Read Te Tusi Tapu I Te Gana Tuvalu Lomiga Lua LUKA 4 Bible Online

LUKA 4 - Te Tusi Tapu I Te Gana Tuvalu Lomiga Lua bible

LUKA 4

¹Ne foki mai a Iesu mai i te Iolitana, ko fonu i te Agaga Tapu, kae ne takitaki ne te Agaga Tapu ki te vao,

²tela ne fakaosoosogina ei a ia ne te Tiapolo i aso e fa sefulu. Ne seki kai eiloa a ia i te vaitaimi tena, kae ne lagona ne ia te likiliki i te otiga.

³Ne fai atu a te Tiapolo ki a ia, “Kafai ko koe te Tama a te Atua, fakatonu ake ke liu falaoa te fatu tenei.”

⁴ Ne tali atu a Iesu, “Muna a te Tusi, ‘E se ko meakai fua e ola ei te tino.’ ”

⁵Ne toe ave fakavave a ia ne te Tiapolo ki te koga maluga, kae ne fakaasi atu ki a ia malo katoa o te lalolagi.

⁶Muna a te Tiapolo, “Ka avatu ne au te pule mo te 'malu katoa ki a koe, me ko oti ne tuku mai ki a au te pule, tela e mafai o tuku fua ne au ki so se tino e loto au ki ei.

⁷Tela la, e a koe katoa mea konei, manafai e tapuaki mai koe ki a au.”

⁸ Ne tali atu a Iesu, “Muna a te Tusi, ‘Tapuaki ki te Aliki tou Atua, me na ko ia fua e 'tau o tavini koe ki ei!”’

⁹Ne toe ave a ia ne te Tiapolo ki Ielusalema ki te koga tafa maluga o te Fale Tapu. Ana muna ki a ia, “Kafai ko koe te Tama a te Atua, eva ki lalo mai konei.

¹⁰ Me ne fai mai te Tusi, ‘Ka fakatonu ne te Atua ana agelu ke tausi ki a koe.’

¹¹Ne muna mai foki, ‘Ka apai ne latou koe i olotou lima, ko te mea ke se pa'kia ou vae i fatu.”’

¹² Ne tali atu a Iesu ki a ia, “Muna a te Tusi, ‘E se 'tau mo koe o tofotofo ki te Aliki tou Atua.”’

¹³I te otiga ne fakaosooso a Iesu ne te Tiapolo i ala kesekese, tiakina ei ne ia ke oko ki se isi aso.

¹⁴Ne foki a Iesu ki Kalilaia, kae ne nofo i a ia te mana o te Agaga Tapu. Ne pa te tala e uiga ki a ia i koga katoa o te fenua tena.

¹⁵Ne akoako ki a latou i loto i olotou fale tapuaki, kae ne tavaegina ne latou katoa.

¹⁶Ne foki Iesu ki Nasaleta, ki te koga ne tupu ake ei a ia, kae i te isi Sapati, ne fanatu a ia ki te fale tapuaki e pela eiloa mo tena masani. Ne tu ki luga o faitau te Tusi,

¹⁷kae ne tuku atu ki a ia te Tusi a te pelofeta ko Isaia; Ne 'tala ne ia te Tusi, kae ne maua ne ia a te koga e tusi i ei a pati konei:

¹⁸ “Ko i luga i a au te Agaga o te Aliki. Ne faū ne ia au o lauga atu te Tala 'Lei ki tino ma'tiva, Ne uga mai ne ia au o takutaku atu te saolotoga ki tino kola ne 'kave fakapagota, O faka'kite mata o tino 'kivi, Kae fakasaoloto latou kola ko fakasauagina,

¹⁹O takutaku atu foki te tausaga ka fakaola ei ne te Aliki ona tino!”

²⁰Ne pelu ne Iesu te Tusi, kae fakafoki atu ki te tino tausi, nofo ei ki lalo. Ko latou kola ne i loto i te fale tapuaki, ne faka'toka olotou mata ki a ia.

²¹Ne kamata o faipati atu a Iesu ki a latou penei: “Ko fakataunu i te aso nei a te vaega o te Tusi tenei, tela ko oti ne fakalogo'logo koutou ki ei.”

²²Ko oko eiloa i te fia'fia o latou ki a ia, kae ne ofo latou i pati 'lei ne faipati ne ia. Ne fai ake ei latou pela, “E se ko ia tena ko te tama a Iosefa?”

²³Ne fai atu a ia ki a koutou: “E iloa tonu ne au me ka fai mai ne koutou te muna fakatusa tenei ki a au, ‘Te tokita, fai eiloa ne koe tou masaki ke 'lei.’ Ka toe muna mai foki koutou ki a au, ‘Fai ake ne koe i konei i tou fa'kai tonu, a mea kola ne 'logo matou ne fai ne koe i Kapanaumi.’

²⁴ Kae faipati tonu atu au ki a koutou, “E se mafai o talia 'lei se pelofeta i tena fenua tonu.

²⁵ Faka'logo mai ki a au: Se mea tonu me e tokouke fafine ne 'mate olotou avaga i Isalaelu i taimi o Elia, i te seaiga o ne vaiua i te tolu mo te afā tausaga, kae ne poko mo te oge i te fenua katoa.

²⁶ Ne seki uga atu a Elia ki se fafine o latou kona, kae ne uga atu fua ki te fafine Salefata tela ko mate tena avaga, i te fenua ko Saitonu.

²⁷ E tokouke foki lepela i Isalaelu i te vaitaimi o te pelofeta ko Elisaia; kae e seai eiloa se tino o latou ne faka'ma, kae na ko Namanu te Sulia.”

²⁸Ka ko tino kola ne 'nofo i loto i te fale tapuaki, ko oko eiloa i te kaitaua, i te lagonaga ne latou te mea tenei.

²⁹Ne 'tu ki luga kae soso Iesu ki tua i te fa'kai, takitaki ei a ia ne latou ki te feitu o te mauga tela e tu i ei te lotou fa'kai, ke pei ifo a ia ki lalo.

³⁰Kae ne sasale atu eiloa i te lotou va, fano eiloa.

³¹Ne fano Iesu ki Kapanaumi, ko te fa'kai o Kalilaia tela ne akoako atu ei a ia ki tino i te Sapati.

³² Ne ofo latou i ana akoakoga, me isi te mana i ana muna.

³³E isi se tino i loto i te fale tapuaki ne pukea ne te agaga masei, kae ne pakalaga penei:

³⁴“Iesu te Nasaleta, se a te mea e manako ei koe mai i a matou? Ne vau koe o fakamasei matou? E iloa ne au me ko oi koe: Ko koe te avefekau 'malu a te Atua!”

³⁵Ne 'liko atu a Iesu ki a ia kae fai atu, “Nofo malie, fano keatea mai i a ia!” Ne pei 'tuki a ia ki lalo ne te agaga masei i olotou mua, kae ne fano keatea mai i a ia, kae e seai sena mea masei ne fai ki ei.

³⁶Ne ofo latou kae fai ake pela: “Se a te vaega pati e fai mai penei? I te pule mo te mana ko fakatonu atu ne te tagata nei a agaga masei ke olo keatea, ko te mea eiloa ko olo keatea!”

³⁷Kae ne pa te tala e uiga ki a Iesu i koga katoa o te fenua tena.

³⁸Ne tuku ne Iesu te fale tapuaki o fano ki te fale o Simona. Ne masaki malosi te matua o te avaga a Simona; ne pokotia ne te fiva, kae ne fakailoa atu ne latou ki a Iesu.

³⁹Ne fanatu a Iesu, tu i ona tafa, kae fakagata ne ia te fiva. Ne 'lei tena fiva, tu ake ki luga, kamata eiloa o tavini atu ki a latou o laulau meakai.

⁴⁰I te toga o te la, ne aumai a tino kola ne maua ne masaki valevale ne olotou taugasoa ki a Iesu. Ne tuku ona lima ki luga i a latou takitokotasi, kae ne ma'losi latou katoa.

⁴¹E tokouke agaga ma'sei ne olo keatea mai i te tokoukega, kae ne kalaga penei: “A koe ko te Tama a te Atua!” Ne 'liko atu a Iesu ki a latou, ko se mafai foki ne latou o faipati i te mea ko iloa ne latou me ko ia ko te Keliso.

⁴²Ne tuku ne Iesu a te fa'kai i te vaveao o fano ki se koga lavaki. Ne salasala a tino ki a ia, kae i te mauaga ne latou, ne taumafai o taofi ke se fano keatea mai i a latou.

⁴³Ne fai atu ki a latou, “E 'tau mo au o takutaku atu te Tala 'Lei o te Malo o te Atua ki nisi fa'kai, me tena eiloa te mea ne uga mai ei au ne te Atua, ke vau o fai.”

⁴⁴Tela la, ne lauga atu ei a ia i fale tapuaki o Iutaia.