Read Te Tusi Tapu I Te Gana Tuvalu Lomiga Lua LUKA 20 Bible Online

LUKA 20 - Te Tusi Tapu I Te Gana Tuvalu Lomiga Lua bible

LUKA 20

¹I te aso e tasi, ka koi nofo Iesu i te Fale Tapu, e akoako atu kae folafola atu a te Tala 'Lei ki tino, ne o'mai ki a ia faitaulaga sili mo faiakoga o te Tulafono, fakatasi mo toeaina,

²kae fai mai ki a ia, “Fai mai ki a matou me se a te pule e fai ei ne koe a mea konei? Ko oi ne avatu ne ia ki a koe a te pule tena?”

³Ne tali atu a ia, “E fesili atu foki ne au se fesili: taku mai ki a au,

⁴a te papatisoga a Ioane ne aumai mai te lagi io me mai tino?”

⁵Ne fakatau mafaufau kae fai'pati latou i a latou eiloa penei: “Kafai e fai atu tatou, ‘Mai te lagi,’ ka fai mai a ia, ‘Ai a la e se talitonu ei koutou ki a ia?’

⁶Kafai foki e fai atu tatou, ‘Mai tino,’ ka peipei tatou ki fuafatu ne tino katoa; me ko talitonu latou i a Ioane se pelofeta.”

⁷Tela la, ne tali mai latou me se iloa ne latou me maifea.

⁸Ne fai atu a Iesu ki a latou, “E se taku atu foki ne au, me se a te pule e fai ei ne au a mea konei.”

⁹ Ne taku atu ne Iesu ki tino a te tala fakatusa tenei: “Ne toki ne te tagata te togavine, kae ne tuku atu ki tino ga'lue, kae fano a ia ki se isi fenua mo se taimi tai leva atu.

¹⁰Ko oko ki te taimi o te taukai vine, uga ei ne ia se tavini ki tino galue, ke maua mai ei ne fuagavine; kae ne kini a ia ne tino ga'lue, kae tuli keatea e aunoa mo se mea.

¹¹Ne toe uga atu foki ne ia te sua tavini, ne kini foki kae ta fakamasei ne latou, toe afuli foki keatea e aunoa mo se mea.

¹²Ne toe uga atu foki ne ia te tokotolu o tavini, ne ta foki kae afuli keatea ne latou.

¹³Ne fai ake ei a te tino tela e o ia te togavine, ‘Se a te mea ka fai ne au? Ka uga atu ne au taku tama tagata fagasele; kati la ka āva latou ki a ia.’

¹⁴Ka ko te laveaga ne tino galue a ia, ne fai ake latou pela, ‘Tenei te tama tagata a te tino e o ia te togavine; ke tamate ne tatou, ko te mea ke fai ma tatou te togavine.’

¹⁵Ne afuli ne latou a ia keatea mo te togavine kae tamate. “Se a nei la te mea ka fai ne te tino e o ia te togavine ki a latou?

¹⁶Ka vau a ia o tamate a tino galue kona, kae tuku atu te togavine ki nisi tino.” Ne lagona ne tino kola ne fakalogo'logo ki ana pati, kae fai mai, “Sa fai pena.”

¹⁷ Ne kilokilo atu a Iesu ki a latou kae fesili atu, “Se a te uiga o te muna tenei ko tusi mai? ‘Ko te fatu ne tiakina ne tufuga fai fale, Ko fai nei mo fatu sili i te taua.’

¹⁸So se tino e siga ki luga o te fatu tena, ka fatifati a ia; kafai foki e to te fatu tena ki luga i se tino, ka malukuluku eiloa a ia.”

¹⁹Ne taumafai faiakoga o te Tulafono mo faitaulaga sili o puke a Iesu i te taimi tena, me ne iloa ne latou, ne taku atu ne ia te tala fakatusa tena e fakasino ki a latou; kae ne ma'taku latou i te vaitino.

²⁰Tela la, ne kilo'kilo ei latou mo se taimi nofoga malie, ke uga atu ne latou ne tino alamati, kola e leake eiloa tino me amiotonu, ke fakalogo'logo faka'lei ki ana muna, ko tuku atu ei ne latou a ia ki te pule a te kovana.

²¹Ne fesili mai latou ki a ia, “Te Faiakoga, ko iloa ne matou i a koe e faipati kae akoako mai ki a matou mo te tonu, e se fakailoga ne koe se tagata, kae akoako mai foki ne koe a te ala o te Atua.

²²Se mea 'tau i a matou o avatu lafoga ki a Kaisala, me ikai?”

²³Ka ko iloa 'lei ne Iesu te togafiti a latou kae fai atu,

²⁴“Fakaasi mai ki a au se tupe siliva. E oi te ata tena e tusi i ei?” Ne fai mai latou, “E o Kaisala.”

²⁵Ne fai atu a ia ki a latou, “E 'tau mo koutou o fai te otou tiute ki te Malo, pela foki mo otou tiute ki te Atua.”

²⁶Ko se mafai ne latou o puke a ia i kona i mua o tino, ona ko ana muna; kae ne ofo latou ki tena tali, 'nofo 'mu ei latou.

²⁷ Ne o'mai nisi o Satukaio ki a Iesu ko latou kola e fai mai me seai se toetu mai te mate.

²⁸ Ne fai mai latou ki a ia penei, “Te Faiakoga, ne tusi mai ne Mose a te tulafono tenei mo matou: ‘Kafai se tagata ko mate tena taina, kae ola tena avaga kae se afu, e 'tau i te tagata tena o avaga ki te fafine tena, ke tupu ei se gafa o tena taina.’

²⁹E isi se tautaina e tokofitu; ne avaga te toekimua, kae ne mate se afu.

³⁰Avaga ei te tokolua ki te fafine,

³¹pena foki te tokotolu; ne pena katoa eiloa te tokofitu, ne 'mate kae se afu.

³²Ka ko te fafine, ne mate fakamuli ifo.

³³Tela la, i te taimi e toe'tu mai ei tino 'mate, ko oi ka avaga mo ia? I te mea ne a'vaga katoa ki ei te tokofitu!”

³⁴Ne fai atu a Iesu ki a latou, “A tagata mo fafine o te olaga nei e a'vaga,

³⁵ka ko tagata mo fafine kola e aoga ki ei te toetu mai te mate, kae ola i te ola se gata mai, e se a'vaga.

³⁶E pela latou mo agelu e se mafai o 'mate. A latou ko tama a te Atua, me ko oti ne toe fakatu ake latou mai te mate.

³⁷ Ko fakamaonia foki ne Mose i tino 'mate ka toe faka'tu ake i te ola. I te tala tela i te lakau ne ka, ne faipati ei Mose, i te Aliki, ‘Ko te Atua o Apelaamo, ko te Atua o Isaako, ko te Atua foki o Iakopo.’

³⁸E se se Atua o tino 'mate, kae o tino ola; me i tino katoa e ola mo ia.”

³⁹Kae ne tali mai nisi o faiakoga o te Tulafono, “Te Faiakoga, ko oko eiloa i te 'lei au muna.”

⁴⁰I te mea ko se toe fakamalosi latou o fai mai nisi fesili ki a ia.

⁴¹Ne fai atu a Iesu ki a latou, “E mafai pefea o fai mai tino i te Keliso ko te tama a Tavita?

⁴² Me ne fai mai eiloa Tavita i te tusi o Salamo: ‘Ne fai mai te Aliki ki toku Aliki, Nofo i toku feitu fakaatamai ko toku feitu taua,

⁴³Ke oko ki te taimi e fai ei ne au ou fili mo mea e tuku ei ou vae.’

⁴⁴Ne taku mai pena ne Tavita i a ia ko tena Aliki; e mafai la pefea o fai te Keliso mo tama a Tavita?”

⁴⁵Ne faipati atu a Iesu ki ona soko, ka koi fakalogo'logo mai ki a ia tino katoa:

⁴⁶“A koutou eiloa i faiakoga o te Tulafono kola e fia olo sale mo olotou gatu 'loa, kae ma'nako ke fakaaloalogina latou i malae, e fia 'nofo foki i nofoga sili i fale tapuaki mo koga sili i 'kaiga;

⁴⁷ko latou foki kola e oti sale ei a mea i fale o fafine ko 'mate olotou avaga, kae fia iloa latou i faiga o 'talo 'loa. A te lotou fakasalaga, ka sili atu eiloa i te masei!”