ko oti ne tausi ne koe tau feagaiga, Kae ke tuku atu tau tavini ke fanatu mo te filemu.

³⁰Me ko oti ne lavea tonu ne oku mata tau fakaolataga.

³¹Tela ko oti ne fakatoka ne koe i mata o tino katoa:

³²Ko te mainaga e fakasino ne ia te alatu ki tino o fenua fakaatea. Mo te 'malu o tou fenua ko Isalaelu.”

³³Ne ofo ona matua i mea kola ne faipati ki ei Simeona e uiga ki a ia.

³⁴Ne fakamanuia atu Simeona ki a laua kae faipati penei ki a Malia tena matua: “Kiloke, ne filifilia ne te Atua te tamaliki tenei, mō te fakamalepega mo te toe fakaolaga o te tokoukega o Isalaelu; ka fai foki a ia mo fakailoga mai te Atua tela ka takalia'lia ki ei te tokoukega o tino.

³⁵Ka fakaasi foki ne ia olotou mafaufauga 'funa. A te fanoanoa ko fakatusa ki se pelu mata 'kai, tela ka fakamalepe ne ia tou loto.”

³⁶E isi se pelofeta fafine e igoa ki a Ana, ko te tamaliki a Fanuelu, kae tupu mai i te matakaiga o Asela. Ko lomatua, kae fitu tausaga ne ola fakatasi ei laua mo tena avaga. Kae ne nofo taka a ia i tausaga e valu sefulu fa.[2] E seki tiaki eiloa ne ia te Fale Tapu i te taeao mo te afiafi, o tapuaki ki te Atua i te fakalikiliki mo te fai tinoga.

³⁷

³⁸I te itula tonu eiloa tena, ne oko mai ei a ia o siki tena fakafetai ki te Atua, kae ne faipati e uiga mo te tamaliki, ki a latou katoa kola ne fakatalitali ki te fakasaolotoga o Ielusalema.

³⁹ I te palelega ne fai ne laua faifaiga kola e manakogina ne te tulafono a te Aliki, ne toe 'foki ki Kalilaia, ki te la fa'kai tonu ko Nasaleta.

⁴⁰Ne tupu ake te tamaliki i te foitino malielie mo te poto, me i te alofa o te Atua ko mautakitaki i a ia.

⁴¹I tausaga takitasi, e masani o olo sale matua o Iesu ki Ielusalema ki te Paseka.

⁴²I te katoaga o te sefulu lua ona tausaga, ne olo latou ki te Paseka i Ielusalema, e pela eiloa mo te masani.

⁴³I te otiga o te Paseka, ne 'foki atu latou ki te lotou fa'kai, ka ko Iesu ne nofo i Ielusalema. Kae ne se iloa ne ona matua;

⁴⁴ne manatu laua me kati la e 'numi fakatasi mo te kau malaga a latou, ka ko tusa mo te aso e tasi ne faimalaga ei latou, ne kamata ei o salasala ne laua ki o la kaiga mo taugasoa.

⁴⁵Ne seki maua, toe 'foki atu ei ki Ielusalema o salasala a ia.

⁴⁶I te tolu o aso, ne maua ei ne laua a ia i loto i te Fale Tapu, e saga'saga mo faiakoga Iutaia, e fakalogologo kae fai fesili atu ki a latou.

⁴⁷A latou katoa kola ne fakalogo'logo ki a ia, ne ofo i tena poto o tali fesili.

⁴⁸A ona matua ne ofo i te laveaga ne laua, kae ne fai atu tena matua ki a ia, “Taku tama, ai a ne fai ei ne koe te mea tenei ki a maua? A maua mo tou tamana ne salasala ki a koe mo te manavase.”

⁴⁹Ne tali atu a Iesu ki a laua, “Ai a e salasala mai ei koulua ki a au? E se iloa ne koulua me ko 'tau au o nofo i loto i te fale o toku Tamana?”

⁵⁰Kae ne seki atafia ne laua te mea ne fai atu ei a ia ki a laua.

⁵¹'Foki ei latou mo Iesu ki Nasaleta, kae ne fakalogo ki a laua. Ne taofi mau ne tena matua a mea katoa konei i tena loto.

⁵² Ne tupu ake Iesu i te foitino mo te poto, kae ne alofagina ne te Atua mo tino.