Read Te Tusi Tapu I Te Gana Tuvalu Lomiga Lua LUKA 22 Bible Online

LUKA 22 - Te Tusi Tapu I Te Gana Tuvalu Lomiga Lua bible

LUKA 22

¹ Ko pili ki te 'Kaiga o Falaoa e se Faka'fete e fakaigoa ki te Paseka.

²Kae ne salasala ne faitaulaga sili mo faiakoga o te Tulafono, ne auala e tamate ei ne latou a Iesu; me ko ma'taku latou i te fenua.

³Ne ulu atu a Satani ki a Iuta tela e igoa ki te Sekala, ko ia se tokotasi o te tinoagafulu mo te tokolua.

⁴Ne fanatu a Iuta o fai'pati mo te faitaulaga sili mo takitaki o tino tausi o te Fale Tapu, ki se togafiti e puke ei ne latou a Iesu.

⁵Ne fia'fia latou ki ei, kae ofo atu o 'togi ki a ia tupe.

⁶Ne lotomalie ki ei Iuta, tela alamati ei a ia ki se taimi e faigofie o fakalata ne ia a Iesu ki a latou, kae ke se iloa ne tino.

⁷Ko oko mai te aso o te 'Kaiga o Falaoa e se Faka'fete, tela e tamate ei te tama mamoe o te Paseka mo fai te taulaga.

⁸Ne uga atu ne ia Petelu mo Ioane, kae fai atu, “Olo o fakatoka te Paseka mo tatou, ke 'kai ei tatou.”

⁹Ne fesili mai laua ki a ia, “Tefea te koga e manako koe ki ei, ke fakatoka ne maua?”

¹⁰Muna a Iesu: “Kiloke! Ka oko atu koulua ki te fa'kai, ka fetaui koutou mo te tagata e amo ne ia te fagukele vai. Tau'tali i a ia ki te fale e ulu ki ei,

¹¹ko fai atu ei koulua ki te tino e o ia te fale, ‘Muna a te Faiakoga ki a koe, tefea te potu e tali ei malo, ke 'kai ei matou i te Paseka mo oku soko?’

¹²Ka fakasino atu ei ne ia ki a koulua te potu lasi i luga, ko oti ne teu, ko fakatoka ei ne koulua.”

¹³Ne olo atu laua, maua a mea katoa kola ne taku atu ne Iesu, fakatoka ei ne laua a te 'kaiga o te Paseka.

¹⁴I te okoga ki te taimi o te 'kaiga, ne nofo Iesu i tena nofoga i te taipola, fakatasi mo apositolo.

¹⁵Ne fai atu a ia ki a latou, “Ne manako malosi au o kai i te Paseka fakatasi mo koutou, ka koi tuai au o logo'mae!

¹⁶Me i a au e fai atu ki a koutou, ka se toe kai au ki ei, ke oko ki te fakakatoatoaga i te Malo o te Atua.”

¹⁷Ne puke a ia ki te ipu, ko fakafetai, kae fai atu, “Puke ki te ipu tenei; kae fakasolo i a koutou,

¹⁸me i a au e fai tonu atu ki a koutou, Ka se toe inu eiloa au ki te sua o te vine, ke oko eiloa ki te oko mai o te Malo o te Atua.”

¹⁹Ne puke a ia ki te falaoa, ko fakafetai, ko tofitofi, kae avatu ki a latou, ana muna, “Ko toku foitino tenei, ko tuku atu mo koutou; ke fai mo fakamanatuga ki a au.”

²⁰ Ne pena foki o puke ki te ipu i te otiga ne 'kai, ko fai atu penei, “Ko te ipu tenei o te feagaiga fou i toku toto, ko fakamaligi mo koutou.[23]

²¹ “Kae kiloke! A te tino tela e fakalata ne ia au, tenei e 'kai fakatasi maua.

²²Me mate eiloa au te Tama a te Tagata, e pela eiloa mo te loto o te Atua: kae kalofa eiloa i a ia tela e fakalata ne ia au.”

²³Ne fakatau fesilisili ei latou i a latou eiloa, me ko oi te tino o latou ka fai ne ia a te mea tenei.

²⁴ Ne fakataufinau foki latou me ko oi te tino o latou e sili.

²⁵ Ne fai atu a ia ki a latou, “A tupu o te lalolagi nei e isi ne olotou malosi o pule ki olotou tino; ka ko pule foki kona e fakaigoa ko ‘Taugasoa o Tino.’

²⁶ Kae ke se pena koutou, ko te tino tela e sili i a koutou, ke fai a ia pela mo se tino tafa foliki, ko te tino tela e pule, ke fai a ia pela mo se tavini.

²⁷ Ko oi la e sili? Ko ia tela e kai, io me ko ia tela e laulau meakai? Ko ia tela e kai. Ka ko au nei, e i a koutou e pela mo se tavini.

²⁸“Ne kau fakatasi foki koutou mo au i oku tofotofoga.

²⁹E pela eiloa mo te tukumaiga ne toku Tamana te pule ki a au, e pela foki taku feagaiga ki a koutou.

³⁰ Ka 'kai kae inu koutou i taku taipola i toku Malo, kae ka 'nofo foki koutou i nofoaga-aliki, o fakamasino atu matakaiga e sefulu lua o Isalaelu.”

³¹“Simona, Simona, kiloke; a Satani ko manako ke lu ne ia a koutou e pela mo saito.

³²Kae ne 'talo au mō koe, ko te mea ke se gata tou fakatuanaki, kae kafai ko toe mafuli mai koe, ke fakamalosi la ne koe ou taina.”

³³Ne tali mai a Petelu, “Te Aliki, au ko toka ke olo tāua ki te falepuipui mo te mate!”

³⁴Muna a Iesu, “Au e fai atu ki a koe e Petelu, ka koi tuai o tagi te moa i te po tenei, ka ko fakafiti fakatolu mai koe me se iloa ne koe au.”

³⁵ Ne fai atu a ia ki a latou, “I te taimi ne uga atu ei ne au koutou ke olo mo te seai ne pausi tupe, taga, io me ne taka, ne ma'tiva la koutou i se mea?” Olotou muna, “Ikai, e 'lei faeloa.”

³⁶Ne fai atu a ia ki a latou, “Nei, so se tino e isi sena pausi tupe, io me se taga, e 'tau o ave sale ne ia, so se tino foki e seai sena pelu, e 'tau o fakatau atu tena gatu ke 'togi ei sena pelu.

³⁷ Me i a au e fai atu ki a koutou, e 'tau o 'tu ki a au a muna konei o te Tusi, ‘Ne faitaugina foki fakatasi mo pagota, ’me ko taunu katoa a mea ne tusi ki a au.”

³⁸Ne fai atu ona soko, “Te Aliki, kiloke, konei a pelu e lua.” Kae tali atu a ia, “Ko lava!”[24]

³⁹I tena vauga ki tua, fanatu ei a ia ki te mauga o Olive e pela mo tena masani; tau'tali atu ei ona soko i a ia.

⁴⁰Ko oko atu a ia ki te koga tena, fai atu a ia ki a latou, “A koutou ke 'talo i te mea ma oko mai te fakaosoosoga ki a koutou.”

⁴¹Ne fano a ia keatea mai i a latou, e pela mo te 'mao o te fatu ma pei, kae totuli ifo kae 'talo,

⁴²ana muna, “Toku Tamana, kafai e loto koe ki ei, ave keatea te ipu tenei mai i a au, kae ke se fai la toku loto, ka ko tou loto.”

⁴³Ne fakaasi mai a te agelu mai te lagi o fakamalosi ki a ia.

⁴⁴I tena fi'ta malosi ko na gasolo atu ei a ia o 'talo; ka ko tena tauta e pela mo te motimotiga toto, e salisali ifo ki te laukele.)[25]

⁴⁵I te otiga ne 'talo, tu ake ki luga kae foki atu ki ona soko, maua atu ei latou e 'moe, me ko oko eiloa i te lotou fanoa'noa.

⁴⁶Ne fai atu a ia ki a latou, “Se a te mea e 'moe ei koutou? Ala mai o 'talo, i te mea ma oko mai te fakaosoosoga ki a koutou.”

⁴⁷Ka koi faipati atu a ia; kae oko mai te vaitino, e 'taki mai ne Iuta, ko te tokotasi o te tinogafulu mo te tokolua, kae ne vau ki a Iesu, ke sogi ne ia.

⁴⁸Kae ne fai atu a Iesu ki a ia, “Iuta, e fakalata ne koe au te Tama a te Tagata ki te sogi?”

⁴⁹I te laveaga ne latou kola ne fakatasi mo Iesu a te mea ka tupu, fai atu ei latou ki a ia, “Te Aliki, e a, ka fakaaoga ne matou a pelu?”

⁵⁰Ka ko te sua tino o latou, ne kati ne ia te taliga o te tavini a te faitaulaga sili, to ei keatea te taliga fakaatamai.

⁵¹Muna a Iesu, “Ko lava!” Puke ei a ia ki te taliga o te tagata tena o faka'piki.

⁵²Ne faipati atu a Iesu ki faitaulaga sili, mo takitaki o tino tausi o te Fale Tapu, mo toeaina kola ne o'mai ki a ia, “Ko o'mai koutou mo pelu mo pago e pela mo se pukega o se tino faomea?

⁵³ Ne 'nofo sale eiloa tatou i te Fale Tapu i aso katoa, e seki oko mai eiloa otou lima ki a au; ka ko te otou taimi tonu eiloa tenei, me i te malosi o te pouliga ko pule.”

⁵⁴Ne puke fakapagota ne latou a Iesu, kae takitaki ki te fale o te faitaulaga sili. Kae ne tautali 'mao atu Petelu.

⁵⁵Kae i te otiga ne fa'ka ne latou a te afi i te kogaloto o te fale, 'nofo ei ki lalo, fakatasi atu ei foki Petelu ki a latou.

⁵⁶Ka ko lavea a ia ne te tamafine e tokotasi me nofo mai i te koga e maina, faka'toka atu ei ona mata, kae fai atu, “Ko ia foki tenei ne fakatasi mo Iesu.”

⁵⁷Kae ne fakafiti a Petelu penei, “Toku fafine, e se iloa ne au a ia.”

⁵⁸Tai leva malie ake, ne kilo atu a te sua tino ki a ia, kae fai atu penei, “Ko koe foki te sua tino o latou.” Kae ne tali mai a Petelu, “Toku tagata, e se ko au!”

⁵⁹Kati ko tasi te itula mai tua ifo, kae ne faipati malosi atu ei te sua tino penei: “E tonu eiloa, ne fakatasi te tagata nei mo ia, me i a ia se Kalilaia.”

⁶⁰Ne tali mai Petelu, “Toku tagata, e se iloa ne au a te mea e fai mai ei koe.” I te taimi koi faipati ei a ia, kae tagi mai te moa.

⁶¹Ne mafuli atu te Aliki, ko onoono atu ki a Petelu, ka ko Petelu ko masaua ne ia a muna a te Aliki, me ne fai atu pela ki a ia, “Ka koi tuai o tagi te moa i te po nei, ka ko fakafiti fakatolu mai koe ki a au.”

⁶²Ne fanatu ei Petelu ki tua o tagi mautuutu.

⁶³Ka ko tino kola ne leoleo ne latou a Iesu, ne fakatauemu ki a ia kae kini foki ne latou.

⁶⁴Ne 'sai ne latou ona mata, kae fesili atu ki ei penei, “Mate mai: ko oi ne kini ne ia koe.”

⁶⁵Kae uke foki olotou isi muna masei ne fai atu ki a ia.

⁶⁶I te aoakega, 'luku fakatasi ei toeaina Iutaia, faitaulaga sili, mo faiakoga o te Tulafono, kae takitaki atu a ia ne latou ki te lotou fono, fai atu ei latou ki a ia penei:

⁶⁷“Kafai koe ko te Keliso, taku mai ki a matou.” Ne tali a ia ki a latou, “Kafai e taku atu ne au, e se talitonu eiloa koutou.

⁶⁸Kafai foki e fesili atu au ki a koutou, e se tali mai eiloa koutou.

⁶⁹Ka kamata atu nei au te Tama a te Tagata o nofo i te koga taua ko te feitu fakaatamai o te Atua Mana.”

⁷⁰Ne fai mai latou katoa, “Ko koe tena ko te Tama a te Atua?” Kae ne tali atu a ia ki a latou, “Tena eiloa e fai mai ne koutou.”

⁷¹Olotou muna, “Ko se toe ma'nako tatou ki se isi molimau! Me ko lagona tonu ne tatou ana pati tonu!”