Read Te Tusi Tapu I Te Gana Tuvalu Lomiga Lua LUKA 23 Bible Online

LUKA 23 - Te Tusi Tapu I Te Gana Tuvalu Lomiga Lua bible

LUKA 23

¹Ne 'tu ki luga a tino katoa, takitaki atu ei ne latou a Iesu ki a Pilato,

²kae kamata o fai atu olotou mau penei: “Ne maua ne matou a ia nei ko takitaki 'se te fenua, ne taofi ne ia mo a ma fai lafoga ki a Kaisala, kae fai mai foki i a ia ko te Keliso te Tupu.”

³Ne fesili mai Pilato ki a ia, “A koe ko te tupu o tino Iutaia?” Ne tali atu a ia, “Tena eiloa ne fai mai ne koe.”

⁴Ne fai atu Pilato ki faitaulaga sili mo te vaitino, “E se iloa ne au se mea e sala ei te tino tenei.”

⁵Ka ko latou ne kinau malosi faeloa penei. “Ko fakamakosu ne ia a te fenua i ana akoakoga, e kamata mai i Kalilaia o fano ki Iutaia katoa, ke oko mai eiloa ki konei.”

⁶I te lagonaga ne Pilato a te mea nei, fesili atu ei penei, “A te tagata nei se Kalilaia?”

⁷I te iloaga ne ia i a Iesu se tino mai te pulega a Helota, uga atu ei ne ia ki a Helota, tela e nofo tumau i Ielusalema i aso kona.

⁸Ko oko eiloa i te fiafia o Helota i te kiloga ki a Iesu, me ko oti ne lagona ne ia, ka ko leva foki ne fia fetaui mo ia; ne fakamoemoe foki a ia ke fai ne Iesu ne fakailoga.

⁹Ne fesili mai Helota ki a Iesu i ne fesili e uke, kae seai eiloa sena tali ne fai.

¹⁰Ka ko faitaulaga sili mo faiakoga o te Tulafono ne 'maka atu ki mua, o fakamalosi te lotou mau e uiga ki a Iesu.

¹¹A Helota mo ana sotia ne fakatauemu, kae fakaseaoga ne latou a Iesu. Ne fakapei ne latou a ia ki te gatu malapulapu, kae toe fakafoki atu ki a Pilato.

¹²Ne toe 'lei ei Pilato mo Helota i te aso eiloa tena; me ne fai fili laua muamua.

¹³Ne 'luku ne Pilato faitaulaga sili, pule, mo te fenua katoa.

¹⁴Ne fai atu a ia ki a latou, “Ne aumai ne koutou te tagata tenei ki a au, e pela me se tino e faka'se ki te fenua, kae kiloke, ko oti ne sukesuke ne au a ia i otou mua, kae e seki iloa ne au se mea e sala ei te tagata tenei, i mea ne molimau mai ei koutou e uiga ki a ia.

¹⁵Ne seki maua foki ne Helota se 'se o Iesu, tela toe uga mai ei a ia ki a tatou, me seai sena mea masei ne fai, e 'tau ei o mate.

¹⁶Tela la, ka kini ne au a ia ko 'tala atu ei.”

¹⁷(I Paseka takitasi, e masani Pilato o fakasaoloto atu a te pagota e tokotasi ki a latou.)

¹⁸Ne ka'laga a te vaitino katoa penei, “Tamate a ia, kae fakasaoloto mai Palapa ki a matou!”

¹⁹I a Palapa ne pei ki te fale puipui me ne kosu ne ia te fa'kai, kae tatino foki.

²⁰Ne manako Pilato o fakasaoloto a Iesu, tela ne toe faipati atu ei ki a latou.

²¹Kae ne ka'laga malosi mai latou penei, “Fakasataulo! Fakasataulo a ia!”

²²Tenei te fai atu fakatolu o Pilato ki a latou, “Se a te mea masei ne fai ne ia? E se maua ne au sona 'se e 'tau ei o mate; tela la, ka kini ne au a ia, ko 'tala atu ei.”

²³Kae ne paka'laga mai eiloa latou ke na fakasataulo, kae ne manumalo olotou leo.

²⁴Tela, fakasala ei ne Pilato a Iesu, e tusa mo te lotou manakoga.

²⁵Ko fakasaoloto atu ne ia a te tagata tela ne ma'nako latou ki ei, ko te tino tela ne fale puipui ona ko te kosu fenua mo te tatino, kae tuku atu ei ne ia a Iesu ki a latou, e pela eiloa mo te lotou manakoga.

²⁶Ne takitaki atu ne latou a Iesu, fepaki ei mo te tagata e igoa ki a Simona te Kulene, tela ne vau mai vao. Ne puke ne latou a ia, kae fakaeke atu ki ei te sataulo, ke tautali atu i tua o Iesu.

²⁷Ne tau'tali atu i a Iesu a te vaitino e tokouke, fakatasi atu foki ei a fafine kola e fakatau'tagi kae fanoanoa ki a ia.

²⁸Ne mafuli atu a Iesu ki a latou, kae fai atu, “Tamafine o Ielusalema! Sa 'tagi mai ki a au, kae 'tagi ki a koutou mo otou fanau.

²⁹I te mea e oko mai aso, e fai mai ei tino penei, ‘Amutia fafine kola e se afu mo fafine e seki fanau, mo u e seki ugina.’

³⁰ Tena te taimi kafai mai ei tino ki mauga, ‘Ma'toli mai ki a matou!’ kae ki koga maluga'luga, ‘Fakapulou ifo matou!’

³¹Me kafai e fai mea konei ki te lakau mata, kae se a te mea e fai ki te lakau pakupaku?”

³²Ne ave ne latou a te sua tokolua pagota ke tamate fakatasi mo Iesu.

³³I te okoatuga o latou ki te koga e fakaigoa ki te “Gatiulupoko,” ne fakasataulo ne latou a ia, fakatasi mo te tokolua pagota, e tokotasi i tena feitu fakaatamai, kae tokotasi i tena fakamaui.

³⁴ Muna a Iesu, “Toku Tamana, fakamagalo latou; me se iloa ne latou te lotou mea tenei e fai.”[26] Ne fai ne latou te vili ke tufa ei ona gatu.

³⁵ Kae ne tulaki atu a tino o onoono atu, ka koi faifai muna mai takitaki o Iutaia ki a ia penei. “Ne fakaola ne ia a nisi tino, ke fakaola la ne ia a ia eiloa, manafai a ia ko te Keliso tela ne filigina ne te Atua!”

³⁶ Ne faifai muna foki ki a ia sotia; kae o'mai foki ki a ia o tuku mai te uaina vi.

³⁷Kae fai mai, “Kafai koe ko te tupu o tino Iutaia, fakaola la koe ne koe eiloa.”

³⁸Konei pati e tusi mai luga i a ia, “Tenei te Tupu o tino Iutaia.”

³⁹E tokotasi te pagota ne muna masei ki a ia penei. “E se ko koe te Keliso? Fakaola la koe pela foki mo maua nei!”

⁴⁰Ne 'liko atu te sua pagota ki a ia penei, “E se mataku koe ki te Atua i a taua ko fakasala fakatasi mo ia?

⁴¹Ko tonu eiloa te ta fakasalaga, me ko taui mai mea 'se ne fai ne taua; ka ko ia nei, e seai eiloa sena mea 'se ne fai.”

⁴²Ana muna ki a Iesu, “Masaua mai au manafai e vau koe i tou 'malu fakatupu!”

⁴³Ne tali atu a Iesu ki a ia, “Au e muna tonu atu ki a koe ko te aso tenei e fakatasi ei taua i Palataiso.”

⁴⁴Ko pili o ta te sefululua i te matega o te la, pouli ei mo te fenua katoa ke oko ki te itula e tolu.

⁴⁵ Kae ne masaelua foki te 'pui o te Fale Tapu.

⁴⁶ Ne kalaga Iesu mo te leo maluga penei, “Toku Tamana, ko tuku atu ne au toku agaga ki ou lima!” I te otiga o ana muna konei kae mate.

⁴⁷Ne matea ne te takitaki o te tokoselau a te mea ne tupu, 'viki atu ei ki te Atua penei. “E tonu eiloa, i a ia se tino amiotonu.”

⁴⁸Ka ko tino katoa kola ne maopoopo o onoono ki mea ne 'tupu, lavea ei ne latou a mea kona, pāpā ei olotou fatafata i te fanoanoa, kae 'foki katoa ki olotou kaiga.

⁴⁹ Ka ko ona takaga katoa, e aofia i ei fafine kola ne tau'tali i a ia mai Kalilaia, ne 'tu 'mao atu o onoono ki mea konei ne 'tupu.

⁵⁰E isi se tagata e igoa ki a Iosefa mai te fa'kai o tino Iutaia ko Alimataia, se tino o te Fonopule, se tino 'lei foki kae amiotonu.

⁵¹Ne seki kau a ia ki te lotou pulepulega ne fai, kae ne nofo fakatalitali ki te Malo o te Atua.

⁵²Ne fano ki a Pilato o fakamolemole ke ave ne ia te foitino o Iesu.

⁵³Ne tuku ifo ne ia a te foitino, kae pelu ki te sulukafu lino, fakatakato ei ne ia ki te tanuga ne tuki i kaupapa, tela e seki fakatakato eiloa se tino ki ei.

⁵⁴Ko te aso Fakatoka tenei, me ko pili ki te Sapati.

⁵⁵Ka ko fafine kola ne tautali i a ia mai Kalilaia, ne olo fakatasi mo Iosefa, onoono atu ei latou ki te tanuga, mo te fakatakatoga o tena foitino.

⁵⁶ Ne 'foki latou ki olotou kaiga, fakatoka ei ne latou a mea manogi mo sinu. Ne malo'lo latou i te Sapati e pela eiloa mo te Tulafono.