Read Te Tusi Tapu I Te Gana Tuvalu Lomiga Lua LUKA 5 Bible Online

LUKA 5 - Te Tusi Tapu I Te Gana Tuvalu Lomiga Lua bible

LUKA 5

¹I te aso e tasi ne tu Iesu i te tafatai o te vai o Kenesaleta, ka ko ualolo mai a tino ki a ia o fakalogo'logo ki te muna a te Atua.

²Ne lavea ne ia a poti e lua ko faka'kasa ake ki uta i te tafatai. Ne tiakina i kona ne tino faa-ika, kae olo o 'fulu olotou tili.

³Ne sopo Iesu ki luga i te poti o Simona; kae ne fai atu ki a ia ke usu malie atu ki tai. Ne sagasaga a ia i luga i te poti, kae akoako atu ki tino.

⁴I te otiga ne faipati, ne fai atu a ia ki a Simona, “Usu atu te poti ke tai 'mao ki te koga 'poko, ka ko koe mo ou takaga, pei ifo otou tili ke maua ne otou ika.”

⁵ Ne fai atu a Simona ki a ia, “Te Aliki, ne logofiofio eiloa matou i te po, e seai eiloa se ika ne maua; kae ona ko tau pati, ka pei ifo ei ne au a tili.”

⁶ Ne pei ifo ei ne latou ka ko oko eiloa i te uke o ika, tela ne masae'sae ei olotou tili.

⁷Ne tālo atu latou ki olotou takaga i te sua poti ke o'mai o fesoasoani. Ne o'mai kae 'fao ne latou te avā poti, mumea eiloa ko a'pulu.

⁸I te laveaga ne Simona Petelu te mea ne tupu, ne totuli i mua o Iesu kae fai atu, “Te Aliki, fano keatea mai i a au, me i a au se tagata agasala.”

⁹Ne ofo a ia, pela foki mo latou kola i kona, ona ko te uke olotou ika ne maua.

¹⁰E pena foki takaga o Simona ko Iakopo mo Ioane, te fanau a Sepetaio. Ne fai atu a Iesu ki a Simona, “Sa mataku; mai i te taimi nei o fano ki mua, ka maua ne koe ne tino.”

¹¹Ne soso ake ne latou a poti ki uta, tiaki ei olotou mea katoa kae tau'tali atu i a Iesu.

¹²Ne nofo a Iesu i te sua fa'kai e nofo i ei te tino ko soko tena foitino i te lepela. I te laveaga ne ia a Iesu, ne fakasiga ifo i ona mua kae fakamolemole atu penei, “Tou 'Malu, kafai e loto koe ki ei, e mafai ne koe o faka'ma mai au.”[3]

¹³Ne 'kapa atu te lima o Iesu o fakapatele ki a ia, kae fai atu, “Au e loto ki ei, ke 'ma koe.” I kona foki eiloa, 'lei eiloa tena lepela.

¹⁴Ne fakatonu atu ne Iesu a ia, “Sa faipati ne koe te mea nei ki se tino, kae fano nei eiloa ki te faitaulaga ke onoono ki a koe, tuku atu foki tau taulaga, e pela eiloa mo te fakatonuga a Mose, e fakapatonu ei ki tino katoa me i a koe ko 'lei, ko se lepela.”

¹⁵Ka ko na gasolo ei o pa te tala e uiga ki a Iesu, ne ualolo mai a tino o fakalogo'logo ki a ia, kae faka'lei olotou masaki.

¹⁶Ne fanatu a ia ki te koga lavaki o 'talo i ei.

¹⁷I te sua aso ne fai akoakoga a Iesu; e isi ne Falesaio mo faiakoga o te Tulafono ne 'nofo i ei mai fa'kai katoa o Kalilaia, Iutaia mo Ielusalema. Ne nofo mo Iesu te mana o te Atua o faka'lei a tino masaki.

¹⁸Ne o'mai nisi tagata e sausau mai te tino e masaki faka'mate i luga i te moega, kae ne taumafai o avatu ki loto i te fale, o tuku i mua o Iesu.

¹⁹Ona ko te tokouke o tino, ko se mafai o maua se ala e ave ei ne latou ki loto i te fale. Ne avake ne latou ki luga i te tuafale, ne 'tala ne latou te tuafale, tukutuku ifo ei a ia ne latou i luga i tena moega, ki te kogaloto tonu eiloa o tino, i mua tonu o Iesu.

²⁰Ne iloa ne Iesu te lasi o te lotou fakatuanaki, ne fai atu ei ki te tagata tena, “Toku taugasoa, ko magalo au agasala.”

²¹Ka ko faiakoga o te Tulafono mo Falesaio ne kamata o fai'pati i a latou eiloa penei: “Ko oi te tino tenei e tokatokai ki te Atua i se auala penei? E seai se tino e mafai ne ia o fakamagalo agasala, ko te Atua fua.”

²²Ne iloa ne Iesu olotou mafaufauga, kae ne fai atu ki a latou: “Ai a e mafaufau ei koutou pena?

²³Tefea e faigofie, ko te fai atu penei, ‘Ko magalo au agasala, ’ io me ko te fai atu pela, ‘Tu ki luga o sasale’?

²⁴Ka fakapatonu ne au ki a koutou, me i a au te Tama a te Tagata e isi tena mana i te lalolagi o fakamagalo agasala.” Tela fai atu ei ki te tino masaki faka'mate, “Ko muna atu au ki a koe, tu ki luga, puke tou moega kae fano ki tou fale.”

²⁵I kona foki eiloa, ne tu ki luga i mua o latou katoa, puke tena moega, fano eiloa ki tena fale o 'viki ki te Atua.

²⁶Ne ofo latou katoa! Ne 'viki ki te Atua mo te ma'taku, kae fai ake, “Ko mea fakaofoofogina eiloa ne matea ne tatou i te aso nei!”

²⁷I te otiga o mea kona, ne fano a Iesu ki tua kae ne matea ne ia te tagata ao lafoga e igoa ki a Levi, e sagasaga i tena ofisa. Ne fai atu a Iesu ki a ia, “Tautali mai ki a au.”

²⁸Ne tu ake a Levi, tiakina mea katoa kae tautali ki a ia.

²⁹Ne fai te 'kaiga lasi a Levi ki a Iesu i tena fale, kae tokouke foki te kau ao lafoga mo nisi tino ake ne 'nofo mo latou.

³⁰ E isi Falesaio mo faiakoga o te Tulafono, ne fatufatu ki soko o Iesu, kae ne fai mai, “Ai a e 'kai kae inu fakatasi ei koutou mo tino agasala?”

³¹Ne tali atu a Iesu ki a latou: “A te tino malosi e se manako ki se tokita, ka ko latou fua kola e ma'saki.

³²Au ne seki vau o kalaga ki tino amiotonu, ka ko tino agasala ke salamo ki olotou agasala.”

³³Ne fai mai tino ki a Iesu, “A soko o Ioane e fakaliki'liki, kae 'talo, e pena foki soko o Falesaio; ka ko ou soko e se fakaliki'liki.”

³⁴Ne tali atu a Iesu ki a latou: “I te otou taofi e mafai ne koutou o fai ki tino ne ami ki te 'kaiga o te avaga ke se 'kai, i te itula e 'nofo ei latou mo te tagata fatoa fakaipoipo?

³⁵Ka oko mai aso e ave ei keatea te tagata fatoa fakaipoipo mai i a latou, fatoa mafai ei ne latou o fakaliki'liki i aso kona.”

³⁶Ne fai atu ne Iesu a te tala fakatusa tenei ki a latou: “E seai se tino e 'sae ne ia te kapa laugatu mai te peleue fou o fonofono ki ei te peleue mago. Kafai e fai ne ia, ka fakamasei ne ia te peleue fou, me ko se fetaui te kapa laugatu fou ki te mea mago.

³⁷E seai foki se tino e utu ne ia te uaina fou ki loto i fagu e utu i ei a uaina ko leva. Kafai la e utu, ka mapa te fagu, ko sali ki tua te uaina, ko masei ei te fagu uaina.

³⁸A uaina fou e 'tau o utu ki loto i fagu fou!

³⁹Me e seai se tino e manako ki te uaina fou manafai ko oti ne inu i te uaina ko leva. Kae muna mai a ia, ‘Me e sili atu te logotonu o te uaina ko leva.”’