Read Te Tusi Tapu I Te Gana Tuvalu Lomiga Lua LUKA 21 Bible Online

LUKA 21 - Te Tusi Tapu I Te Gana Tuvalu Lomiga Lua bible

LUKA 21

¹Ne kilokilo sale a Iesu, lavea ei ne ia a tino maumea ko lafo olotou taulaga ki loto i te koga e teu ei a tupe,

²kae ne lavea atu foki ne ia te fafine mativa e tokotasi ko mate tena avaga, ko lafo ki ei a tupe foliki e lua.

³Ne fai atu a ia: “E tonu, au e fai atu ki a koutou, ko mea a te fafine mativa tenei ko mate tena avaga ne lafo ki ei, ko sili atu eiloa i a latou katoa;

⁴me ne lafo atu olotou taulaga mai olotou koloa e uke, ka ko te fafine tenei, ne lafo atu katoa ana koloa e ola ei a ia.”

⁵Ka ko nisi tino ko faipati e uiga ki te Fale Tapu, ki ona fakagaligaliga ki fatu 'gali mo taulaga ki te Atua. Kae ne fai atu a Iesu,

⁶“Ko mea kona ko 'kilo koutou ki ei, ka oko mai aso e se toe iai se fatu e tasi i luga o te sua fatu, ka palele o matofa ki lalo.”

⁷Ne fesili mai latou ki a ia pela, “Te Faiakoga, e oko la mafea a mea kona? Kae se a te fakailoga manafai ko pili o oko mai a mea kona?”

⁸Kae ne tali atu a ia, “A koutou la, mo a ma faka'segina, me e tokouke ka o'mai i toku igoa, e takitokotasi o fai ake pela, ‘Ko au ko ia!’ ‘Ko oko mai aso!’ Sa tautali atu i a latou.

⁹Kafai ko 'logo koutou i tala o taua mo fakasauaga, sa manavase koutou, me 'tau eiloa o 'tupu muamua mea kona, kae se ko te gatamaiga tena.”

¹⁰Ne fai atu a ia ki a latou, “Ka faitaua te sua fenua ki te sua fenua, pela foki te sua malo ki te sua malo;

¹¹kae ka oko mai a mafuie fakamataku, mo oge, mo masaki i koga katoa, ka isi foki ne mea fakamataku mo fakailoga 'lasi mai te lagi.

¹²“Ka koi tuai o oko mai a mea kona, ka puke fakapagota koutou kae fakasauagina koutou; ka avatu foki koutou o fakamasino i fale tapuaki, kae pei ki fale puipui, ka aumai foki ki mua o tupu mo aliki ona ko toku igoa.

¹³Tena eiloa te taimi tonu e folafola atu ei te Tala 'Lei;

¹⁴tela la, mafaufau 'lei koutou, mo a mana fakatoka ne otou fakasako, e 'sao ei koutou;

¹⁵i te mea ka avatu ne au ki a koutou a muna mo te poto, e se mafai ei ne otou fili o 'teke mai io me taku'se koutou.

¹⁶Ka tuku atu koutou ne otou matua, mo otou taina, mo otou kaiga, mo otou taugasoa foki; ka tamate foki a nisi o koutou ne latou.

¹⁷Ka takalialia foki a tino katoa ki a koutou ona ko koutou e talitonu ki toku igoa.

¹⁸Kae ka seai eiloa se laulu e tasi mai otou ulu e galo.

¹⁹Ko te otou kufaki e ola ei koutou.”

²⁰“Kafai ko lavea ne koutou a Ielusalema ko nikoi ne kautau, ko iloa ei ne koutou me ko pili tena fakamaofaga.

²¹Ka ko latou kola e 'nofo i Iutaia, e 'tau o 'tele ki mauga; ka ko latou kola e 'nofo i loto i Ielusalema, e 'tau o olo keatea; ka ko latou kola e 'nofo i te vao, e se 'tau o olo atu ki te fa'kai.

²²Me ko aso nei, ‘Ko aso o te Fakasalaga,’ ko te mea ke fakataunu ei a mea katoa ko oti ne tusi i te Tusi.

²³Kalofa eiloa i fafine faitama i aso kona, mo matua foki kola e isi olotou pepe! Ka oko mai mea faigata ki luga i te fenua nei, mo te fakasalaga a te Atua ki tino konei.

²⁴Ka 'mate latou i te pelu, kae ka takitaki fakapagota latou ki fenua katoa, ka lakalaka Ielusalema ne fenua fakaatea, ke oko ki te taimi e fakataunu ei aso o fenua fakaatea.”

²⁵ “Ka isi ne fakailoga i te la, te masina mo fetu, ka fakaalofa fenua katoa o te lalolagi i te manavase, ona ko te 'gulu o te tai mo galu;

²⁶ka 'mate foki tino i te mataku mo te fakatalitali ki mea ka oko mai ki te lalolagi: i te mea ka galulu a mea malosi i te lagi.

²⁷ Ko lavea atu i ei ne latou au ko te Tama a te Tagata, e vau i kaumana i te mana mo te 'malu.

²⁸Kafai ko kamata o oko mai a mea konei, tu kae 'kilo ki luga, me ko pili mai te otou fakaolataga.”

²⁹Ne fai atu ne Iesu ki a latou a te tala fakatusa tenei, “Mafaufau ake koutou ki te mati mo lakau katoa.

³⁰Kafai ko kamata o 'somo ake ona lau, ko iloa ei ne koutou, me ko pili mai aso 'vela o te tausaga.

³¹Ke pena foki koutou, kafai ko lavea ne koutou a mea konei ko oko mai, ko iloa ei ne koutou me ko pili mai te Malo o te Atua.

³²“E tonu, au e fai atu ki a koutou, me se mavae atu te kautama tenei, seiloga ko oti ne oko mai a mea konei.

³³E oti atu te lagi mo te lalolagi, ka ko aku muna e se mafai o oti.”

³⁴“Fakaeteete koutou! Ke mo a ma to fai 'kaiga kae ko'na sale, io me manavase ki mea o te olaga nei, i te mea manafai e fakapoi mai te aso tena ki a koutou.

³⁵Me ka vau pela mo se malei ki tino katoa e 'nofo i te lalolagi.

³⁶Tela la, a koutou ke matapula'pula kae 'talo sale, ko te mea ke maua ne koutou te malosi e 'sao mai ei koutou i mea faigata katoa ka oko mai, kae 'tu atu ei foki koutou i mua o te Tama a te Tagata.”

³⁷ Ne akoako atu a Iesu i te Fale Tapu i ao, ka ko te po ko fano a ia o fakamalolo i te Mauga o Olive.

³⁸A tino katoa ne gasolo ki te Fale Tapu i te tafataeao o fakalogologo ki a ia.