Read Te Tusi Tapu I Te Gana Tuvalu Lomiga Lua LUKA 24 Bible Online

LUKA 24 - Te Tusi Tapu I Te Gana Tuvalu Lomiga Lua bible

LUKA 24

¹I te mafaga o te ata i te aso muamua o te vaiaso tela ko te Aso Tapu, ne olo fafine ki te tanuga mo olotou mea manogi kola ne fakatoka.

²Ne maua atu ne latou te fatu ko oti ne fakatakapili keatea mai te gutu o te tanuga,

³tela ulu atu ei latou, kae ne se maua ne latou te foitino o te Aliki ko Iesu.

⁴Ka koi 'tu latou mo olotou mafaufau se toka 'lei, kae 'poi eiloa me ko 'tu mai i olotou tafa tagata e tokolua mo la gatu malapu'lapu.

⁵Ma'taku ei latou, kae pu'nou olotou mata ki lalo i te laukele, kae fai mai tagata kona ki a latou: “Ai a e salasala ei ne koutou a ia tela ko ola mai i tino 'mate?

⁶E galo a ia i konei, ka ko toetu. Masaua ana muna ne fai atu ki a koutou, i tena nofoga i Kalilaia,

⁷me e 'tau o tuku atu au te Tama a te Tagata ki lima o tino agasala, kae ka fakasataulo au, kae i te tolu o aso, ka toetu mai ei au.”

⁸Masaua ei ne fafine ana muna kona,

⁹'foki mai ei latou mai te tanuga, kae ne fakamatala mai ne latou a mea katoa ki te tinoagafulu mo te tokotasi, mo latou katoa ne i kona.

¹⁰Ko Malia te Makatala, ko Ioana, ko Malia te matua o Iakopo, mo nisi fafine ne fakatasi latou, ko latou kona ne fakamatala mai a mea kona ki apositolo.

¹¹Ka ko muna kona a fafine, e pela fua mo se tala vale; kae se talitonu foki latou ki ei.

¹²Kae ne tu ki luga Petelu, kae tele ki te tanuga, ne punou ifo, matea ei ne ia sulukafu lino e tuku mai. Ne foki a ia ki tena fale, kae ne ofo i te mea ne tupu.[27]

¹³I te aso eiloa tena, ne olo te tokolua ki te fa'kai e igoa ki a Emau, tela e fitu maila mai Ielusalema.

¹⁴Ne sau'tala laua ki mea katoa kola ne 'tupu.

¹⁵Ka koi sau'tala laua kae mafaufau ki ei, ne fakapilipili atu Iesu ki o la tafa, olo tasi ei latou.

¹⁶Ka ko faka'segi o la mata, ke se matea ne laua Iesu.

¹⁷Kae ne fai atu Iesu ki a laua, “Ne a lua tala kona e fai, kae sasale?” Kae ne 'tu faka'logo laua mo te mata fanoanoa.

¹⁸Ne tali mai te tokotasi o laua e igoa ki a Kaleopa, “Ko koe fua nei te tino e nofo i Ielusalema, e se ke iloagina a mea ne 'tupu i lua aso ko teka atu nei?”

¹⁹Ne fai atu a ia ki a laua, “Ne a mea?” Kae ne fai mai laua. “Ko mea e uiga ki a Iesu te Nasaleta, ko te pelofeta e malosi i ana muna mo ana faiga i mua o te Atua mo te fenua katoa.

²⁰Ne tuku atu foki a ia ne faitaulaga sili mo pule o latou ke fakasala ki te mate, kae ke fakasataulo foki.

²¹Me ko ia eiloa te tino e tokotasi ne faka'na matou ki ei ka fakaola ne ia a Isalaelu, kae se gata i mea katoa kona, kae tenei te tolu o aso i te 'tupuga o mea kona.

²²Ne ofo matou i omotou fafine ne i te tanuga i te mafaga o te ata.

²³Kae ne seki maua ne latou tena foitino. Ne 'foki mai latou, kae tala mai me ne matea ne latou se fakaasiga, i agelu kola ne taku mai ki a latou, me i a ia ko ola.

²⁴A nisi o matou ne olo ki te tanuga, lavea ake ei ne latou me tonu eiloa te mea tela ne fai mai ei fafine; i te mea e seki lavea ne latou a ia.”

²⁵Ne fai atu a Iesu ki a laua, “Tino va'lea mo te fui talitonu ki mea katoa ne fai mai ei pelofeta.

²⁶E se 'tau la o logo'mae a te Keliso i mea pena, e ulu atu ei a ia ki tena 'malu?”

²⁷Ne fakamatala ne Iesu ki a laua a mea katoa ne tusi ki a ia i Tusi, mai i a Mose mo pelofeta katoa.

²⁸Ko pili atu latou ki te fa'kai tela e olo ki ei, ka ko Iesu e pela eiloa me fano.

²⁹Ne taumafai atu laua ke 'nofo latou, a la muna, “Ke 'nofo tatou; me ko pili mai te po.” Fanatu ei a ia ke 'nofo mo laua.

³⁰I te 'kaiga a latou, ne puke a Iesu ki te falaoa, ko fakafetai, ko tofitofi, kae avatu ki a laua.

³¹'Pula ake ei o la mata, matea ei ne laua me ko Iesu, fakagalo ei a ia mai o la mata.

³²Ne fepeiaki a la muna penei, “E seki lagona eiloa i o ta loto ana muna ne fai mai ki a taua i te alatu, kae fakamatala mai te Tusi ki a taua?”

³³Ne 'tu fakavave ki luga kae foki ki Ielusalema, maua atu ei ne laua a te tinoagafulu mo te tokotasi, e maopoopo fakatasi mo nisi tino i kona.

³⁴Olotou muna, “Ko toetu eiloa te Aliki, me ne fakaasi foki a ia ki a Simona.”

³⁵Kae ne fakamatala foki ne laua a mea kola ne 'tupu i te alatu, i te la mateaga a Iesu ne tofitofi ne ia a te falaoa.

³⁶Ka koi tala atu ne laua a mea konei, e 'poi eiloa i a Iesu ko tu i loto i a latou, ana muna, “Ke i a koutou te filemu.”[28]

³⁷Ko oko eiloa i te lotou polepole mo te mataku, me ne leake eiloa me se aitu ne olotou mateagina.

³⁸Kae ne fai atu a ia ki a latou: “Ai a e manavase ei koutou? Ai a e masalosalo ei koutou?

³⁹Kilo mai ki oku lima mo oku vae, me ko au eiloa tenei! Puke mai ki a au, ka matea ei ne koutou i te aitu e seai ne ona 'kano mo ona ivi, ka ko au e isi.”

⁴⁰Ne faipati a ia kae fakaasi atu foki ona lima mo ona vae.[29]

⁴¹Ne seki talitonu eiloa latou, me ko oko eiloa i te lotou fiafia mo te ofo; fesili atu ei ki a latou penei: “E isi ne otou mo meakai?”

⁴²Tuku mai ei ne latou a mo ika tunupaku,

⁴³tela, puke ei ne ia kae kai i olotou mua.

⁴⁴Ne fai atu foki a ia, “Ko aku muna eiloa konei ne fai atu ki a koutou, ka koi 'nofo tasi tatou; ko te mea ke taunu katoa ki a au a mea kola ne tusi i te Tulafono a Mose, mo tusi a pelofeta pela foki mo te tusi o Salamo.”

⁴⁵'Tala ei ne ia olotou mafaufau ke maina i Tusi.

⁴⁶Muna atu ei a ia ki a latou: “Tenei te mea ne tusi: me e 'tau o logo'mae te Keliso, kae ka toetu mai tino 'mate i te tolu o aso.

⁴⁷Ko te mea ke folafola atu te salamo mo te fakamagaloga o agasala, ki fenua katoa i tena igoa, e kamata i Ielusalema.

⁴⁸A koutou ko molimau i mea konei.

⁴⁹ Kae ka tuku atu ne au ki a koutou a te mea tela ne fai feagaiga mai ei toku Tamana. Kae e 'tau mo koutou o fakatalitali i te fa'kai, ki te oko atu o te mana mai luga ki a koutou.”

⁵⁰Ne takitaki ne ia latou ki tua o te fa'kai ke oko ki Petania, ne sisi ake ona lima, kae fakamanuia atu ki a latou.

⁵¹Ka koi fakamanuia atu a Iesu ki a latou, kamata ei o masagi ake mai i a latou o fanake ki te lagi.[30]

⁵²Ne tapuaki latou ki a ia, kae ne 'foki ki Ielusalema mo te fiafia lasi,

⁵³kae ne 'nofo faeloa latou i te Fale Tapu o 'viki ki te Atua.